VHAEFESA 2

₁Na inwi kale no vha ni vhafu, ni vhapfuki vha mulayo, ni vhatshinyi. ₂No vha ni tshi tshila nga u tevhela zwa shango ḽino, na zwa muvhusi a no langa thuṅwa dza Saṱhane dzi re tshikhalani; ndi wone muya u shumaho kha vha sa pfi Mudzimu. ₃Na riṋe roṱhe ro vha ri tshi nga vhenevho, ri tshi tshila nga u langwa nga nyemulo dza tsiko yashu mmbi, ri tshi ita zwine zwa takadza mivhili yashu na mbilu dzashu. Zwenezwo-ha zwo vha zwo fanela uri Mudzimu a ri rwe-vho nga ṱhamu yawe sa vhenevhaḽa. ₄Hone Mudzimu o pfuma tshilidzi, o ri funa nga lufuno luhulu, ₅ndi zwe zwiḽa ri tshee vhafu nga vhutshinyi hashu, a ri baḓekanya na Khristo a tshi mu vusa vhafuni – khezwo-ha, no tshidzwa nga khathutshelo ya Mudzimu. ₆O ri vusa na Khristo Yesu a ri dzudza nae ngei ṱaḓulu, ₇u ralo hu u itela uri na nga zwifhinga zwi ḓaho a sumbedze vhuhulu ha khathutshelo yawe i si na mugumo, ine ya vhonala kha vhuthu he a ri itela nga Khristo Yesu.

₈Asizwo-ha, no tshidzwa nga khathutshelo ya Mudzimu, nga u fulufhela Ene; a zwi bvi kha inwi, i tou vha mpho ya Mudzimu. ₉A hu na tshine na nga ḓikhoḓa ngatsho; hufha zwi songo bveledzwa nga mishumo yaṋu. ₁₀Mudzimu ndi Ene we a ri ita zwine ra vha zwone; ndi Ene we a ri sika nga huswa nga u ri ita vhathihi na Khristo, uri ri tshile ri tshi ita zwivhuya, vhunga na Mudzimu o dzula o zwi dzudzanya uri ri zwi ite.

₁₁Zwino edzonu elelwa zwe na vha ni zwone kale: nga tsiko yaṋu no vha ni vhannḓa, ni tshi pfi mashuvhuru nga vhaḽa vhane vha pfi vho fumba, hu tshi ambiwa u fumba ha muvhili, ho itwaho nga vhathu. ₁₂Misi iyo no vha ni kule na Khristo, ni vhatsinda, ni sa koni u vha vhadzulapo na Vhaisraele, ni nnḓa ha milanga ye Mudzimu a fulufhedzisa vhathu, ni si na tshine na nga lavhelela fhano shangoni, ni sa ḓivhi Mudzimu. ₁₃Hone zwino inwi vhe na vha ni kule no no vha tsini nga u itwa vhathihi na Khristo nga lufu lwawe. ₁₄Mulalo washu ndi Khristo: ndi Ene o fhelisaho vhuswina nga u ṋekedza muvhili wawe a ri fela, ha vha u thutha luvhondo lwe lwa vha lwo fhandekanya Majuda na vhannḓa, vha vha tshithu tshithihi. ₁₅O fhelisa ndaela na zwidayo zwa mulayo, khae tshakha dzenedzo mbili dza vha lushaka luthihi luswa lwa vhathu, ḽa lala, ₁₆a fhedza vhuswina nga u fa hawe tshifhambanoni, a ṱanganya tshakha idzo mbili dza vha muvhili muthihi; honoho u fa hawe ha vha u dzi pfumedzanya na Mudzimu. ₁₇A tshi ḓa o ḓivhadza vhoṱhe mafhungo maḓifha a mulalo: a a ḓivhadza inwi vhannḓa vhe na vha ni kule na Mudzimu, khathihi na Majuda vhe vha vha vhe tsini nae. ₁₈Ndi Ene ane a vho ri swikisa ha Khotsi nga Muya onoyo muthihi. ₁₉Zwenezwo inwi vhannḓa a ni tshee vhatsinda, a ni tshee dziṱhunḓu, no no vha vhadzulapo khathihi na vhakhethwa vha Mudzimu, ni vha muṱa wawe. ₂₀Na inwi zwino no no fhaṱwa kha muteo we wa tewa nga vhaapostola na vhaporofita, thikho e Khristo Yesu Ene muṋe. ₂₁Ndi Ene ane a farakanya nnḓu yoṱhe ya hula ya vha nnḓu khethwa ya Muṋe washu. ₂₂Na inwi nge na vha vhathihi na Khristo ni khou fhaṱwa khathihi na vhaṅwe uri ni vhe nnḓu ine Mudzimu a dzula khayo nga Muya wawe.