ESEKIELE 13

₁Ipfi ḽa Muṋe washu ḽa amba na nṋe ḽa ri, “Iwe ṅwana wa muthu, porofita u tshi kaidza vhaporofita vha Israele; porofita u vhudze vhane vha sokou porofita zwine vha ḓihumbulela u ri, ₂‘Ipfani ipfi ḽa Yahavee.’ ₃Muṋe wa zwoṱhe Yahavee u ri: Vhaporofita vha matsilu vhane vha tevhela zwa mihumbulo yavho ngeno vha songo vhona bono, vha ḓo zwi vhona! ₄Iwe Israele, vhaporofita vhau vha nga phunguhwe dzi re matumbani. ₅A vha athu vhuya vha sedza he mitsheṱo ya wa vha i vusela vhathu vha Israele uri i khwaṱhe hu tshi lwiwa musi ḓuvha ḽa Yahavee ḽi tshi ḓa. ₆Vha na mabono a si na tshithu ngomu, vha bvumba mazwifhi vha ri, ‘Hu amba Yahavee,’ naho Nṋe ndi songo vha ruma; nahone vha kha ḓi lavhelela ndi tshi khunyeledza vhuporofita havho. ₇Ndi zwenezwo, ni na mabono a si na tshithu ngomu, ni ḓivhadza mazwifhi ni tshi ri, ‘Hu amba Yahavee,’ ngeno Nṋe ndi songo amba tshithu.”

₈Ndi zwone, Muṋe wa zwoṱhe Yahavee u ri, “Zwino ndi khou lwa na inwi nga mulandu wa maipfi aṋu a si na tshithu ngomu, na mabono aṋu a mazwifhi – hu amba Nṋe Muṋe wa zwoṱhe Yahavee. ₉Ndi ḓo angaladza tshanḓa tshanga nda rwa vhaporofita vha mabono a si na tshithu ngomu, vha bvumba mazwifhi; a vha nga ṱanganedzwi khoroni ya vhathu vhanga, madzina avho a nga si ṅwalwe Buguni ya vhathu vha Israele, a vha nga kandi mavuni a ḽa Israele; ndi hone ni tshi ḓo zwi ḓivha uri ndi Nṋe Muṋe wa zwoṱhe Yahavee. ₁₀Ndi uri vho xedza vhathu vhanga nga u ri, ‘Ḽo lala!’ ngeno hu si na mulalo. Vhathu vhanga vha tshi vusa luvhondo nga matope, vhanna havha vha lu fhoma nga phomo tshena. ₁₁Vhudza vhafhomi havho u ri, ‘Hu ḓo na mvula khulu, hu ḓo wa tshifhango, hu ḓo ḓa ḓumbu, ₁₂mutsheṱo uyo we fhasi huru. Vhathu a vha nga ḓo vhudzisa vha ri: Phomo ye na u fhoma ngayo i ngafhi?’ ” ₁₃Zwino-ha, Muṋe wa zwoṱhe Muṋe washu u ri, “Ndi ḓo vusa ḓumbu nga mbiti, nda nisa mvula ya mukumbela ndo sinyuwa, nda wisa matombo a tshifhango ndo halifha tsha pwashekanya zwoṱhe. ₁₄Luvhondo lwe na lu fhoma nga phomo ndi ḓo lu pwasha, nda lu posa fhasi lwe huru, miteo yalwo ya sala ye swoto. Lu ḓo wa, inwi na lovha fhasi halwo; ndi hone ni tshi ḓo zwi ḓivha uri ndi Nṋe Yahavee.

₁₅“Musi mbiti dzanga dza u lwa na luvhondo na vhathu vho lu fhomaho dzo no fhela, ndi ḓo ni vhudza nda ri, ‘Mutsheṱo a u tsheeho, na vho lu fhomaho nga phomo a vha tsheeho – ₁₆vhenevho vhaporofita vha Israele vhane vha porofita zwa Jerusalema, mabono avho a ri ḽo lala, ngeno hu si na mulalo’ – hu amba Nṋe Muṋe wa zwoṱhe Yahavee.

₁₇“Huno iwe ṅwana wa muthu, livhana na vhasadzi vha vhathu vha hau vhane vha sokou porofita zwe vha ḓihumbulela; porofita u tshi lwa navho ₁₈u ri, ‘Muṋe wa zwoṱhe Yahavee u ri: Khombo i khou ḓela vhasadzi vhane vha rungelela phamba dza manditi zwanḓani, vha no rungela vhathu miṅwenda ya u khurumela ya mielo yo fhambanaho, uri vha kone u fasha vhathu! Nṋa ni vhona unga ni nga lozwa vhathu vhanga na ḓitshidza inwi vhaṋe? ₁₉Ni nnyadza vhathu vhanga vha tshi zwi vhona ni tshi itela zwifhaho zwi si gathi zwa baḽi na zwigaku zwa vhurotho, na vhulaha vha songo fanelaho u fa, na litsha vha songo fanelaho u tshila, na zwifhela vhathu vhanga vhane vha funa u thetshelesa mazwifhi.’ ”

₂₀Zwino-ha, Muṋe wa zwoṱhe Muṋe washu u ri, “Phamba hedzo dza manditi dzine na fasha ngadzo vhathu unga zwiṋoni, ndi ḓo dzi ṱhukhula hafho zwanḓani zwaṋu, nda vhofholola havho vhane na linga u vha fasha unga zwiṋoni. ₂₁Miṅwenda yaṋu ya u khurumela ndi ḓo i kherukanya nda lamukisa vhathu vhanga zwanḓani zwaṋu; a vha tsha ḓo vha phukha dzine na dzi fasha. Zwenezwo ndi hone ni tshi ḓo zwi ḓivha uri ndi Nṋe Yahavee.

₂₂“Vhunga a fulufhedzeaho ane Nṋe nda si mu vhaise, inwi ni tshi vhaisa mbilu yawe nga mazwifhi aṋu, muvhi na mu ṱuṱuwedza uri a si laṱe vhuvhi hawe a dovha a tshila, ₂₃ndi zwone, a ni tsha ḓo vhona mabono a mazwifhi, a ni tsha ḓo dovha na ita zwa u bvumba. Ndi ṱoḓa u lamukisa vhathu vhanga zwanḓani zwaṋu, ndi hone ni tshi ḓo zwi ḓivha uri ndi Nṋe Yahavee.”