ESEKIELE 44

₁Uyo munna a nkhumisela khoroni ya vhubvaḓuvha ya nnḓa ya hukhethwa. Yo vha yo valwa. ₂Muṋe washu a mmbudza a ri, “Khoro hei i dzule yo valwa. Hu songo vha na ane a i vula kana a dzhena ngayo, vhunga Nṋe Yahavee Mudzimu wa Israele ndo dzhena ngayo. Zwenezwo i dzule yo valwa. ₃Hone muvhusi ndi ene e eṱhe ane a nga ḓi dzula muṋangoni henefho a ḽa Nṋe Yahavee ndi tshi mu vhona, hufha e muvhusi. Ene u dzhena nga muṋango wa vanḓa ḽa khoro ya vhukovhela a dovha a bva ngawo.”

₄Uyo munna a ntshimbidza nda fhira khoro ya devhula nda ya phanḓa ha thembele. Nda sedza, nda vhona vhugala ha Muṋe washu ho ḓadza thembele ya Muṋe washu, nda wa nga tshifhaṱuwo. ₅Muṋe washu a amba na nṋe a ri, “Iwe ṅwana wa muthu, ivha na nzhele, sedza zwavhuḓi, u thetshelese zwavhuḓi zwoṱhe zwine nda u ṱalutshedza; hezwi ndi zwone zwo vhekanyelwaho thembele ya Yahavee na milayo yayo yoṱhe. U sedzese uri vhathu vha no tendelwa u dzhena thembeleni ndi vhonnyi, na uri vha ḓo bva nga ngafhi. ₆U vhudze Vhaisraele vhadzia-u-ntshandukela u ri, ‘Muṋe wa zwoṱhe Yahavee u ri: Inwi vhathu vha Israele, zwiito zwaṋu zwi nengisaho a zwi athu lingana naa, ₇ni tshi phapha mbulu kha iṅwe na tendela vhatsinda vha songo fumbaho mbilu na mivhili vha tshi anzela u dzhena hukhethwa hanga, vha shata thembele yanga tshika musi ni tshi khou ṋekedza vhurotho hanga na mapfura na malofha, na vhofholola mulanga wanga nga zwiito zwaṋu zwi nengisaho. ₈A no ngo tsha ita pfanelo dzaṋu fhethu hukhethwa, no tou ruma vhatsinda u yo ita pfanelo dzaṋu hukhethwa hanga. ₉Nṋe Muṋe wa zwoṱhe Yahavee ndi ri: Na mutsinda na muthihi a songo fumbaho mbilu na muvhili a songo vhuya a dzhena hukhethwa hanga – ndi amba na mutsinda muthihi zwawe a no dzula na Vhaisraele.

₁₀“ ‘Vhalivi vhone vhe vha mpfuralela musi Vhaisraele vha tshi pambuwa vha ṱutshela kule na Nṋe vha tevhela midzimu yavho ya dzitshikha, vho fanela u hwala muhwalo wa zwivhi zwavho. ₁₁Vha ḓo vha vhashumi vha hukhethwa hanga, vha ḓo linda khoro dza thembele vha shumela thembele. Vha ḓo shidzha zwiṱhavhelo zwa u fhiswa na zwiṅwe zwa vhathu, vha shumela vhathu. ₁₂Vhunga vho vha vha tshi ḓi vha shumela phanḓa ha midzimu yavho ya tshika, u ralo ha vha u dzhenisa vhathu vha Israele vhuvhini, ndi zwone, Nṋe ndi angaladza tshanḓa tshanga uri ndi vha rwe – hu amba Nṋe Muṋe wa zwoṱhe Yahavee; vho fanela u hwala muhwalo wa vhuvhi havho. ₁₃A vha tsha ḓo dovha vha sendela tsini hanga vha ita mushumo wavho wa vhutshifhe kana vha kwama zwithu zwanga zwikhethwa na zwithu zwanga zwikhethwakhethwa; vho fanela u ambara ṱhoni dza mishumo yavho i nengisaho. ₁₄Ndi ḓo vha ita vhashumi vha thembeleni vha ite zwoṱhe zwine zwa fanela u itwa henefho.

₁₅“ ‘Huno vhotshifhe vha Vhalivi, vhana vha Tsadoko, vhe vha ntshumela fhethu hukhethwa musi vhaṅwe Vhaisraele vho mpfuralela, ndi vhone vhane vha ḓo sendela tsini hanga vha ntshumela; vha ḓo ima phanḓa hanga vha ṋekedza nduvho ya mapfura na malofha – hu amba Nṋe Muṋe wa zwoṱhe Yahavee. ₁₆Vhone vha ḓo dzhena fhethu hanga hukhethwa vha swika ḓafulani ḽanga vha ntshumela; vha ḓo ita mishumo yanga. ₁₇Vha vhuya vha dzhena nga khoro dza muṱa wa ngomu, vha fanela u ambara zwiambaro zwa lukhaha. Vha songo ambara dza vhukuse musi vha tshi ntshumela ngomu ha khoro dza muṱa wa ngomu na thembeleni. ₁₈Vha fanela u ambara miṅadzi ya lukhaha ṱhohoni, na zwiambaro zwa ngomu zwa lukhaha khunduni; vha songo vhofha bannda, vha sa ḓo bva biko. ₁₉Musi vha tshi bvela vhathuni muṱani wa nnḓa, vha fanela u bvula zwiambaro zwe vha vha vha tshi ntshumela vho zwi ambara, vha zwi sie rumuni dza fhethu hukhethwa, vha ambare zwiṅwe zwiambaro, vha sa ḓo vhangela vhathu khombo nga zwiambaro zwikhethwa.

₂₀“ ‘Vha songo palula ṱhoho dzavho, nahone vha songo litsha mavhudzi avho a tshi lapfesa; vha fanela u a tumelela lwo eḓanelaho. ₂₁Hu songo vha na tshifhe ane a nwa waini musi une a dzhena muṱani wa nga ngomu. ₂₂Vha songo vhinga tshilikadzi kana vhasadzi vho ṱalwaho, vha vhinge vhasidzana fhedzi vha lutsinga lwa Israele; hone naho zwo ralo vha nga ḓi vhinga tshilikadzi arali i tshilikadzi yo siwaho nga tshifhe.

₂₃“ ‘Vha funze vhathu vhanga uri zwikhethwa na zwi si zwikhethwa ndi zwifhio, vha vha funze u ṱalukanya zwo kunaho na zwi songo kunaho. ₂₄Vha vhe vhahaṱuli musi vhathu vho luṱana, vha haṱule vha tshi tevhedza milayo yanga; vha tevhedze milayo yanga na ndaela dzanga vhuṱamboni hoṱhe, Sabatha dzanga vha dzi ite khethwa.

₂₅“ ‘Vha songo sendela tsini na mufu, vha sa ḓo kumala, hune vha tendelwa u ḓikumadza ndi musi mufu e khotsi kana mme kana ṅwana wavho kana mukomana kana murathu kana khaladzi a sa athu vhingwa. ₂₆Musi muṅwe wavho o no kumululwa, hu range u fhela maḓuvha maṱanu na mavhili; ₂₇ndi hone musi une a dzhena fhethu hukhethwa, a tshi dzhena muṱani wa ngomu u ita pfanelo dzawe fhethu hukhethwa, u fanela u ṋekedza nduvho ya tshipfumelo – hu amba Nṋe Muṋe wa zwoṱhe Yahavee. ₂₈A vha nga vhi na shango; Nṋe muṋe ndi ḓo vha ifa ḽavho. Ni songo vha ṋea shango kha ḽa Israele; Nṋe muṋe ndi ḓo vha mukovhe wavho. ₂₉Zwiḽiwa zwavho zwi ḓo vha nduvho ya thoro na tshiṱhavhelo tsha tshipfumelo na tshiṱhavhelo tsha mulifho. Zwoṱhe kha ḽa Israele zwo ṋekedzwaho Nṋe zwi ḓo vha zwavho. ₃₀Mitshelo yaṋu yoṱhe ya zwiranzhe i fhiraho yoṱhe, na tshakha dzoṱhe dza nduvho na zwoṱhe zwine na zwi ṋekedza, zwi ḓo vha zwa vhotshifhe, na mikonde i fhiraho yoṱhe ni i ṋee vhotshifhe, uri muṱani waṋu hu vhe na mashudu. ₃₁Vhotshifhe vha songo vhuya vha ḽa nyamafu, kana phukha yo pondiwaho nga zwivhanda zwa ḓaka kana tshiṋoni tsho vhulawaho nga iṅwe phukha.