ESEKIELE 47

₁Uyo munna a dovha a nkhumisela muṋangoni wa thembele, nda vhona tshisima tsha maḓi a tshi bva nga fhasi ha tshiukhuvha tsha thembele a tshi ela a tshi ya vhubvaḓuvha, vhunga thembele yo vha yo lavhelesa vhubvaḓuvha. Maḓi o vha a tshi khou ela a tshi bva sia ḽa tshauḽa ḽa thembele, thungo ya tshipembe ya aḽiṱari. ₂A mmvisela nnḓa nga khoro ya devhula a ntshimbidza u mona hoṱhe nnḓa u vhuya u swika khoroni ya vhubvaḓuvha ya nnḓa, nda wana maḓi a tshi khou ela a tshi bva hone, thungo ya tshanḓa tshauḽa tsha khoro. ₃Uyo munna a livha vhubvaḓuvha o fara thambo yawe ya u ela ngayo, a ela maga a 1 000 u bva henefho, a konou nngwedza mulambo; maḓi o vha a tshi guma nga maṱo a milenzhe. ₄A ela maṅwe maga a 1 000 u bva henefho, a dovha a nngwedza mulambo, nda wana maḓi a tshi guma nga magona anga. A ela maṅwe maga a 1 000 u bva henefho, a dovha a nngwedza mulambo, nda wana maḓi a tshi guma nga khundu dzanga. ₅A ela maṅwe maga a 1 000 u bva henefho, zwino wo vha wo no vha mulambo une nda nga si kone u wela, uyo mulambo wo vha wo no hula, wo no vha na maḓi o tsaho, wo vha wo no vha mulambo une muthu a si kone u u wela.

₆Ndi hone uyo munna a tshi ri, “Iwe ṅwana wa muthu, u khou zwi vhona?” A mphirisela phanḓa, a kona u ntshimbidza a nkhumisela khunzikhunzini ya mulambo. ₇Musi ndi tshi swika henefho nda vhona miri minzhi khunzikhunzini ino na iḽa ya mulambo. ₈Uyo munna a ri, “Maḓi haya a ela a tshi ya vhubvaḓuvha a tshi tsela Govhani ḽa Jorodani, a swika Lwanzheni lwa Muṋo, a tshi ela a tshi dzhena lwanzheni a ḓifhisa maḓi alwo. ₉Hoṱhe hune uyo mulambo wa ela, hu ḓo dzula zwisikwa zwi tshilaho zwa tshakha dzoṱhe zwi no tshatshama ngomu hawo. Khovhe dzi ḓo anda ngauri hoṱhe hune ayo maḓi a ela a ḓisa mutakalo, hoṱhe hune uyo mulambo wa ela hu ḓo tshatshama phukha dza tshakha-tshakha.

₁₀“Hu ḓo vha na vharei vha khovhe khunzikhunzini. Mambule a u fasha khovhe a ḓo ṱharamudzwa u bva Engedi u swika Enigilaimi. Khovhe dzi ḓo vha dza tshakha dzo fhambanaho, dza dovha dza anda unga khovhe dza Lwanzhe lwa Phandamashango. ₁₁Hone maḓi a maṱafa na lunwenwe a nga si ḓifhiswe, a ḓo vha e fhethu hune ha wanala muṋo. ₁₂U tsa na mulambo, khunzikhunzini ino na iḽa, hu ḓo mela miri ya mitshelo ya tshakha dzoṱhe, na maṱari ayo ha nga puti, a i nga fhidzi u aṋwa mitshelo; i ḓo aṋwa mitshelo miswa ṅwedzi muṅwe na muṅwe, ngauri maḓi ayo a bva thembeleni. Mitshelo yayo i ḓo ḽiwa, maṱari ayo a alafha vhathu.”

₁₃Muṋe wa zwoṱhe Muṋe washu u ri, “Mikano ine matsinde a Israele a 12 a ḓo kovhekana mashango ngayo ngeino. Josefa u ḓo wana mikovhe mivhili. ₁₄Noṱhe ni kovhekane nga u eḓana vhunga ndo anela vhokhotsi aṋu uri ndi ḓo vha ṋea shango heḽino ḽine zwino ḽa vha ifa ḽaṋu. ₁₅Mukano wa shango ngouno. Thungo ya devhula u thoma Lwanzheni lwa Phandamashango wa fhira nga Hetheloni, Tsedada, Hamathi, ₁₆Berothai, Sibiraimi vhukati ha shango ḽa Damasko na ḽa Hamathi, u swika na Hasere Hathikhoni mukanoni wa Haurani. ₁₇Mukano u ḓo thoma Lwanzheni lwa Phandamashango wa swika Hasere Enoni, u tshi tshimbila na mukano wa Damasko u ya devhula hawo na mukano wa Hamathi thungo ya devhula. Hoyo u ḓo vha mukano wa thungo ya devhula. ₁₈Thungo ya vhubvaḓuvha mulambo wa Jorodani u ḓo vha wone mukano vhukati ha Haurani na Damasko, na vhukati ha Giliadi na shango ḽa Israele, u tsela Lwanzheni lwa Muṋo u vhuya u swika Thamara. Hoyo u ḓo vha wone mukano wa thungo ya vhubvaḓuvha. ₁₉Thungo ya tshipembe, u bva Thamara u livha tshipembe u ya maḓini a Miriba na Kadeshe u ya Mulamboni wa Egipita na Lwanzheni lwa Phandamashango. Uyo u ḓo vha wone mukano wa thungo ya tshipembe. ₂₀Thungo ya vhukovhela Lwanzhe lwa Phandamashango lu ḓo vha lwone mukano u vhuya u swika u livhana na Phara ya Hamathi. Uyo u ḓo vha wone mukano wa thungo ya vhukovhela. ₂₁Ni kovhekane iḽo shango, hu kovhekane matsinde a Israele. ₂₂Ni kovhekane ḽi vhe ifa ḽaṋu na ḽa vhatsinda vhe na dzula navho vha vhuya vha beba vhana, vhunga no fanela u vha fara sa vhadzulapo vha Israele. Na vhone vha wane mikovhe na inwi ḽi vhe ifa ḽavho, vha kovhekane na matsinde a Israele. ₂₃Ni ṋee mutsinda ifa ḽawe henefho kha tsinde ḽa vhathu vhane a dzula navho – hu amba Nṋe Muṋe wa zwoṱhe Yahavee.”