HOSIA 1

₁Heḽi ndi ipfi ḽe Muṋe washu a amba na Hosia ṅwana wa Bieri musi hu tshi vhusa Uzia na Jothamu na Ahasi na Hiskia mahosi a Juda, na Jerobiamu ṅwana wa Juasi khosi ya Israele.

₂Musi Muṋe washu a tshi thoma u amba nga mulomo wa Hosia, Muṋe washu a mu vhudza a ri, “Ṱuwa u yo ḓivhingela musadzi wa phombwe; u ḓo u bebela vhana nga vhupombwe, ngauri vhukuma shango ḽo ita vhupombwe nga u furalela Nṋe Yahavee.”

₃Ndi hone a tshi yo vhinga Gomere ṅwananyana wa Dibilaimi; Gomere a vha muthu wa thovhela; a mu bebela ṅwana wa mutukana. ₄Muṋe washu a amba na Hosia a ri, “Mu rine dzina ḽa Jesriele, ngauri ndi ḓo ṱuwa ndi tshi lifhedza vha muṱa wa Jehu zwe vha vhulaha vhathu muḓini wa Jesriele, nahone ndi ḓo fhelisa muvhuso wa Israele. ₅Musi wonoyo ndi ḓo vunḓa vhura ha Israele govhani ḽa Jesriele.”

₆Gomere a dovha a vhifha muvhilini a beba ṅwana wa musidzana. Muṋe washu a amba na Hosia a ri, “Mu rine dzina ḽi no pfi Thikhathutsheli, ngauri a thi tsha ḓo khathutshela vhathu vha Israele nda vha hangwela. ₇Hone vhathu vha Juda ndi ḓo vha khathutshela nda vha tshidza; a thi nga vha tshidzi nga vhura na pfumo kana nndwa kana dzibere na vhanameli vha dzibere, vha ḓo tshidzwa nga Nṋe Yahavee Mudzimu wavho.”

₈Musi Gomere o no lumula Thikhathutsheli a dovha a vha na muṅwe ṅwana wa mutukana. ₉Zwenezwo Muṋe washu a ri, “Mu rine dzina ḽi no pfi Anivhanga, ngauri a ni tshee vhathu vhanga, na Nṋe thi tshee AREHONE waṋu.

₁₀“Naho zwo ralo Vhaisraele vha ḓo anda unga muṱavha wa lwanzhe u sa elei, u sa vhalei. Fhaḽa he ha pfi, ‘A ni vhathu vhanga’, vha vho ḓo pfi vhana vha Mudzimu a tshilaho. ₁₁Vhathu vha Juda na vhathu vha Israele vha ḓo dovha vha kuvhangana vha tshi bva thungo dzoṱhe dza shango, vha vha vhathihi, vha nanga murangaphanḓa muthihi, ngauri ḓuvha ḽa Jesriele ḽi ḓo vha ḽihulu, ḽa musi Mudzimu a tshi zwala.