HOSIA 4

₁Inwi Vhaisraele, ipfani ipfi ḽa Muṋe washu, ngauri Muṋe washu u khou ni vhea mulandu, inwi ni dzulaho shangoni. U ri, “Vhathu a vha fulufhedzei, a vha na lufuno, a vha ḓivhi Mudzimu shangoni. ₂Vha a teketelana, vha a zwifhelana, vha a vhulahana, vha a tswa, vha ita vhupombwe; vhutshinyi ho no tou kalula, vha shulula malofha vha tshi ya. ₃Ndi zwine shango ḽa oma, zwoṱhe zwi dzulaho khaḽo zwi a ṋoka, phukha dza ḓaka na zwiṋoni na dzone khovhe, zwi khou fhela.”

₄“Hone hu songo vha na ane a sokou vhea muṅwe mulandu, ni songo sokou pomoka muthu, hone Nṋe ndi vho pomoka iwe tshifhe. ₅U ḓo khukhulwa masiari tshivhangalala, wa fa, u ḓi nga vhaporofita vha tshi ḓo khukhulwa vhusiku. Ndi zwine nda ḓo lozwa mme au, ₆vhathu vhanga vha lovha nga u sa nnḓivha. No nndandula, ndi zwone, na Nṋe ndo ni landula, a ni tsha ḓo vha vhotshifhe vhanga; a ni tsha londa pfunzo ya Mudzimu waṋu, ndi zwone, na Nṋe ndi nga si tsha londa vhana vhaṋu. ₇Vhotshifhe vho ri vha tshi anda vha anza u nkhakhela; ndi ḓo ita uri vha shone vha si huliswe. ₈Vha ri vhathu vhanga nga vha tshinye, vhotshifhe vha kone u ḽa zwipfumelo, vha sevha nga vhuvhi havho vha tou ḓiphiṋa. ₉Ndi zwone, zwa vhotshifhe zwi ḓo nga zwa vhathu, vhoṱhe ndi ḓo vha pfisa vhuṱungu nga mulandu wa mishumo yavho, nda vha lifhedza zwe vha ita. ₁₀Vha ḓo ḽa vha si fure; vha ḓo ita vhupombwe ha u luvha midzimu ya zwa mbebo hone vha si vhe na vhana, nge vha furalela Nṋe Yahavee vha ḓikumedza ₁₁vhupombwe na waini yo vhilaho na ya tuvhu zwine zwa xedza ṱhalukanyo, ₁₂havha vhathu vhanga. Vha vho vhudzisa mudzimu wa thanda vha fhindulwa nga lutanda. Muya wa vhupombwe u xedza vhotshifhe vha shandukela Mudzimu wavho vha ita vhupombwe. ₁₃Vha ṱolou ṋekedza zwiṱhavhelo miṱumbani ya dzithavha, vha fhisa zwioro mivhunduni fhasi ha miri ya zwimvingimvingi hune ha vha na murunzi wa u takadza. Ndi zwine vhananyana vhaṋu vha vha zwifevhi, vhasadzi vha vhana vhaṋu vha ita vhupombwe. ₁₄Vhananyana vhaṋu vha tshi vha zwifevhi a thi nga vha rwi, na vhasadzi vha vhana vhaṋu vha tshi ita vhupombwe a thi nga vha rwi, hufha vhotshifhe vhone vhaṋe vha tshi ṋengela ḓakani na dziphombwe, vha ṋekedza zwiṱhavhelo vhe na phombwe dza thembele. Zwino vha si na ṱhalukanyo vha nga kundwa ngani u wa-vho?

₁₅“Inwi Vhaisraele, ni tshi ita vhupombwe, Juda a songo ḓiovhela-vho mulandu. Vha songo yo luvha Giligala, vha songo gonya Bethavene. Vha songo ana henefho vha ri, ‘Yahavee ndi ṱhanzi!’ ₁₆Vhaisraele vha na tshipimbi, vha nga tholehadzi i sa tendi u paniwa. Zwino ndi ḓo i litsha ya nga ngwana i fulaho ḓakani hu si na luhura. ₁₇Efraimi o no tou ḓiṋekedza midzimu ya zwifanyiso; mu litsheni! ₁₈Musi vho fhedza waini vha yo ita vhupombwe vha dovha, vhavhusi vhavho vha funesa nḓila dzi shonisaho. ₁₉Ndi zwone, tshiḓumbumukwe tshi ḓo vha swielela kule, zwiṱhavhelo zwavho zwi ḓo vha ḓisela ṱhoni.”