YESAYA 7

₁Musi khosi Ahasi ṅwana wa Jothamu, ṅwana wa Uzia, a tshi vhusa Juda, ha vuwa nndwa. Retsini khosi ya Aramu, na Pheka ṅwana wa Remalia, khosi ya Israele, vha dia Jerusalema, hone vha si kone u u thuba. ₂Musi fhungo ḽi tshi swika ha khosi ya Juda ḽa uri mmbi dza Aramu dzo no swika Efraimi, Ahasi na vhathu vhawe vha dzhenwa nga nyofho, vha tetemela unga miri i tshi dzinginyiswa nga muya.

₃Ndi hone Muṋe washu a tshi vhudza Yesaya a ri, “Takuwa na ṅwana wau wa mutuka Sheara Jashubu (Tsaleladzavhuya), ni yo ṱangana na khosi Ahasi. U ḓo mu wana hune ha guma mugero u no ḓisa maḓi a tshi bva ishani ḽa nṱha, henefho hune ha shuma vhaluki vha masila. ₄U mu vhudze uri a vhe na nzhele, a dzike, a songo ofha, a songo kulea nungo; mbiti dza khosi Retsini na Vhaaramu vhawe na dza ṅwana wa Remalia a dzi ofhisi, dzi nga vhutsi vhu dubaho ha zwikuni zwa muṱu na muṱango. ₅Aramu khathihi na Efraimi na ṅwana wa Remalia vho u langana, vha ṱoḓa u u dia. ₆Vha ṱoḓa u dia Juda, vha shushedza vhathu, vha thuba shango, vha konou dzhia ṅwana wa Tabiele vha mu vhumba khosi. ₇Huno Nṋe Yahavee Muṋe wa zwoṱhe ndi ḓivhadza uri zwo raloho zwi nga si itee. ₈Ndi ngani? Ndi uri Aramu a ḽi fhiri Damasko musanda waḽo, Damasko a u fhiri Retsini khosi yawo. Hu ḓo ri hu sa athu fhira miṅwaha ya 65, Efraimi a vha o no phusukanywa, a si tshee lushaka. ₉Ḽa Efraimi a ḽi fhiri Samaria musanda waḽo, Samaria a u fhiri ṅwana wa Remalia khosi yawo. Inwi tshaṋu hu vhe u fulufhela Nṋe; na sa ḓitika nga Nṋe a ni na mutiki.”

₁₀Muṋe washu a dovha a amba na Ahasi a ri, ₁₁“Humbela Nṋe Yahavee Mudzimu wau uri ndi u sumbedze tshiga: tshi nga ḓi vha tshi tshi bva fhasi vhudzulavhafu kana tshi tshi bva ṱaḓulu.”

₁₂Ahasi a fhindula a ri, “A thi nga humbeli u sumbedzwa tshiga; a thi funi u linga Muṋe washu.”

₁₃Yesaya a fhindula a ri, “Zwino inwi vha nnḓu ya Dafita, thetshelesani! Ni tshi linga vhathu ni tshi ṱoḓa u vhona arali vha sa fheli mbilu, a zwo ngo eḓana naa? Zwino ni vho ṱoḓa u linga na Mudzimu wanga naa? ₁₄Zwino Muṋe wa zwoṱhe nga dzawe u ḓo ni sumbedza tshiga: Musidzana ndi muthu wa thovhela; u ḓo beba ṅwana wa mutuka, a mu rina dzina ḽi no pfi Imanuele (Mudzimu u na riṋe). ₁₅U ḓo ḽa mukhaha na ṋotshi, nga u ḓala ha zwiḽiwa, u swika o no thanya, a tshi vho kona u ḓihumbulela, a tshi vho kona u landula zwo vhifhaho a nanga zwi re zwone. ₁₆Hu ḓo ri ṅwana uyo a sa athu thanya, mashango a mahosi ayo mavhili ane wa a ofha a vha a si tshee na muthu. ₁₇Muṋe washu u ḓo ḓisa maḓuvha a zwi konḓaho, zwi sa athu vhuya zwa vha hone tshee muvhuso wa Efraimi wa fhandekana na wa Juda, zwi ḓo wela iwe na vhathu vhau na nnḓu ya musanda – ú ḓo ḓisa khosi ya Ashuru.”

₁₈Musi wonoyo Muṋe washu u ḓo lidza muludzi a vhidza Vhaegipita, vha ḓa vha tshi nga thunzi dzi tshi bva milambwanani ya kule ya mulambo wa Nile, a vhidza na Vhaashuru, vha ḓa vha tshi nga ṋotshi vha tshi bva shangoni ḽavho. ₁₉Vha ḓo phapha dzipharani na mapakoni na zwiṱakani zwoṱhe zwa mipfa na pfuloni yoṱhe. ₂₀Musi wonoyo Muṋe wa zwoṱhe u ḓo rendela muvheuli a no bva seli ha mulambo wa Yufuratha – khosi ya Ashuru – a ni vheula ndebvu na mavhudzi na mahaha.

₂₁Musi wonoyo mufuwi u ḓo sala na ṱholana nthihi fhedzi na phambala mbili. ₂₂Nangwe zwo ralo u ḓo hama mukhaha u si na vhukono a ḽa. Ee, vho salaho shangoni vha si gathi vha ḓo ḽa makheṱhe na mutoli.

₂₃Musi wonoyo masimu a minḓirivhe a re na minḓirivhe ya tshigidi ine ya rengwa nga maseṱha a tshigidi a siliva, a ḓo mela luanakha na mitshutshungu. ₂₄Vhathu vha ḓo bva vha yo zwima hone vho fara vhura na misevhe; shango ḽoṱhe ḽi ḓo vha ḽo ḓala luanakha na mitshutshungu. ₂₅Mivhundu yoṱhe ye ya vha i tshi liṅwa mavhele i ḓo mela luanakha na mitshutshungu ha si tsha ya muthu; hu ḓo vha pfulo ya kholomo na nngu.