JEREMIA 36

₁Nga ṅwaha wa vhuṋa wa muvhuso wa Jehoyakimu ṅwana wa Josiasi khosi ya Juda, ho ḓa ipfi ha Jeremia ḽi tshi bva ha Muṋe washu ḽa ri, ₂“Dzhia bugu u ṅwale maipfi oṱhe e nda u vhudza ndi tshi amba Israele na Juda na tshakha dziṅwe dzoṱhe tshee nda thoma u amba na iwe misi ya Josiasi u swika zwino. ₃Khamusi vhathu vha Juda vha ḓo ri vha tshi pfa khombo dzoṱhe dze nda dzudzanya uri dzi vha wele, muṅwe na muṅwe wavho a litsha nḓila yawe mmbi, nda ḓo konou vha hangwela milandu yavho na vhutshinyi havho.”

₄Ndi hone Jeremia a tshi vhidza Barukhu ṅwana wa Neria, Jeremia a amba maipfi oṱhe e a vhudzwa nga Muṋe washu, Barukhu a konou a ṅwala kha yeneyo bugu. ₅Zwino Jeremia a vhudza Barukhu a ri, “Nṋe ndo dzivhiswa; a thi koni u ya thembeleni ya Muṋe washu. ₆Zwenezwo inwi ni ye nḓuni ya Muṋe washu nga ḓuvha ḽa u ḓidzima ni vhalele vhathu maipfi a Muṋe washu kha bugu iyi, e na a ṅwala nṋe ndi tshi khou amba. Ni a vhalele na vhathu vhoṱhe vha Juda vhane vha dzhena vha tshi bva miḓini ya havho. ₇Khamusi vha ḓo luvhelela Muṋe washu, muṅwe na muṅwe a litsha nḓila dzawe mmbi, ngauri mbiti na ṱhamu dze Muṋe washu a ri dzi ḓo wela vhathu havha ndi khulu.”

₈Barukhu ṅwana wa Neria o ita zwoṱhe zwe muporofita Jeremia a mu vhudza uri a ite; o ya thembeleni ya Muṋe washu a vhala maipfi a Muṋe washu e a vha o ṅwalwa buguni.

₉Nga ṅwedzi wa vhuṱanu na vhuṋa wa ṅwaha wa vhuṱanu wa Jehoyakimu ṅwana wa Josiasi khosi ya Juda, ha ḓivhadzwa tshifhinga tsha u ḓidzima phanḓa ha Muṋe washu hu tshi vhudzwa vhathu vhoṱhe vha re Jerusalema na vhane vha bva miḓini ya Juda. ₁₀Barukhu a vhalela vhathu vhoṱhe maipfi a Jeremia o ṅwalwaho buguni vhe thembeleni ya Muṋe washu ene e lufherani lwa Gemaria ṅwana wa Shafani muṅwaleli, lwe lwa vha lu muṱani wa nṱha muṋangoni wa Khoro Ntswa ya thembele.

₁₁Musi Mikaya ṅwana wa Gemaria, ṅwana wa Shafani, a tshi pfa maipfi oṱhe a Muṋe washu o ṅwalwaho kha bugu a tshi vhalwa, ₁₂a tsela lufherani lwa muṅwaleli pfamoni ya musanda. Henefho ho vha ho kuvhangana vhahulwane vhoṱhe: Elishama muṅwaleli na Delaya ṅwana wa Shemaya na Elinathani ṅwana wa Akhiboro na Gemaria ṅwana wa Shafani na Tsedekia ṅwana wa Hanania na vhaṅwe vhahulwane vhoṱhe.

₁₃Musi Mikaya o no vha vhudza zwoṱhe zwo ṅwalwaho buguni zwe a pfa Barukhu a tshi vhalela vhathu, ₁₄vhahulwane vhoṱhe vha ruma Jehudi ṅwana wa Nethania, ṅwana wa Shelemia ṅwana wa Khusi uri a vhudze Barukhu a ri, “Ḓisani bugu ye na vhalela vhathu, na inwi ni ḓe.” Zwenezwo Barukhu ṅwana wa Neria a ya khavho na bugu o i fara nga tshanḓa. ₁₅Vha amba nae vha ri, “Edzonu dzula ni ri vhalele nandi!”

Ndi hone Barukhu a tshi vha vhalela. ₁₆Musi vha tshi pfa maipfi ayo oṱhe, vha ofha vha lavhelesana vha amba na Barukhu vha ri, “Ro fanela u ḓivhadza vhamusanda maipfi haya oṱhe.” ₁₇Vha vhudzisa Barukhu vha ri, “Edzonu ri vhudza, zwo ḓa hani uri ni vhuye ni ṅwale zwoṱhe hezwi? Zwo ambiwa nga Jeremia?”

₁₈Barukhu a fhindula a ri, “Ee, ndi ene o mmbudzaho maipfi oṱhe haya, nṋe nda a ṅwala buguni nga ennge.”

₁₉Ndi hone vhahulwane vha tshi vhudza Barukhu vha ri, “Iwe na Jeremia iyani u dzumbama. Hu songo vha na muṅwe ane a ḓivha hune na vha hone.”

₂₀Ndi hone vha tshi vhea iḽa bugu lufherani lwa Elishama muṅwaleli, vha ya ha khosi muṱani wa pfamo ya musanda vha mu vhudza zwoṱhe. ₂₁Khosi ya ruma Jehudi uri a yo dzhia iyo bugu, Jehudi a yo i dzhia lufherani lwa Elishama muṅwaleli, a i vhalela khosi na vhahulwane vhoṱhe vho ima henefho tsini hawe. ₂₂Ho vha hu nga ṅwedzi wa vhuṱanu na vhuṋa, khosi yo vha yo dzula pfamoni ya vhuriha, i tshi khou ora mulilo we vha vha vho vhasa ndongoni ya mulilo henefho phanḓa hawe. ₂₃Jehudi o vha tshi ri u vhala zwipiḓa zwiraru kana zwiṋa zwa iyo bugu, khosi ya zwi tshea nga kupanga ya zwi posa henefho ndongoni ya mulilo, bugu yoṱhe ya vhuya ya fhiswa muliloni. ₂₄Khosi na vhaḓinḓa vhawe vhoṱhe vhe vha pfa maipfi ayo oṱhe a vho ngo vhuya vha tshenuwa, a vho ngo vhuya vha kherukanya nguvho dzavho. ₂₅Naho Elinathani na Delaya na Gemaria vho luvhelela khosi uri a songo fhisa iyo bugu, ho ngo vhuya a vha thetshelesa, ₂₆ene o sokou vhudza Jeramiele, ṅwana wa khosi, na Seraya ṅwana wa Azariele na Shelemia ṅwana wa Abidiele uri vha fare Barukhu muṅwali na Jeremia muporofita. Hone Muṋe washu o vha o vha dzumba.

₂₇Musi khosi yo no fhisa bugu i re na maipfi o ṅwalwaho nga Barukhu a tshi tou vhudzwa nga Jeremia, ipfi ḽa Muṋe washu ḽa ḓa ha Jeremia ḽa ri, ₂₈“Dzhia iṅwe bugu u ṅwale maipfi aḽa oṱhe e a ṅwalwa kha bugu iḽa ya u thoma, ye Jehoyakimu khosi ya Juda a fhisa. ₂₉U vhudze Jehoyakimu khosi ya Juda u ri, ‘Yahavee u ri: Wo fhisa iḽa bugu wa ri: Ndi mini wo ṅwala khayo uri vhukumakuma khosi ya Babele i ḓo ḓa ya phusukanya shango ḽino ya lozwa vhathu na zwifuwo? ₃₀Zwenezwo Yahavee a tshi amba Jehoyakimu khosi ya Juda u ri: Ha nga vhi na a no ḓo sala o dzula kha khuluṋoni ya Dafita; tshitumbu tshawe tshi ḓo poswa nnḓa tsha swa nga ḓuvha masiari, vhusiku tsha welwa nga mahaḓa. ₃₁Ndi ḓo pfisa ene vhuṱungu na vhana vhawe na vhaḓinḓa vhawe nga mulandu wa vhuvhi havho: vhone na vha no dzula Jerusalema na vhathu vha Juda ndi ḓo vha ḓisela khombo dzoṱhe dze nda bula uri dzi ḓo vha wela, nge vha si thetshelese.’ ”

₃₂Ndi hone Jeremia a tshi dzhia iṅwe bugu a i ṋea muṅwaleli wawe Barukhu ṅwana wa Neria, Jeremia a amba, Barukhu a ṅwala khayo maipfi oṱhe a iḽa bugu ye Jehoyakimu khosi ya Juda a i fhisa muliloni. Ha engedzwa maṅwe maipfi manzhi ane a fana nao.