JOHANISI 15

₁“Ndi Nṋe munḓirivhe wavhuḓi, muṋe wa tsimu ndi Khotsi anga. ₂Lutavhi luṅwe na luṅwe lu re kha Nṋe lu sa aṋwi mitshelo u a lu tumulela kule; lu aṋwaho lwone u tou lu khwathela uri lu anze mitshelo. ₃Inwi no no ḓi khwathelwa nga maipfi e nda ni vhudza. ₄Dzulani kha Nṋe, na Nṋe ndi ḓo dzula kha inwi. Vhunga lutavhi lu sa koni u aṋwa mitshelo arali lu songo ṱumekana na mme alwo, na inwi ni nga si aṋwe mitshelo arali na sa dzula kha Nṋe.

₅“Munḓirivhe ndi Nṋe, inwi ni matavhi. Ane a dzula kha Nṋe, Nṋe nda dzula khae ndi ene ane a aṋwa mitshelo minzhi, ngauri ni si na Nṋe a ni koni u ita tshithu. ₆A sa dzuli kha Nṋe u a laṱwa kule a oma sa lutavhi lwo tumulwaho; huno thavhi dzo raloho dzi a kuvhanganywa dza kudzwa muliloni dza fhiswa. ₇Arali ni tshi dzula kha Nṋe, na dzula ni tshi elekanya maipfi anga, ni ḓo humbela tshine na funa na tshi ṋewa. ₈Vhugala ha Khotsi anga vhu vhonala musi inwi ni tshi aṋwa mitshelo minzhi, nga u ralo na vha vhafunziwa vhanga. ₉Nṋe ndi ni funa unga Khotsi anga a tshi mpfuna; lusani uri ndi ḓi dzula ndi tshi ni funa. ₁₀Arali ni tshi tevhedza ndaela dzanga ndi ḓo ḓi dzula ndi tshi ni funa, zwa nga Nṋe ndo tevhedza ndaela dza Khotsi anga, a ḓi dzula a tshi mpfuna.

₁₁“Ndo ni vhudza hezwo uri dakalo ḽine Nṋe nda vha naḽo na inwi ni vhe naḽo uri ni vhe na dakalo ḽo khunyelelaho. ₁₂Ndaela yanga khei: funanani unga Nṋe ndo ni funa.

₁₃“A hu na lufuno lune lwa fhira lwa muthu ane a fela khonani dzawe. ₁₄Khonani dzanga ndi inwi arali ni tshi ita zwine nda ni laya. ₁₅A thi tsha tou ri ni dziphuli ngauri phuli a i vhudzwi zwine muṋe wayo a ita. Nṋe-ha ndi vho tou ri ni dzikhonani, ngauri ndo ni vhudza zwoṱhe zwe nda pfa nga Khotsi anga. ₁₆A si inwi vhe na nanga Nṋe; ndi Nṋe ndo nangaho inwi nda ni ta uri ni yo aṋwa mitshelo minzhi, mitshelo i sa kuvhi, Khotsi a ḓo konou ni fha tshiṅwe na tshiṅwe tshine na humbela nga dzina ḽanga. ₁₇Tshine nda ni laya asitshi: funanani!

₁₈“Arali shango ḽi tshi ni vhenga ni ḓivhe uri ḽo thoma nga u vhenga Nṋe. ₁₉Arali no vha ni vha shango ndi musi shango ḽi tshi ḓo ni funa, ngauri no vha ni tshi ḓo vha ni vhaḽo. Zwino a ni tshee vha shango ngauri Nṋe ndo ni nanga khaḽo; ndi zwine shango ḽa ni vhenga. ₂₀Ni songo hangwa zwiḽa zwe nda ni vhudza nda ri, ‘Phuli a i fhiri muṋe wayo.’ Vhunga Nṋe vho ntovhola, na inwi vha ḓo ni tovhola; arali vho tevhedza pfunzo yanga, na yaṋu vha ḓo i tevhedza. ₂₁Huno zwine vha ḓo ni ita, vha ḓo ni ita nge na vha vhanga, ngauri we a nthuma a vha mu ḓivhi. ₂₂Arali ndo vha ndi songo ḓa nda amba ndi musi vha si na mulandu; fhedzi zwino a vha tshee na vhutinyelo. ₂₃Ane a vhenga Nṋe u vhenga na Khotsi anga. ₂₄Vho vha vha tshi ḓo vha vha si na mulandu ngavhe ndi si ḓe khavho nda shuma mishumo i sa athu shuṅwa nga muṅwe muthu; zwino zwe nda shuma vho zwi vhona; naho zwo ralo, hu Nṋe, hu Khotsi anga, vha ḓi ri vhenga. ₂₅Hone zwi tshi ralo hu khou khunyelela zwiḽa zwo ṅwaliwaho Mulayoni wavho zwa u ri, ‘Vho sokou mmbenga ndi si na tshe nda tshinya.’

₂₆“Mutiki u ḓo ḓa – ndi amba Muya Muḓivhadzangoho, Ene a bvaho ha Mudzimu Khotsi. Ndi ḓo mu ruma kha inwi a tshi bva ha Khotsi; Ene Muya u ḓo nṱanzilela. ₂₇Na inwi ni ḓo nṱanzilela ngauri no ḓi vha na Nṋe u tou bva henengei mathomoni.