JOHANISI 6

₁Ngavhuya Yesu a wetshela seli ha Dzivha ḽa Galelia, ḽine nga ḽiṅwe dzina ḽa pfi Dzivha ḽa Tiberiasi. ₂A tevhelwa nga gogo ḽihulu vhunga vho vha vha tshi vhona maḓembe awe a tshi fhodza vhalwadze. ₃Yesu a gonya thavha a dzula fhasi na vhafunziwa vhawe. ₄Nga itsho tshifhinga vhuṱambo ha Majuda ha Paseka ho vha ho no vha tsini. ₅Yesu a tshi sedza a vhona hu tshi khou ḓa gogo ḽihulu, a amba na Filipi a ri, “Nṋa zwiḽiwa ri nga zwi rengafhi zwine ra nga fha havha vhathu vha ḽa?” ₆A tshi ralo ho vha hu u ṱoḓa u tou pfa uri Filipi u ḓo ri mini, ngauri Ene o vha o no ḓivha zwine a ḓo ita. ₇Filipi a fhindula a ri, “Naho hu nga rengwa vhurotho ha maseṱha a no fhira 200, muṅwe na muṅwe a nga tou wana kugaku vha ḓi ṱahela.” ₈Muṅwe mufunziwa wawe a no pfi Andrisi, murathu wa Simoni Pitrosi, a ri, ₉“Hu na muṅwe mutukana hafha a re na mikonde miṱanu ya vhurotho ha baḽi na khovhe mbili dza u sevha. Zwino zwenezwo zwi nga vhuya zwa ita mini kha vhathu vhangafhangafha?”

₁₀Yesu a ri, “Vhudzani vhathu vha dzule fhasi.” (Ndi uri ho vha hu na tshiṱanzhela tshinzhi.) Nangoho vhathu vha dzula fhasi. Vhanna vho vha vha tshi nga swika 5 000. ₁₁Yesu a dzhia vhurotho, a livhuha Mudzimu, a kovhela avho vhathu vho dzulaho fhasi. Na dziḽa khovhe a ḓi dzi ita nga u ralo, vhathu vhoṱhe vha ḽa vha fura. ₁₂Musi vhoṱhe vho no fura, Yesu a vhudza vhafunziwa vhawe a ri, “Dobelani zwipeḓu zwo salaho, uri hu si tambiswe tshithu.” ₁₃Vha tshi dobela vha ḓadza mifaro ya 12 nga zwe zwa sala kha iḽa mikonde miṱanu ya bali vhathu vho no ḽa. ₁₄Vhathu vha tshi vhona maḓembe e Yesu a ita vha thoma u ri, “Vhukuma hoyu ndi onouḽa muporofita we a pfi u ḓo ḓa shangoni.” ₁₅Yesu nga u ḓivha uri vhathu vha vho ṱoḓa u mu dzhia vha mu vhumba khosi nga khombekhombe, a dovha a humela thavhani e eṱhe.

₁₆Nga madekwana vhafunziwa vhawe vha tsela dzivhani. ₁₇Vha dzhena tshikepeni vha wetshela seli vha livha Kapernaumi. Ḽa vhuya ḽa swifhala, Yesu a sa athu swika khavho. ₁₈Ha vuwa ḓumbu ha vha na magabelo mahulu. ₁₉Musi vho no tshimbila khilomitha dzi ṱoḓaho u ita ṱhanu, vha vhona Yesu a tshi khou tshimbila nṱha ha maḓi, a tshi vho swika tsini ha tshikepe, vha tshenuwa. ₂₀Ene a amba navho a ri, “Ndi Nṋe, ni songo ofha.” ₂₁Vha tshi kha ḓi ri vha mu dzhenisa tshikepeni, ha vha hu uri tsho no ḓi swika khunzikhunzini he vha vha vho livha hone.

₂₂Nga matshelo vhaḽa vhathu vhe vha vha vho sala seli ha dzivha vha vhona henefho ho no tou sala tshikepe tshithihi fhedzi. Hone vho vha vha tshi zwi ḓivha uri Yesu ho ngo ṱuwa na vhafunziwa vhawe, vho ṱuwa vhe vhoṱhe. ₂₃Zwino ha swika zwiṅwe zwikepe zwi bvaho Tiberiasi, zwa ḓa zwa ima fhaḽa he vhathu vha ḽa zwiḽiwa Yesu ó no livhuha. ₂₄Vhathu vha tshi vhona uri Yesu na vhafunziwa vhawe a vhaho, vha mbo ḓi namela zwikepe zwenezwo vha livha Kapernaumi vha tshi khou mu ṱoḓa.

₂₅Vhathu vha tshi wana Yesu seli ha dzivha vha mu vhudzisa vha ri, “Vhafunzi, nṋa vho ḓa lini fhano?”

₂₆Yesu a vha fhindula a ri, “Zwino ipfani-ha: a ni khou nṱoḓa nge na vhona maḓembe anga, ni nṱoḓa nge na ḽa vhuswa na fura. ₂₇Matsina ni songo lusa u wana zwiḽiwa zwine zwa sina; lusani u wana zwiḽiwa zwi sa sini, zwi tshidzaho muthu tshoṱhe. Zwenezwo zwiḽiwa ni ḓo ṋewa nga Mubebwa-nga-muthu, ngauri ndi Ene we Khotsi a re Ene Mudzimu a mu hwesa maanḓa a u zwi ita.” ₂₈Vhone vha vhudzisa vha ri, “Nṋa ri nga itani uri ri dzule ri tshi ita mishumo ine Mudzimu a i funa?” ₂₉Yesu a vha fhindula a ri, “Ndi mushumo muthihi fhedzi une a funa ni tshi ita: Ndi u ṱanganedza we a mu ruma.” ₃₀Vhone vha ri, “Zwino vhone vha nga si ri sumbedze tshiga tsha maanḓa avho uri ri kone u vha tenda? Vha nga ita mini ra vhona? ₃₁Vhomakhulukuku washu vho ḽa mana sogani. Ndi zwine na Maṅwaloni ha pfi, ‘O vha fusha nga vhuswa vhu bvaho ṱaḓulu.’ ” ₃₂Yesu a ri, “Zwino ipfani-ha: Matsina a si Mushe we a ni ṋea vhuswa vhukuma vhu bvaho ṱaḓulu, ane a ḓi ni fusha nga vhuswa vhukuma vhu bvaho ṱaḓulu ni Khotsi anga. ₃₃Vhuswa vhune Mudzimu a ṋea vhathu ndi uyo ane a tsa a tshi bva ṱaḓulu a ṋea shango vhutshilo.” ₃₄Vhathu vha mu humbela vha ri, “Muṋe washu, kha ri ḓi fhiwa zwashu honoho vhuswa misi yoṱhe.”

₃₅Yesu a vha vhudza a ri, “Vhuswa vhu tshidzaho ndi Nṋe; ane a ḓa ha Nṋe ha tsha ḓo dovha a farwa nga nḓala, ane a mpfulufhela ha tsha ḓo dovha a pfa ḓora. ₃₆Zwino Nṋe ndi ri, u mmbona no no ḓi mmbona, hone a ni mpfulufheli. ₃₇Muṅwe na muṅwe we Khotsi a nkumedza u ḓo ḓa kha Nṋe; ane a ḓa kha Nṋe a thi nga mu pandeli, ₃₈vhunga ndi tshi tsa ndi tshi bva ṱaḓulu ndi songo ḓela u ita zwine Nṋe nda funa, ndó ḓela u ita zwine zwa funwa nga o nthumaho. ₃₉Zwine we a nthuma a funa ndi tshi ita ngezwi: Ha funi ndi tshi xedza na muthihi kha vhe a mpha, u funa ndi tshi vha vusa vhafuni nga ḓuvha ḽa vhufhelo. ₄₀Zwine Khotsi anga a funa ndi uri vhoṱhe vhane vha vhona Murwa vha mu fulufhela, vha vhe na vhutshilo vhu sa fheli, Nṋe nda ḓo konou vha vusa vhafuni nga ḓuvha ḽa vhufhelo.”

₄₁Zwenezwo Majuda vha thoma u mu gungulela nge a ri, “Ndi Nṋe vhuswa vhu bvaho ṱaḓulu.” ₄₂Vha mbo ḓi ri, “Nṋa uyu muthu a si Yesu ṅwana wa Josefa? Khotsi awe na mme awe hufha ri tshi vha ḓivha! Zwino u vho amba hani a tshi ri u bva ṱaḓulu?”

₄₃Yesu a vha fhindula a ri, “Litshani u ṱolou ṅuṅuna nga tshaṋu. ₄₄A hu na ane a kona u ḓa kha Nṋe arali a songo tou kokodzwa nga Khotsi we a nthuma; huno onoyo Nṋe ndi ḓo mu vusa nga ḓuvha ḽa vhufhelo. ₄₅Hufha vhaporofita vha tshi ṅwala vho ri, ‘Vhoṱhe vha ḓo tou funzwa nga Mudzimu!’ Zwino muṅwe na muṅwe ane a thetshelesa Khotsi, a dovha a funzwa ngae, u ḓa ngeno kha Nṋe. ₄₆Hezwi a zwi ambi uri hu na muthu o no vhonaho Khotsi; o mu vhonaho ndi muthihi fhedzi: ndi a bvaho ha Mudzimu. ₄₇Zwino ipfani-ha: a mpfulufhelaho u na vhutshilo vhu sa gumi. ₄₈Ndi Nṋe vhuswa vhu tshidzaho. ₄₉Vhomakhulukuku waṋu vho ḽa mana sogani vha fhedza vha ḓi fa. ₅₀Hone vhuswa vhu bvaho ṱaḓulu ndi vhune muthu a ri u vhu ḽa a sa tsha fa. ₅₁Ndi Nṋe honoho vhuswa vhu tshidzaho he ha tou tsa vhu tshi bva ṱaḓulu. Arali muthu a ḽa vhuswa honoho u ḓo tshila lini na lini. Vhuswa vhune nda ḓo mu ṋea ndi muvhili wanga une nda u kumedzela shango uri ḽi kone u tshila.” ₅₂Ḽeneḽo fhungo ḽa vusa khani khulu vhukati ha Majuda; vha hanedzana vha ri, “Nṋa uyu muthu a nga kona hani u ri ṋea muvhili wawe ra u ḽa?”

₅₃Yesu a vha vhudza a ri, “Zwino ipfani-ha: Na sa ḽa muvhili wa Mubebwa-nga-muthu, na nwa na malofha awe, a ni nga koni u vha na vhutshilo kha inwi. ₅₄Ane a ḽa muvhili wanga, a nwa na malofha anga, u na vhutshilo vhu sa fheli, nahone Nṋe ndi ḓo mu vusa vhafuni nga ḓuvha ḽa vhufhelo. ₅₅Muvhili wanga ndi zwone zwiḽiwa vhukuma, malofha anga ndi tshone tshinwiwa vhukuma. ₅₆Ane a ḽa muvhili wanga a nwa na malofha anga, u dzula e kha Nṋe, na Nṋe ndi khae. ₅₇Nṋe ndi tshila nga Khotsi a tshilaho we a nthuma; sa zwenezwo ane a nndya u ḓo tshila-vho nga Nṋe. ₅₈Uvhu-ha ndi hone vhuswa vhu bvaho ṱaḓulu, a vhu fani na vhuḽa he vhomakhulukuku waṋu vha ḽa vha fhedza vha ḓi fa. Hovhu, ane a vhu ḽa u ḓo tshila nga hu sa fheliho.”

₅₉Haya ndi maipfi e Yesu a amba a tshi khou funza sinagogoni Kapernaumi.

₆₀Vhanzhi vha vhafunziwa vhawe vha tshi pfa a tshi ralo vha ri, “Pfunzo hei i konḓa nga maanḓa; i nga ṱanganedzwa nga nnyi?”

₆₁Naho a songo vhudzwa nga muthu Yesu o ḓi zwi ḓivha uri vhafunziwa vhawe vha khou gungula nga haya mafhungo, ndi zwe a vha vhudza a ri, “Kani-ha aya mafhungo a vho ṱoḓa u ni ṅalisa? ₆₂Zwino ni ḓo tou zwi ita hani ni tshi vhona Mubebwa-nga-muthu a tshi dovha a gonya a vhuelela he a vha e hone? ₆₃Tshine tsha tshidza muthu ndi Muya wa Mudzimu; muthu nga eṱhe ha na tshine a kona. Maipfi e nda amba na inwi a ni ṋea onoyo Muya, a ni ṋea vhutshilo; ₆₄vhaṅwe vhaṋu vha ro sa a tenda.” (Yesu o vha o ḓi zwi ḓivha na u bva mathomoni uri vhane vha sa mu fulufhele ndi vhafhio, na uri ane a ḓo mu fheṱa ndi nnyi.) ₆₅A dovha a ri, “Ndi zwe ndi tshi ni vhudza nda ri a hu na ane a nga ḓa kha Nṋe arali a songo thoma u koniswa nga Khotsi anga.”

₆₆U bva zwenezwo vhafunziwa vhanzhi vha mu shandukela vha si tsha tshimbila nae. ₆₇Ndi hone Yesu a tshi amba na vha 12 a ri, “Nṋa inwi-vho ni khou ṱoḓa u ṱuwa kani?”

₆₈Simoni Pitrosi a fhindula a ri, “Muṋe washu, ri ḓo ṱuwa ra ya ha nnyi, hufha vhe vhone vha na maipfi a tshidzaho tshoṱhe? ₆₉Zwino riṋe ro no vha fulufhela, ri vho zwi ḓivha uri ndi vhone Mukhethwa a bvaho ha Mudzimu.”

₇₀Yesu a tshi vha fhindula a ri, “Nṋa a tho ngo ni nanga ni 12? Huno-ha, muṅwe waṋu ndi diabolo.” ₇₁A tshi ralo o vha a tshi khou amba Judasi murwa wa Simoni Iskariote; onoyo naho o vha e muṅwe wa vha 12, o vha e ene we a vho ḓo mu fheṱa.