JOHANISI 8

₁[Vhathu vhoṱhe vha humela hayani, Yesu Ene a ya Thavhani ya Miolivi. ₂Nga matshelo, hu tshee nga matshelonitsheloni, a vhuelela thembeleni. Vhathu vhoṱhe vha kuvhangana u mu pfa, Ene a dzula fhasi a thoma u vha funza. ₃Vhaḓivhi vha Mulayo na Vhafarisei vha ḓisa muṅwe musadzi we a vha o fariwa e kha vhupombwe, vha mu imisa phanḓa ha vhathu. ₄Vha vhudza Yesu vha ri, “Vhafunzi, hoyu musadzi o wanedzwa a tshi khou ita vhupombwe. ₅Zwino Mushe kha Mulayo washu o ri laya uri musadzi o raliho u fanela u tou kanḓwa nga matombo a fa. Vhone zwino vha zwi vhona hani?” ₆Vha tshi ralo tsho vha tshi tshikwekwe tsha uri vha kone u mu hwelela zwavhuḓi.

Yesu Ene a kotama a thoma u ṅwala-ṅwala fhasi nga munwe. ₇Vhone vhó ḓi ima vha tshi khou mu vhudzisa, a kotamuluwa a vha vhudza a ri, “A sa athu vhuyaho a pfuka Mulayo wa Mudzimu, nga a vhe ene a no thoma u mu kovhola.” ₈A dovha a kotama a ṅwala-ṅwala fhasi. ₉Vha tshi tou pfa zwenezwo vhahulwane vha mbo ḓi vha vhone vha u thoma u ṱuwa nga muthihi nga muthihi, na vhaṅwe vha ḓi ralo vha vhuya vha sia Yesu e eṱhe, na uyo musadzi o ḓi sokou ima henefhaḽa. ₁₀Yesu a tshi kotamuluwa, a amba na uyo musadzi a ri, “Vhone musadzi, vhaḽa vhathu vha ngafhi? A hu na na muthihi we a vha haṱula?”

₁₁Uyo musadzi a fhindula a ri, “A hu tshee na na muthihi Muṋe wanga.”

Yesu a ri, “Na Nṋe a thi vha haṱuli. Kha vha tshimbile zwavho, hone u bva zwino vha laṱe vhutshinyi havho.”]

₁₂Yesu a dovha u amba na vhathu a ri, “Nṋe ndi tshedza tsha shango. Ane a vha mufunziwa wanga ha nga tshimbili swiswini, u ḓo vha na tshedza tshi re vhutshilo.”

₁₃Vhafarisei vha amba nae vha ri, “Vhunga ni tshi khou tou ḓiṱanzilela inwi muṋe, zwine na amba a zwi na vhuṱanzi.”

₁₄Yesu a fhindula a ri, “Aiwa, matsina naho ndi tshi khou ḓiṱanzilela Nṋe muṋe, zwine nda amba zwi na vhuṱanzi ngauri ndi a ḓivha hune nda bva na hune nda ya. Inwi hune nda bva na hune nda ya a ni hu ḓivhi. ₁₅Inwi ni haṱula ni tshi sedza tshifhaṱuwo; Nṋe a thi haṱuli muthu. ₁₆Naho ndo vha ndi tshi nga ri ndi a haṱula, khaṱhulo yanga yo vha i tshi ḓo vha ya ngoho, ngauri a thi ndoṱhe, ndi na Mudzimu Khotsi o nthumaho. ₁₇Kha Mulayo waṋu ho ṅwaliwa upfi arali vhuṱanzi ha vhathu vhavhili ha anḓana, zwine vha amba zwo khwaṱha. ₁₈Zwino na Nṋe ndi na ṱhanzi mbili: Ya u thoma ndi Nṋe muṋe; ya vhuvhili ndi Khotsi anga o nthumaho.”

₁₉Vhone vha mu vhudzisa vha ri, “Nṋa khotsi aṋu vha ngafhi?”

Yesu a fhindula a ri, “Inwi hu Nṋe a ni nnḓivhi, hu Khotsi anga a ni mu ḓivhi. Arali Nṋe no vha ni tshi nnḓivha ndi musi na Khotsi anga ni tshi ḓo vha ni tshi mu ḓivha.”

₂₀Mafhungo ayo oṱhe Yesu o a amba musi a tshi khou funza thembeleni, fhethu he ha vha hu tshi dzula zwibogisi zwa zwifhiwa. Hone hu si vhe na we a mu fara, ngauri tshifhinga tshawe tsho vha tshi sa athu swika.

₂₁Yesu a dovha a vha vhudza a ri, “Nṋe ndi ḓo ṱuwa, na sala ni tshi nndila, na fhedza nga u fela vhutshinyini haṋu. Hune Nṋe nda khou ya hone inwi ni nga si ntevhele.”

₂₂Vhahulwane vha Majuda ndi hone vha tshi ri, “A tshi ri, ‘Hune Nṋe nda khou ya hone inwi ni nga si ntevhele,’ kani u ṱoḓa u ḓivhulaha?”

₂₃Yesu a fhindula a ri, “Inwi ni vha fhano fhasi; Nṋe ndi bva ṱaḓulu. Hayani haṋu ndi fhano shangoni, hone kha Nṋe a zwo ngo ralo. ₂₄Ndi zwe nda ni vhudza nda ri ni ḓo fela vhutshinyini haṋu. Nangoho ni ḓo fela vhutshinyini haṋu arali ni sa tendi uri ‘Ndi ane nda vha Ene’.” ₂₅Vhone vha mu vhudzisa vha ri, “Ni ri ni nnyi?” Yesu a fhindula a ri, “Ndi zwenezwiḽa zwe nda ni vhudza u bva mathomoni. ₂₆Hu tshee na zwinzhi zwe nda vha ndi tshi nga zwi amba nda ni haṱula ngazwo. Hone zwino shango ndi khou tou ḽi vhudza fhedzi zwe nda pfa nga o nthumaho; huno Ene u a fulufhedzea.”

₂₇Vhone vha si kone u pfa uri u khou vha vhudza nga Khotsi. ₂₈Ndi hone Yesu a tshi vha vhudza a ri, “Musi no no imisela Mubebwa-nga-muthu nṱha ndi hone ni tshi ḓo ḓivha uri ‘Ndi ane nda vha Ene’; na ḓivha na uri a hu na tshine nda sokou ita nga ndoṱhe; ndi amba zwenezwo zwine Khotsi a ri ndi zwi ambe. ₂₉Zwino we a nthuma u na Nṋe; ha nndaṱedzi, ngauri ndi dzula ndi tshi ita zwine zwa mu takadza.”

₃₀Vhanzhi vhe vha pfa Yesu a tshi amba eneo mafhungo vha mu tenda.

₃₁Ndi hone Yesu a tshi amba na Majuda vhe vha mu tenda a ri, “Arali inwi ni tshi futelela u tevhedza zwine nda amba, ndi hone ni tshi ḓo vha vhafunziwa vhanga vhukuma; ₃₂ni ḓo ḓivha ngoho; huno ngoho i ḓo ni vhofholola.”

₃₃Vhone vha fhindula vha ri, “Riṋe ri vhaḓuhulu vha Abrahamu; a ri athu vhuya ra vha phuli dza muthu. Zwino ni tshi ri ri ḓo vhofhololwa, ni khou amba mini?”

₃₄Yesu a vha vhudza a ri, “Thetshelesani ndi ni vhudze: Muthu ane a endela u tshinya o no vha phuli ya hone vhutshinyi. ₃₅Phuli i nga si vhe wa muṱani tshoṱhe, hone ṅwana ndi wa hayani misi yoṱhe. ₃₆Zwino arali na tou vhofhololwa nga Murwa, ndi hone ni tshi ḓo vha no vhofhololwa vhukuma. ₃₇Zwauri ni vhaḓuhulu vha Abrahamu ndi a zwi ḓivha. Zwino hufha ni tshi vho ṱoḓa u mmbulaha? Zwi amba uri a ni funi u ṱanganedza maipfi anga. ₃₈Nṋe ndi amba zwe Khotsi anga a tou ntsumbedza; inwi ni ita zwe na vhudzwa nga khotsi aṋu.”

₃₉Vhone vha fhindula vha ri, “Khotsi ashu ndi Abrahamu.” Yesu a ri, “Arali nangoho no vha ni vhana vha Abrahamu ndi musi ni tshi ḓo ita zwe ene a vha a tshi ita. ₄₀Zwino khezwi ni tshi khou ṱoḓa u mmbulaha, ngeno Nṋe ndi tshi khou ni vhudza ngoho ye nda tou pfa nga Mudzimu. Kani Abrahamu zwo raliho o vhuya a zwi ita? ₄₁Inwi no tou dzhia khotsi aṋu.”

Vha fhindula vha ri, “Riṋe a ro ngo bebwa nga vhupombwe; a ri na muṅwe khotsi arali e si Ene Mudzimu.”

₄₂Yesu a vha vhudza a ri, “Arali nangoho Mudzimu o vha e Khotsi aṋu ndi musi ni tshi ḓo mpfuna, ngauri ndi bva ha Ene ni tshi mmbona ndi fhano. Hafhu a tho ngo tou ḓiḓisa, Ene ndi Ene we a nthuma. ₄₃Ni a ḓivha uri ndi mini zwine nda amba ni sa zwi pfi? Ndi uri a ni funi u ṱanganedza pfunzo yanga. ₄₄Inwi ni vhana vha khotsi aṋu diabolo; ni funa u ita zwine khotsi aṋu a tama. Ene o ḓi vha mupondavhathu u bva henengei mathomoni. Ho ngo vhuya a kona u ima kha ngoho; tshawe o ḓi vha mazwifhi. Musi a tshi zwifha u khou tou ita zwo mu fanelaho, ngauri ndi muzwifhi; ndi ene khotsi a mazwifhi. ₄₅Nṋe ndi amba ngoho, ndi zwine na si tende zwine nda amba. ₄₆Ndi nnyi waṋu ane a nga nthovhedza a ri ndo vhuya nda tshinya tshiṅwe tshithu-vho? Zwino arali ndi tshi amba ngoho ndi mini ni sa tendi? ₄₇Ane a bva ha Mudzimu u thetshelesa maipfi a Mudzimu. Inwi a ni bvi ha Mudzimu; ndi zwine na si fune u thetshelesa.”

₄₈Majuda vha fhindula Yesu vha ri, “Ri tshi ri ni Musamaria, ni na thuṅwa ya Saṱhane, ro vha ri sa khou amba zwone?”

₄₉Yesu a fhindula a ri, “A thi na thuṅwa; Nṋe ndi hulisa Khotsi anga, hone inwi ni a nnyadza. ₅₀A si uri ndi tshi ralo ndi u ṱoḓa u huliswa Nṋe muṋe. Ane a funa ndi tshi huliswa u hone; khaṱhulo i zwanḓani zwawe. ₅₁Zwino thetshelesani ndi ni vhudze: Ane a ita zwine nda amba, ha nga thetsheli lufu na kathihi.”

₅₂Majuda vha mu vhudza vha ri, “Zwino ndi hone ro zwi vhona uri vhukuma ni na thuṅwa! Hufha Abrahamu o ḓi fa, na vhaporofita vho ḓi fa; zwino ni nga amba hani na ri, ‘Ane a ita zwine nda amba ha nga thetsheli lufu na kathihi’? ₅₃Kani-ha ni vho ḓiita muhulwane kha khotsi ashu Abrahamu? Ri amba ngauri hu ene, hu vhaporofita, vhoṱhe vho ḓi fa. Nṋa matsina ni vho ḓiita nnyi?”

₅₄Yesu a ri, “Arali ndi nga ḓihulisa Nṋe muṋe, khuliso yeneyo i ḓo vha i si khuliso ya tshithu. Ane a nkhulisa ndi Khotsi anga – onoyo ane inwi na ri ndi Mudzimu waṋu, ₅₅ngeno ni sa vhuyi na mu ḓivha; Nṋe hone ndi a mu ḓivha. Arali ndi tshi ri a thi mu ḓivhi, ndi ḓo vha ndi tshi vho zwifha sa inwi. Huno zwino ndi a mu ḓivha nahone ndi khunyeledza zwine a amba.

₅₆“Khotsi aṋu Abrahamu o pembela ó lavhelela u ḓa hanga; nangoho a ri u zwi vhona a takala.”

₅₇Majuda vha ri, “Ni sa athu vhuya na vha na miṅwaha ya 50 na vha ni tshi vho ri no vhona Abrahamu!”

₅₈Yesu a fhindula a ri, “Zwino ipfani-ha: Abrahamu a sa athu bebiwa, ndi ḓi vha ane nda vha ene.”

₅₉Vha mbo ḓi doba matombo vha tshi ri vha mu kovhole ngao, hone Ene a ngalangala ha mbo ḓi vha u bva thembeleni.