JUELE 2

₁Lidzani phalaphala Tsioni,

vhidzelelani

ni nṱha ha thavha yanga khethwa!

Vhoṱhe vha dzulaho shangoni ḽino nga vha tetemele,

ḓuvha ḽa Yahavee ḽi khou ḓa,

ee, ḽi tsini.

₂Ndi ḓuvha ḽa swiswi ḽi ṱungufhadzaho,

ḓuvha ḽa makole ḽo swifhalaho.

Hu khou ḓa mmbi khulu ya maanḓa,

i nga mapfuvhi a tshi balangana thavhani,

zwi no nga hezwo a zwi athu vhuya zwa vhonwa,

a zwi tsha ḓo dovha zwa vhonwa.

₃Phanḓa hadzo mulilo u a lozwa,

murahu hadzo khavhu ya mulilo i a fhisa.

Phanḓa hadzo shango ḽi nga tsimu ya Edeni,

murahu hadzo hu nga phanga i si na tshithu,

a hu na tshine tsha dzi ponyoka.

₄Dzi na zwifhaṱuwo zwi no nga zwa bere,

dzi gada unga bere dzo namelwaho nga vhathu.

₅Dzi fhufha miṱumbani ya dzithavha,

ha pfala mubvumo u no nga wa gariki dza nndwa;

dzi nga mulilo u thathabaho

u tshi fhisa hatsi ho omaho;

dzi nga mmbi ya maanḓa i tshi bva pfumo.

₆Tshakha dzi tshi dzi vhona dzi farwa nga nyofho,

zwifhaṱuwo zwoṱhe zwi a tswukuluwa.

₇Dzi gidima unga vhahali,

dzi gonya mbondo unga vhaṱhavhani.

Dzoṱhe dzi bva dzo rwa muduba,

a dzi vhuyi dza pambuwa nḓilani yadzo.

₈Iṅwe a i dzheni nḓilani ya iṅwe,

a dzi sukumedzani,

iṅwe na iṅwe i tshimbila yo livha phanḓa.

Dzi dzhena na museleni wa maḓi, dza ḓi fhirela phanḓa,

a hu na tshine tsha dzi thivhela.

₉Dzi tshoṱhela muḓi, dzi dadamala nṱha ha mitsheṱo,

dzi namela dza dzhena dzinḓuni,

dza dzhena nga mavhona unga mafobvu.

₁₀Dzi tshi swika,

ḽifhasi ḽi a dzinginyea,

lutombo lwa tetemela,

ḓuvha na ṅwedzi zwa swifhala,

ṋaledzi dza si tsha penya.

₁₁Muṋe washu u a bvuma e phanḓa ha mmbi yawe,

mara awe ha na mbalo,

vhane vha mu thetshelesa vha na maanḓa.

Ḓuvha ḽa Muṋe washu ndi ḽihulu, ḽi a ofhisa.

Ndi nnyi ane a nga ḽi konḓelela?

“Tshifhinga ndi tshone,

vhuelelani ha Nṋe nga mbilu yaṋu yoṱhe,

ni ḓidzime zwiḽiwa,

ni tsengise miṱodzi, ni lile.

₁₃Kherulani mbilu dzaṋu,

zwi si zwiambaro fhedzi!”

Humelani ha Muṋe washu Mudzimu waṋu,

Ene u na tshilidzi na khathutshelo,

ha ṱavhanyi u sinyuwa,

lufuno lwawe ndi luhulu,

u a hangwela a si tsha lifhedza.

₁₄Ndi nnyi ane a zwi ḓivha uri a nga kha ḓi ni hangwela,

a ni shudufhadza na wana khaṋo khulu,

na konou ṋekedza Muṋe washu Mudzimu waṋu

nduvho ya thoro na waini?

₁₅Lidzani phalaphala ni Tsioni,

ḓivhadzani ḓuvha ḽikhethwa ḽa u ḓidzima,

ni vhidze tshivhidzo tshikhethwa.

₁₆Kuvhanganyani vhathu,

vha vhe tshivhidzo tsho ḓikhethelaho Mudzimu;

kuvhanganyani vhahulwane;

kuvhanganyani vhana,

na vhane vha kha ḓi mama!

Mukwasha nga a bve-vho rumuni yawe a ḓe,

na muselwa nga a bve nḓuni.

₁₇Vhotshifhe vha no shumela Muṋe washu,

nga vha lile

vhe vhukati ha guḓa ḽa thembele na aḽiṱari.

Nga vha ri, “Yawee Muṋe washu,

khathutshela vhathu vhau.

U songo tenda vhathu vhe wa ḓiwanela

vha tshi kolelwa,

vha vha ganeo vhukati ha dzitshakha.

Tshakha dza vhannḓa u songo tenda dzi tshi ri goḓa dza ri,

‘Mudzimu waṋu u ngafhi?’ ”

₁₈Ndi hone mbilu ya Muṋe washu

i tshi swela shango ḽawe,

a khathutshela vhathu vhawe.

₁₉Muṋe washu a vha fhindula a ri,

“Ndi ḓo ni ṋea mavhele na waini ya tuvhu na mapfura,

zwine na ḓo kona u ḽa na fura.

A thi tsha ḓo dovha nda ni nyadzisa nga dzitshakha.

₂₀“Mmbi ya Devhula ndi ḓo i thathela kule na inwi,

nda i sukumedzela shangoni ḽo omaho hu sa meli tshithu,

muduba wayo wa phanḓa wa livha lwanzheni

lwa vhubvaḓuvha,

wa murahu wa livha lwanzheni lwa vhukovhela.

Zwitumbu zwao zwi ḓo nukha, munukho wa pfala kule.

Ndi ḓo dzi lozwela zwihulu zwe dza ni ita.”

₂₁Iwe tsimu, u songo ofha tshithu,

takala u pembele!

Vhukuma Muṋe washu o ita zwihulu.

₂₂Inwi phukha dza ḓaka,

ni songo tsha ofha;

pfulo i khou dalafhala,

miri i vho aṋwa mitshelo,

mihuyu na minḓirivhe i ḓo aṋwa mitshelo minzhi.

₂₃Inwi vhathu vha Tsioni, takalani,

pembelelani Muṋe washu Mudzimu waṋu,

ngauri o ni ṋea mvula nga tshifhinga tshayo.

U dovha u ni nisela mvula nnzhi,

ya luṱavula na ya tseula,

unga misi iḽa ya kale.

₂₄Luvhata lwa u fhulela lu ḓo ḓala mavhele,

dzinkho dzi ḓo ḓala tuvhu na mapfura

dza ita na u fhalala.

₂₅“Ndi ḓo ni lifhela zwa miṅwaha ye na ḽelwa nga nzie,

nzie khulu na nzie ṱhukhu na magerere,

yone mmbi yanga khulu ye nda i ruma ya ni ḓela.

₂₆Ni ḓo vha na zwiḽiwa zwinzhi, na ḽa na fura,

na renda dzina ḽa Nṋe Yahavee Mudzimu waṋu,

we nda ni itela zwimangadzo:

vhathu vhanga a vha tsha ḓo dovha vha shoniswa,

lini na lini.

₂₇Ndi hone ni tshi ḓo zwi ḓivha

uri Nṋe ndi vhukati ha Israele,

na uri ndi Nṋe Yahavee Mudzimu waṋu,

na uri a hu tshee na muṅwe.

Vhathu vhanga

a vha tsha ḓo dovha vha shoniswa lini na lini.”

₂₈“Ngavhuya ndi ḓo shululela Muya wanga

kha vhathu vhoṱhe.

Vhana vhaṋu vha vhatuka na vha vhasidzana

vha ḓo porofita,

vhakalaha vhaṋu vha ḓo lora miloro,

vhaṱhannga vhaṋu vha ḓo vhona mabono.

₂₉Misi yeneyo ndi ḓo shululela Muya wanga

na kha dziphuli,

dza vhanna na dza vhasadzi.

₃₀Ndi ḓo ita zwimangadzo lutomboni na kha ḽifhasi,

hu ḓo vha na malofha na mulilo na gole ḽa vhutsi.

₃₁Ḓuvha ḽi ḓo swifhala, ṅwedzi wa shanduka

wa nga malofha,

ha konou swika ḓuvha iḽo ḽihulu ḽi ofhisaho ḽa Yahavee.

₃₂Vhoṱhe vhane vha vhidzelela dzina ḽa Yahavee

vha ḓo tshidzwa.”

Muṋe washu o ri,

“Thavhani ya Tsioni na Jerusalema,

tsalela dzine dza vhidzwa nga Yahavee

dzi ḓo lamulelwa.”