JONASI 1

₁Muṋe washu o vhuya a amba na Jonasi ṅwana wa Amithai a ri, ₂“Takuwa u ye muḓini uḽa muhuluhulu wa Ninive, u vha ḓivhadze khaṱhulo, ngauri vhuvhi havho vhu vho nkombodza.” ₃Hone Jonasi a shavha Muṋe washu a livha Tharashishi. A tsela Jopa a wana tshikepe tshi tshi khou ya Tharashishi, a bvisa tshelede ya lwendo, a dzhena tshikepeni a livha Tharashishi a tshi ri a shavhe Muṋe washu.

₄Muṋe washu a ḓisa ḓumbu ḽihulu lwanzheni, ha vuwa magabelo mahulu, tshikepe tsha nga tshi sa pwashekana. ₅Vhatshimbidzi vha tshikepe vhoṱhe vha farwa nga nyofho, muṅwe na muṅwe a vhidzelela mudzimu wawe. Vha posa mihwalo ngomu lwanzheni uri tshikepe tshi si tsha lemelwa. Jonasi ene o vha o tsela lufherani lwa tshikepe a eḓela a fara khofhe khulu. ₆Muhulwane wa tshikepe a ḓa khae a ri, “Vha nga eḓela hani? Kha vha vuwe vha vhidzelele mudzimu wavho. Khamusi u ḓo ri elelwa ra si lovhe.”

₇Ndi hone vhatshimbidzi vha tshikepe vha tshi amba nga tshavho vha ri, “Iḓani ri ite madeṅwa ri vhone a no khou ri vhangela khombo heino.” Vha ita madeṅwa, ha mvaṱiwa Jonasi.

₈Vha mu vhudzisa vha ri, “Nga vha ri vhudze uri ane a khou ri vhangela khombo heino yoṱhe ndi nnyi? Vha shuma mushumo-ḓe? Vha bva ngafhi? Shango ḽa havho ndi ḽifhio? Vha bva kha vhathu vhafhio?”

₉Ene a fhindula a ri, “Nṋe ndi Muheberu, ndi luvha Yahavee, Mudzimu wa makoleni, Ene o sikaho lwanzhe na shango.” ₁₀Hezwo zwa vha tshenusa vha vhudzisa vha ri, “Vho ita mini?” Vho vha vha tshi vho zwi ḓivha uri u khou shavha Muṋe washu, nge a vha o no ḓi vha vhudza nga u ralo. ₁₁Lwanzhe lwo vha lu tshi khou ḓi sinyuwa lu tshi ya. Ndi hone vha tshi mu vhudzisa vha ri, “Ro fanela u vha itani uri lwanzhe lu dzike?” ₁₂Ene a fhindula a ri, “Nnzhieni ni mpose lwanzheni, ndi hone lu tshi ḓo dzika. Ndi a ḓivha uri ndi mulandu wanga maḓumbu haya a tshi ni vutshela.” ₁₃Avho vhanna vha linga nga nungo dzoṱhe u rithelela tshikepe tshavho uri tshi ye khunzikhunzini, hone izwo zwa vha kunda nge lwanzhe lwa ḓi sinyuwa lu tshi ya. ₁₄Ndi hone vha tshi vhidzelela Muṋe washu vha ri, “Yawee Yahavee, u songo litsha ri tshi fa nge ra vhulaha uyu muthu. U songo ri hwesa mulandu wa u vhulaha muthu a si na mulandu, ngauri u Yahavee, u ita zwine wa funa.” ₁₅Ndi hone vha tshi dzhia Jonasi vha mu posa lwanzheni, ulwo lwanzhe lwo sinyuwaho lwa mbo dzika. ₁₆Avho vhanna vha tshi vhona zwenezwo vha ofha Muṋe washu zwihulu, vha ṋekedza Muṋe washu nduvho, ngauri vho vha vho mu anela uri vha ḓo mu luvha.

₁₇Hone Muṋe washu a ḓisa khovhe khulu ya mila Jonasi, a dzula ngomu hayo maḓuvha mararu na vhusiku hao.