LUKASI 12

₁Nga tshifhinga tshenetsho ho kuvhangana vhathu vhanzhi-vhanzhi, ha sala hu si na na vhupfelo ha mare, Yesu a thoma nga u amba na vhafunziwa vhawe a ri, “Sendelani kule na mbilisa ya Vhafarisei – ndi amba vhuṋowa havho. ₂A hu na tsho tibwaho tshine tsha sa ḓo tibulwa, a hu na tsho dzumbwaho tshine tsha sa ḓo ḓihwa nga vhathu. ₃Zwoṱhe zwe na amba swiswini zwi ḓo pfala tshedzani; na zwe na hevhedza ni maguḓani zwi ḓo tou huwelelwa vhathuni.

₄“Ndi a ni vhudza inwi khonani dzanga ndi ri, ni songo ofha vhane vha ri u vhulaha muvhili vha sa tsha vha na tshiṅwe tshine vha nga kha ḓi kona u tshi ita. ₅Nṋe ndi ḓo ni vhudza ane na fanela u mu ofha: Ofhani Uyo ane a ri o no vhulaha, a dovha a vha na maanḓa a u kudza muthu heleni. Onoyo ndi Ene ane nda ri ni mu ofhe!

₆“Kani-ha ṱhongola ṱhanu a dzi rengiswi nga sennde mbili? Naho zwo ralo a hu na na nthihi yadzo ine Mudzimu a vhuya a i hangwa. ₇Zwino inwi hufha na mavhudzi a ṱhohoni dzaṋu Mudzimu o dzula o a vhala! Zwino-ha ni songo ofha tshithu; inwi ni fhira ṱhongola kule.

₈“Ndi a ni vhudza ndi ri: muthu muṅwe na muṅwe ane a si ofhe u bula vhathuni uri ndi wanga, na Mubebwa-nga-muthu u ḓo bula khoroni ya Mudzimu uri onoyo ndi wawe; ₉hone ane a nndandula vhathuni, na Nṋe ndi ḓo mu landula khoroni ya Mudzimu. ₁₀Muthu ane a amba Mubebwa-nga-muthu nga ḽo vhifhaho, a nga hangwelwa, hone ane a nyefula Muya Mukhethwa ha nga hangwelwi.

₁₁“Musi vha tshi ni hwelela zwivhidzoni zwa Majuda kana kha vhavhusi kana vhahulwane, ni songo ḽa mbilu na ri ni ḓo ri mini ni tshi fhindula, ₁₂ngauri Muya Mukhethwa ndi Ene ane a ḓo ni funzedza zwine na ḓo amba zwenezwo vha tshi ni sengisa.”

₁₃Muṅwe muthu henefho vhukati ha gogo a amba na Yesu a ri, “Vhafunzi, a vha vhudzi-vho mukomana wanga a kovhekana na nṋe ifa ḽa hashu?” ₁₄Yesu a mu fhindula a ri, “Munnawe, nṋa ndo vhewa nga nnyi uri ndi vhe muhaṱuli wa mafhungo aṋu na mukovhekanyi wa ifa ḽa haṋu?” ₁₅A konou amba na vhathu a ri, “Ni thanyele u funesa lupfumo. Vhutshilo ha muthu a vhuho kha u anda ha thundu yawe.”

₁₆A vha vhudza tshifanyiso a ri, “Ho vha hu na muṅwe muthu wa mupfumi we a vhibvisa mavhele manzhi-manzhi tsimuni yawe. ₁₇Uyo munna a thoma u ḓivhudzisa a ri, ‘Nṋa ndi ḓo tou zwi ita hani ndi si na hune nda nga vhulunga hone mavhele anga?’ ₁₈A fhedza nga u ri, ‘Ahaa, ndi ḓo tou thutha maḓulu anga nda fhaṱa maṅwe mahulwane ane nda ḓo vhulungela khao mavhele anga na thundu yanga. ₁₉Ndi hone ndi tshi ḓo konou amba mbiluni nda ri: U na thundu nnzhi-nnzhi ine wa ḓo ḽa miṅwaha na miṅwaha. Zwino-ha ḓiawetshele zwau, u ḽe, u nwe wo takala.’ ₂₀A tshi kha ḓi tou ralo Mudzimu a vha a tshi amba nae a ri, ‘Tsilu ndiwe, a u zwi ḓivhi uri vhusiku honovhu o u ṋeaho vhutshilo u ḓo vhu vhila? Zwino iyo thundu ye wa vha u tshi khou ḓi i vhulunga u swika zwino i ḓo ḽiwa nga nnyi?’ ₂₁Zwo ralo na kha muthu ane a ḓikhokhela lupfumo lwa shango ngeno a songo pfuma zwa Mudzimu.”

₂₂A konou amba na vhafunziwa vhawe a ri, “Ndi zwone zwine nda ri ni songo ṱolou ḽa mbilu nga zwine na lila vhutshiloni haṋu na ri ri ḓo ḽani? ri ḓo ambarani? ₂₃Kani vhutshilo a vhu fhiri zwiḽiwa? Muvhili a u fhiri zwiambaro kani? ₂₄Edzonu sedza mahunguvhu: ha limi, ha na tshine a kaṋa; ha na zwiṱaṱari na maḓulu, naho zwo ralo Mudzimu u ḓi a ṋea zwiḽiwa. Zwino inwi a ni fhiri zwiṋoni kule naa? ₂₅Ndi nnyi waṋu ane nga u ḽa mbilu hawe a nga lapfisa vhutshilo hawe naho hu nga ḓuvha ḽithihi zwaḽo naa? ₂₆Zwino arali ni tshi tou kundwa nga izwi zwithu zwiṱukuṱuku, ni kha ḓi vhuya na ḽelani mbilu nga izwi zwiṅwe? ₂₇Lavhelesani kualutshele kwa maluvha a phendephende. Ha shumi, ha koni u ḓiitela zwiambaro. Hone ndi a ni vhudza ndi ri: Solomoni na madzanga áwe ho ngo vhuya a ḓiṱama unga ḽiṅwe ḽao. ₂₈Arali hatsi vhune ṋamusi ha titima mudavhini, matshelo ha vha ho no kudzwa tshivhasoni, Mudzimu a tshi vhu ṱama nga u rali, inwi a nga kundwa ngani u ni ṱama? Ni dinwa nga lutendo luṱuku! ₂₉Ni songo dzula ni tshi humbula zwine na fanela u ḽa na u nwa na ṱolou ḽa mbilu. ₃₀Hezwo ndi zwithu zwine zwa vhilaelwa nga vhannḓa; arali e inwi Khotsi aṋu u a ḓivha uri ni a zwi lila. ₃₁Tsha khwiṋe lwelani u vhuswa nga Mudzimu, hezwo zwiṅwe ni ḓo tou ingwa.

₃₂“Asizwo-ha inwi kuṱambi kwanga, ni songo ofha tshithu, Khotsi aṋu o ḓiimisela u ni ita maḽaifa muvhusoni wawe. ₃₃Rengisani thundu yaṋu, tshelede ni tonde ngayo vhashai. Ḓiṱoḓeleni zwipatshi zwi sa ṱahali, zwa lupfumo lu sa fheli lwa ngei ṱaḓulu; hune ha sa ḓo vhuya ha sendela fobvu kana ha dzhena tshifheṱi. ₃₄Hu re na lupfumo lwau ndi hune na mbilu yau ya vha hone.

₃₅“Vhofhani dzi khwaṱhe, ni dzule no funga mbone dzaṋu; ₃₆ni nge vhathu vho lindelaho u vhuya ha muṋe wavho hayani a tshi bva munyanyani, uri a tshi tou khokhonya vha mbo ḓi mu vulela. ₃₇Vha na mashudu vhalanda vhane muṋe wavho a tshi vhuya, a wana vha songo eḓela; Nṋe ndi ri u ḓo ganya zwiambaro zwawe a vha dzudza ḓafulani, a vha kanzwa. ₃₈Vha ḓo vha na mashudu arali a ri a tshi ḓa vhukati ha vhusiku kana nga maḓautsha a ḓi wana vho fhaṱuwa. ₃₉Kani a ni ḓivhi uri arali muṋe wa nnḓu o dzula o zwi ḓivha uri fobvu ḽi ḓo ḓa lini, a nga linda nnḓu yawe uri i si dzhenwe? ₄₀Na inwi ni dzule no ḓilugisa; Mubebwa-nga-muthu u ḓo ḓa ni songo humbula.”

₄₁Ndi hone Pitrosi a tshi mu vhudzisa a ri, “Muṋe wanga, nṋa itsho tshifanyiso tshi khou amba riṋe fhedzi kana vhathu vhoṱhe?” ₄₂Muṋe washu a mu fhindula a ri, “Zwino mukoma a fulufhedzeaho wa vhuṱali ri ḓo ri ndi nnyi? Ndi amba ane muṋe wawe a ḓo mu ita ene mulangi wa zwoṱhe zwa muṱani wawe, uri a ṋee vhathu zwiḽiwa nga tshifhinga tshazwo? ₄₃U na mashudu mushumi ane muṋe wawe a tshi vhuya, a wana a tshi kha ḓi ita nga u ralo. ₄₄Nṋe ndi ri: hoyo muthu muṋe wawe u ḓo mu ita mukoma kha zwoṱhe zwi re zwawe. ₄₅Hone arali uyo mushumi a nga amba nga mbilu a ri, ‘Hufha muṋe wanga a tshi khou lenga u vhuya,’ a thoma u fara vhashumi ngae vha vhanna na vha vhasadzi a tshi vha rwa, a tshi ḓiḽela a tshi kambiwa, ₄₆u ḓo tshenuwa muṋe wawe o vhuya musi a songo humbula, nga tshifhinga tshine a si vhuye a tshi ḓivha, a mu itela tshiṱuhu tshihulu ha vha u mu baḓekanya na vha sa fulufhedzei. ₄₇Mushumi ane a ḓivha zwine muṋe wawe a zwi ṱoḓa, hone a si zwi ite, a si dzule o ḓilugisa, u ḓo wana ṱhamu nnzhi; ₄₈hone mushumi ane a sa ḓivhe zwine muṋe wawe a ṱoḓa, a vho ita zwo eḓanwaho nga ṱhamu, u ḓo wana ṱhamu dzi si gathi. We a ṋewa zwinzhi, hu ḓo ṱoḓwa zwinzhi khae; we a kumedzwa zwinzhi, hu ḓo ḓi vhilwa zwinzhi khae.”

₄₉“Ndo ḓa u funga shango nga mulilo! Ngavhe khavhu yawo i vhe yo no ḽi ṱanganya ndo vha ndi tshi ḓo takala hani! ₅₀Hu na ndovhedzo ine nda fanela u thoma u lovhedzwa ngayo, hone mbilu yanga i swa hani zwi sa athu khunyelela. ₅₁Kani ni vhona unga Nṋe ndo ḓela u ladza shango? Aiwa, Nṋe ndo ḓisa mufhirifhiri. ₅₂U bva ṋamusi vhathu vhe vhaṱanu muḓini vha ḓo fhiriṱana, vhavhili vha ima nga ngeno vhararu vha ima nga ngei, vha lwa. ₅₃Vha ḓo fhiriṱana,

₅₄Yesu a tshi amba-vho na mavhuthu a ri, “Musi ni tshi vhona gole ḽi tshi takuwa vhukovhela, ni mbo ḓi ri, ‘Hu ḓo na mvula ya tshirulu,’ nangoho zwa ralo. ₅₅Arali hu na muya wa tshipembe na ri, ‘Ḽi ḓo fhisa fhasi ha tou duga,’ nangoho zwa ḓi ralo. ₅₆Ṋowa ndinwi! Khezwi ni tshi kona u ṱalukanya zwa matshele; zwino u ṱalukanya tshifhinga itshi zwi ni kunda ngani?

₅₇“Ni itwa ngani ni sa koni u vhona uri zwine na fanela u ita ndi zwifhio? ₅₈Musi ni tshi khou ya khoroni na o ni hwelelaho, lusani u pfumedzana nae ni tshee nḓilani uri a sa ḓo ni isa ha muhaṱuli, uyo a ni kumedza mapholisa, one a ni kudza dzhele, ₅₉hune ni sa ḓo vhuya na bva ni sa athu lifha, na lifha na sennde ya u fhedzisela.”