LUKASI 15

₁Ha ḓi ḓa vhathelisi vhanzhi na vhatshinyi vha tshi ḓa u thetshelesa Yesu a tshi funza. ₂Vhafarisei na vhaḓivhi vha Mulayo vha thoma u gungula vha ri, “Muthu uyu u konana na vhatshinyi, a ita na u ḽa navho!” ₃Ndi hone Yesu a tshi vha vhudza tshifanyiso hetshi a ri, ₄“Nṋa arali muṅwe waṋu e na nngu dza ḓana, a xedza nthihi yadzo u ita mini? Ha sii dza 99 pfuloni a yo ṱoḓa iḽa nthihi yo xelaho a vhuya a i wana naa? ₅Musi o i wana, u i hwala mahaḓani awe o takala. ₆A tshi swika hayani a ramba khonani dzawe na vhahura vhawe, a vha vhudza a ri, ‘Ndi takala hani vha hashu ndó wana nngu yanga ye ya vha yo xela. Iḓani ri pembele!’ ₇Na ngei ṱaḓulu zwo tou ralo; musi mutshinyi muthihi a tshi rembuluwa hu vha na dakalo ḽihulu u fhira hu tshi sokou vha na vhavhuya vha 99 vhane u rembuluwa vha si tsha hu lila.

₈“Kana ri fanyise nga musadzi a re na masheleni a fumi; arali a xedza sheleni nthihi yao u ita mini? Ha fungi luvhone na, a swiela na nnḓu, a tshi ṱoḓa a tshi tou sedzesa a vhuya a i wana naa? ₉Musi o i wana u vhidza khonani dzawe na vhahura, a vha vhudza a ri, ‘Ndi takala hani vha hashu ndó wana sheleni yanga ye ya vha yo xela. Iḓani ri pembele!’ ₁₀Ndi tshi tou ni vhudza-vho, na ṱaḓulu zwo tou ralo. Vharuṅwa vha Mudzimu vha tou pembela musi mutshinyi muthihi o rembuluwa.”

₁₁Yesu a dovha a ri, “Ho vhuya ha vha na muṅwe munna we a vha e na vhana vhavhili vha vhatuka. ₁₂Murathu a amba nae a ri, ‘Muṋe wanga, nṋe nga vha mphe mukovhe wanga wa thundu.’ Ndi hone uyo munna a tshi kovhekanya vhana vhawe thundu yawe. ₁₃Hu sa athu fhela maḓuvha manzhi murathu a rengisa thundu yawe a dzhia tshelede a ṱuwa. A ya shangoni ḽa kule-kule, a tambisa tshelede yawe nga vhuhwarahwara. ₁₄Iḽa tshelede yo no fhela, ha mbo wa nḓala khulu shangoni ḽeneḽo, huno na ene a thoma u tambula. ₁₅Ndi hone a tshi yo ḓifuwisa kha muṅwe muthu wa ḽeneḽo shango, a wana mushumo wa u lisa nguluvhe. ₁₆A tama na u tou ḽa zwawe mbeu dza miri dzi ḽiwaho nga nguluvhe, huno na dzone a si fhiwe. ₁₇Ndi hone a tshi vho dzivhuluwa, a ambela mbiluni a ri, ‘Vhashumi vha khotsi anga vha na zwiḽiwa zwinzhi zwine vha ḽa vha ita na u laṱa, nṋe fhano ndi tshi khou fa nga nḓala! ₁₈Ndi tou ndo ṱuwa zwino nda ya ha khotsi anga nda swika nda ri: Muṋe wanga, ndo khakhela Waṱuḓulu na vhone; ₁₉a tho ngo tsha fanela na u tou pfi ṅwana wavho; ndi khou humbela uri vha tou nṱanganedza zwanga ndi vhe muṅwe wa vhashumi vhavho.’ ₂₀Ndi hone a tshi mbo ḓi takuwa a ya ha khotsi awe.

“Khotsi awe vha mu vhona a tshee kule. Mbilu ya mukalaha ya khathuwa, a mbo ḓi gidima a swika a mu kuvhatedza. ₂₁Ṅwana a amba na khotsi awe a ri, ‘Muṋe wanga, ndo khakhela Waṱaḓulu na vhone; a tho ngo tsha fanela na u tou pfi ṅwana wavho.’ ₂₂Hone khotsi vha vhidza vhashumi vhavho vha ri, ‘Ṱavhanyani ni ḓise tshiambaro tsho nakaho ni mu ambadze, ni mu ambadze na rinngi na navhula. ₂₃Ni konou dzhia mbohwana yo noniswaho ni i ṱhavhe, ri ite vhuṱambo. ₂₄Ṅwana wanga hoyu o vha o fa, zwino u a tshila; o vha o xela, zwino o wanala.’ Vhuṱambo ha mbo ḓi ṱangana.

₂₅“Hezwo zwoṱhe zwi tshi khou itea, mukomana o vha e masimuni. Huno a tshi vhuya a tshi vho sendela tsini ha nnḓu a pfa yo ṱangana hu tshi ri u imba, he u tshina. ₂₆Ndi hone a tshi vhidza muṅwe mushumi a mu vhudzisa a ri, ‘Nṋa ndi mini izwo?’ ₂₇Mushumi a fhindula a ri, ‘Murathu waṋu o vhuya, zwino khotsi aṋu vho takala nge a vhuya o takala, ndi tshi amba zwino na mbohwana yo noniswaho yo no ḓi wa nga luṋanga.’ ₂₈Mukomana a sinyuwa lwe a si fune na u dzhena afho nḓuni. Ndi hone khotsi awe a tshi bva a mu kwengweledza. ₂₉Ene a amba na khotsi awe a ri, ‘Hufha nṋe ndo vha shumela miṅwaha minzhi-minzhi ndi tshi tou nga phuli, ndi sa pfuki na tshithihi tshe vha amba. Naho zwo ralo ndi mini tshe vha vhuya vha mpha-vho? Ndi amba na mbudzana zwayo ya u tou ri ndi ḽe-vho na khonani dzanga ro takala. ₃₀Zwino uyu ṅwana wavho we a tambisa thundu yavho na dziphombwe u tou bvelele vha mbo ḓi mu ṱhavhela kholomo yo noniswaho!’ ₃₁Khotsi awe a mu fhindula a ri, ‘Ṅwananga, inwi hufha ni na nṋe misi yoṱhe; nahone zwoṱhe zwine nda vha nazwo zwi zwaṋu! ₃₂Riṋe ro vha ro fanela u takala ra pembela, ngauri uyu murathu waṋu o vha o fa, zwino o vuwa; o vha o xela, zwino o wanala.’ ”