MATIOSI 12

₁Misi yeneyo Yesu a tshi khou fhira nga vhukati ha masimu a goroi nga Sabatha, vhafunziwa vhawe vha pfa nḓala vha thoma u ṱhukhula-ṱhukhula ṱhotshe dza goroi vha swoṱa vha ḽa. ₂Vhafarisei vha tshi zwi vhona vha mu vhudza vha ri, “Kha vha vhone zwine vhafunziwa vhavho vha khou ita! Mulayo a u tendi zwi tshi itwa nga Sabatha.” ₃Yesu a vha fhindula a ri, “Kani-ha a ni athu vhala a Dafita na khonani dzawe musi vho farwa nga nḓala, ₄a tshi dzhena nḓuni ya Mudzimu a ḽa vhurotho he ha vha ho sumelwa Mudzimu, ngeno Mulayo u sa tendi muthu a tshi ḽa musumo hoyo, na vhe vha vha vhe nae a u tendi vha tshi ḽa; hu ḽa vhotshifhe fhedzi? ₅Kani-ha a ni athu vhala Mulayoni uri nga Sabatha vhotshifhe vha a ḓi pfuka zwavho mulayo wa Sabatha thembeleni, zwi si vhe na mulandu? ₆Fhedzi ndi khou ni vhudza ndi ri: tshi fhiraho thembele tshi fhano. ₇Hone ngavhe ni vhe no ḓivha uri zwi amba mini hu tshi pfi, ‘Thi ṱoḓi nduvho, ndi ṱoḓa muthu a tshi vha na mbilutshilidzi,’ ndi musi ni songo sola vhathu vha si na mulandu. ₈Mubebwa-nga-muthu na yone Sabatha ndi Ene Muṋe wayo.”

₉Yesu a fhirela phanḓa a dzhena sinagogoni. ₁₀Henefho ho vha hu na munna o omaho tshanḓa. Vhafarisei vha tshi funa u hwelela Yesu vha mu vhudzisa vha ri, “Mulayo u a tenda muthu a tshi fhodzwa nga Sabatha naa?” ₁₁Hone Ene a vha fhindula a ri, “Ndi nnyi waṋu ane a ri nngu yawe nthihi fhedzi yo wela bidzini nga Sabatha a sa i ṋule? ₁₂Muthu ha fhiri nngu kani? Zwi amba uri Mulayo u a ri tendela u ita zwivhuya nga Sabatha.”

₁₃Ndi hone Yesu a tshi amba na uyo munna o omaho tshanḓa a ri, “Onyolosani tshanḓa tshaṋu.” A mbo tshi onyolosa tsha vhuelela ngonani tsha fana na tshiṅwe.

₁₄Zwo no ralo Vhafarisei vha mbo ḓi bva afho sinagogoni, vha yo ṱangana khoroni vha thoma u ita tshimbevha tsha u vhulaha Yesu.

₁₅Hone Yesu nga u ḓivha uri vha khou ṱoḓa u mu vhulaha a ṱuwa afho fhethu, a tevhelwa nga vhathu vhanzhi, a vha fhodza vhoṱhe, ₁₆a vha kaidza uri vha si vhudze muthu uri ndi Ene nnyi. ₁₇A tshi ralo ho vha hu u khunyeledza zwo ambiwaho nga muporofita Yesaya a tshi ri,

₂₂Zwenezwo vha mu ḓisela muthu wa bofu we a vha e tshimuma, e na thuṅwa ya Saṱhane. A mu fhodza, a vho kona u amba na u vhona. ₂₃Vhathu vhoṱhe vha akhamala vha ri, “Nṋa uyu a si ene uḽa Murwa wa Dafita we a pfi u ḓo ḓa?” ₂₄Hone Vhafarisei vha tshi zwi pfa vha ri, “Hoyu munna u pandela thuṅwa nga maanḓa a Belesebulu khosi yadzo, a hu na zwiṅwe.” ₂₅Hone Yesu nga u ḓivha mihumbulo yavho a amba navho a ri, “Arali muvhuso wa ḓifhandekanya wa bva zwigwada zwivhili, zwa lwa nga tshazwo, tshawo ndi u wa. Arali muḓini kana nḓuni ha bva zwigwada zwivhili zwa lwa nga tshazwo, a zwi nga imi. ₂₆Arali Saṱhane a tshi pandela Saṱhane zwi amba uri o no bva zwigwada zwivhili zwine zwa lwa nga tshazwo. Zwino muvhuso wawe u nga ima hani?

₂₇“Arali Nṋe ndi tshi pandela thuṅwa nga maanḓa a Belesebulu, vhafunziwa vhaṋu vha dzi pandela nga maanḓa a nnyi? Ndi zwine vhenevho vha ḓo sumbedza uri zwine na amba a si zwone.

₂₈“Hone vhunga zwi khagala uri Nṋe ndi pandela thuṅwa nga maanḓa a Muya wa Mudzimu, ndi tshiga tsha uri muvhuso wa Mudzimu wo swika kha inwi.

₂₉“Ndi nnyi ane a nga sokou dzhena nḓuni ya munna wa vhuhali a kumba thundu yawe? U fanela u thoma u vhofha uyo muhali, ndi hone a tshi ḓo kona u mu ṱangula.

₃₀“Muthu ane a sa ime na Nṋe u lwa na Nṋe; a sa kuvhanganyiho sambi na Nṋe u a ḽi fhaḓa.

₃₁“Ndi zwine nda ni vhudza nda ri: muthu a nga hangwelwa vhutshinyi hoṱhe, naho a sasaladza Mudzimu. Hone ane a sasaladza Muya Mukhethwa a nga si hangwelwe. ₃₂Na ane a amba Mubebwa-nga-muthu nga ḽivhi a nga kha ḓi hangwelwa. Hone ane a vhuya a nyefula Muya Mukhethwa, hu vhutshiloni vhuno, hu vhutshiloni vhu ḓaho, a nga si vhuye a hangwelwa.

₃₃“Arali ni tshi ri muri ndi wavhuḓi, ni fanela u ḓi ralo na mitshelo yawo; arali ni tshi ri muri a si wavhuḓi, ni fanela u ḓi ralo-vho na mitshelo yawo. Hufha muri u tshi ḓivhiwa nga mitshelo yawo.

₃₄“Dziṋowa ndinwi! Ni nga kona hani u amba zwivhuya ni vhavhi? Tshe mulomo wa amba ndi tshe mbilu ya amba. ₃₅Muthu muvhuya u bvisa zwivhuya tshisikuni tsha mbilu yawe i re mbuya, muthu muvhi u ḓi bvisa-vho zwithu zwivhi tshisikuni tsha mbilu yawe mmbi. ₃₆Ndi khou ni vhudza ndi ri: Nga ḓuvha ḽa khaṱhulo muthu u ḓo sengiselwa zwoṱhe zwe a sokou amba-amba. ₃₇U ḓo vhofhololwa nga maipfi au, wa vhewa mulandu nga maipfi au.”

₃₈Ndi hone vhaṅwe vhaḓivhi vha Mulayo na Vhafarisei vha tshi amba nae vha ri, “Vhafunzi, kha vha ri itele maḓembe.” ₃₉Hone Ene a tshi vha fhindula a ri, “Vhane vha ṱoḓa maḓembe ndi vhathu vhavhi vho furalelaho Mudzimu. A vha tsha ḓo vhona maṅwe arali e si aḽa a muporofita Jonasi. ₄₀Jonasi o fhedza maḓuvha mararu na vhusiku hao e thumbuni ya khovhe ya vhimbi, Mubebwa-nga-muthu u ḓo fhedza maḓuvha mararu na vhusiku hao e ngomu tshaloni nga u ralo. ₄₁Nga ḓuvha ḽa khaṱhulo vhanna vha Ninive vha ḓo vuwa khathihi na vhathu vha musalauno vha vha rovhedza, ngauri vhone vho laṱa vhuvhi havho musi vho pfa Jonasi a tshi vha ḓivhadza mafhungo a Mudzimu, huno tshi fhiraho Jonasi tshi fhano. ₄₂Nga ḓuvha ḽa khaṱhulo khosi ya musadzi i bvaho Tshipembe i ḓo ḓa khoroni u rovhedza vhathu vha musalauno, ngauri ene o tou tshimbila a zwi pfa a tshi bva vhusendekamisi a tshi yo pfa vhuṱali ha Solomoni. Zwino ipfani-ha: tshi fhiraho Solomoni tshi fhano.

₄₃“Thuṅwa ya Saṱhane arali i tshi bva muthuni i buḓekanya masoga i tshi ṱoḓa ha u awela i si hu wane. ₄₄Ya konou ri, ‘Ndi ḓo vhuelela nḓuni yanga ine nda bva khayo.’ I tshi swika ya wana uḽa muthu a tshi tou nga nnḓu i si na muthu, yo swielwa, na thundu dzo vhekanywa zwavhuḓi. ₄₅Zwenezwo i mbo yo dzhia dziṅwe thuṅwa ṱhanu na mbili dza vhuhali u fhira yone, dza ḓa dza dzhena kha uyo muthu dza dzula khae, mafhungo a vho vhifha u fhira mulovha. Na kha vhathu vhavhi avha vha musalauno zwi ḓo ralo.”

₄₆Yesu a tshi kha ḓi amba na vhathu ha swika mme awe na vharathu vhawe, vha ima nnḓa vha tshi ṱoḓa u amba nae. ₄₇Muṅwe a mu vhudza a ri, “Mme avho na vharathu vhavho khevho afha nnḓa vha khou ṱoḓa u amba navho.” ₄₈Hone Yesu a fhindula muthu o mu vhudzaho hezwo a ri, “Mme anga ndi nnyi? Vharathu vhanga ndi vhonnyi?” ₄₉A konou sumba vhafunziwa vhawe a ri, “Mme anga na vharathu vhanga ndi havha! ₅₀Ane a ita zwine Khotsi anga wa ṱaḓulu a zwi funa, ndi ene murathu wanga, ndi ene khaladzi anga, ndi ene mme anga.”