MIRERO 16

₁Mbilu ya muthu i vhamba maano;

Muṋe washu a vha Ene Ambadzifhele.

₂Muthu u vhona nḓila dzawe dzoṱhe dzi sa solisei;

a no sedza mbilu ndi Muṋe washu.

₃Mishumo yau yoṱhe i kumedze Muṋe washu,

ndi hone zwe wa dzudzanya zwi tshi ḓo pfumba.

₄Tshiṅwe na tshiṅwe tshi na zwe Muṋe washu

a tshi itela zwone;

na ene muvhi, ene o itelwa musi wa khombo.

₅Muṋe washu u nyala mudzia-u-ḓihudza;

na kathihi ha nga litshi u lifhedzwa.

₆Mulandu u lixwa nga u vha na lufuno na u fulufhedzea;

muthu u tinya vhuvhi nga u ofha Muṋe washu.

₇Arali nḓila dzau dzi tshi takadza Muṋe washu,

na maswina au u ḓo a pfumedzanya na iwe.

₈Ndi khwiṋe a vha na zwi si gathi zwe wa zwi wana nga pfanelo,

u fhira u wana lupfumo lunzhi nga vhufhura.

₉U nga ḓi elekanya zwine wa funa u ita;

a no u endedza ndi Muṋe washu.

₁₀Khosi ndi mulomo wa Mudzimu;

a tshi haṱula a songo khakha.

₁₁Muṋe washu u ṱoḓa tshikalo tshi sa fhuri;

ndeme dzo tiwa nga Ene.

₁₂Mahosi a nengwa zwiito zwivhi;

khuluṋoni yo tikwa nga u fulufhedzea.

₁₃Mahosi a takalela milomo i si na vhufhura;

muthu a no amba ngoho vha a mu funa.

₁₄Mbiti dza khosi ndi muḓinḓa wa lufu;

muthu wa vhuṱali u a dzi dzikisa.

₁₅Tshifhaṱuwo tsha khosi tshó tsha ri a tshila;

á u takalela zwi nga makole a mvula dza tseula.

₁₆Vhuṱali vhu fhira musuku kule;

ṱhalukanyo i takadza u fhira siliva.

₁₇Vha si na vhufhura vha fara i no tinya vhuvhi;

ane a tshila nga vhusedzi u a ḓilondola.

₁₈U ḓihudza hu ṱula u fa;

u ḓiḓivha hu ṱula u wa.

₁₉Ndi khwiṋe u ḓibaḓekanya na vhashai,

u fhira u kovhekana thundu dza vhuvemu na vhadzia-u-ḓihudza.

₂₀Ane a thetshelesa a tshi laiwa zwi ḓo mu nakela;

wa mashudu ndi ane a fulufhela Muṋe washu.

₂₁Muṱali u pfi u na vhusedzi;

maipfi a vhulenda a tikedza ndayo.

₂₂Ṱhalukanyo ndi tshisima tshi ṋeaho vhutshilo;

tsilu ḽi tshi laiwa ḽi vhuelwa nga vhutsilu fhedzi.

₂₃Mbilu ya muṱali i langa mulomo wawe;

maipfi awe a tikedza ndayo.

₂₄Maipfi a vhulenda ndi tshigili tsha mutoli;

a a ḓifha, a a fhodza.

₂₅Hu na nḓila ine muthu a tshi i sedza a vhona i yone-yone,

ya fhedza nga u mu isa lufuni.

₂₆Nḓala i a shumisa;

mala a tshi lila a a u khada.

₂₇Muthu a sa ḓivhalei u luka vhunwa;

nyambo yawe i nga mulilo

u rungunyisaho.

₂₈Nduṱa i luṱanya vhathu;

mudziazwitshele u fhambanya dzikhonani.

₂₉Mudzianndwa u kunga vhaṅwe,

a vha isa nḓilani i si yavhuḓi.

₃₀Ane a sinyedza nga maṱo ha tandi ḽi no fukwa;

ane a kongomedza u ḓisa zwo vhifhaho.

₃₁Mmvi ndi tshiala tsha vhugala,

dzi wanwa nga vha no thetshelesa Mudzimu.

₃₂A sa fheli mbilu u fhira muhali;

hu ḓi nga ane a langa mbiti dzawe a tshi fhira ane a thuba miḓi.

₃₃Madeṅwa a itwa nga vhathu;

mulangi wao ndi Muṋe washu.