MIRERO 25

₂Mudzimu u rendelwa u dzumba mafhungo,

mahosi a khoḓelwa u ṱoḓisesa mafhungo.

₃Mbilu ya khosi a i ṱolei,

yo ṱanḓavhuwa unga maṱaḓulu,

ya tsisa unga lwanzhe.

₄Ha bviswa malambelo kha siliva hu sala zwine mufuli a fula;

₅ha bviswa vhavhi hune khosi ya vha hone,

ndi hone khuluṋoni yawe i tshi ḓo tikwa

nga khaṱhulo mbuya.

₆U songo ḓihudza maṱoni a khosi,

u songo vhanga vhudzulo vhukati ha vhahulwane;

₇ndi khwiṋe muthu a tshi tou pfi,

“Kha vha ḓe ngeno phanḓa!”

u fhira u ṱukufhadzwa

nga u pfi a sendelele a mu fhiraho.

₈Zwe wa zwi vhona nga maṱo au

u songo ṱavhanya u zwi hwelela khoroni;

zwino arali muṅwe a u shonisa u ḓo fhedza nga u itani?

₉Arali u na nndwa na muthu u songo dzumbulula

tshiphiri tsha muṅwe,

₁₀a sa ḓo ri u zwi pfa a u shonisa,

wa ḓi dzula na phungo mmbi.

₁₁Ipfi ḽo teaho nga tshifhinga tsho teaho

ḽi nga maapula a musuku o vhewa kha mudzio wa siliva.

₁₂Muṱali a tshi kaidza tshi na nḓevhe zwi nga tshiṅina tsha musuku

na geḓane ya musuku.

₁₃Muḓinḓa a fulufhedzeaho

u netulusa mbilu dza vhaṋe vhawe

unga mukumbi ḽi tshi fhisa.

₁₄Muthu a no ṱongisa dzimpho dzine a si tsha ṋea muthu,

u nga makole na muya u sa ḓisi mvula.

₁₅Wa luvhelela muvhusi u sa fheli mbilu,

a nga vhuya a tenda;

lulimi lwa vhulenda lu vunḓa shambo.

₁₆Wa wana mutoli itou ḽa wo eḓanaho;

wa ḽesa u ḓo ṱanza.

₁₇U songo dalesa nḓuni ya khonani yau,

u sa ḓo mu netisa a vho u vhenga.

₁₈Muthu ane a ṱanzilela mazwifhi,

ndi thonga, ndi pfumo,

ndi musevhe wo ṱuṱulwaho.

₁₉U ḓitika nga muthu a sa fulufhedzei musi wa khombo,

zwi nga ḽiṋo ḽo sinaho,

zwi nga mulenzhe wa tshihole.

₂₀U imbela muthu nyimbo dza dakalo ó vhaisala mbiluni,

zwi nga muthu a tshi bvula tshiambaro musi wa phepho,

zwi nga u phupha mbonzhe nga muṋo.

₂₁Arali swina ḽau ḽi na nḓala,

ḽi fhe zwiḽiwa ḽi ḽe:

arali o farwa nga ḓora,

mu fhe maḓi a nwe,

₂₂ndi hone a tshi ḓo sala o tou niwa nga ṱhoni,

Muṋe washu a ḓo konou u pfufha.

₂₃Zwitshele zwi sinyusa vhathu,

unga muya wa devhula u tshi ḓisa mvula.

₂₄Ndi khwiṋe u dzula ṱhangani ya nnḓu

u fhira u dzula nḓuni na musadzi wa luambo.

₂₅Mafhungo a takadzaho a tshi bva shangoni ḽa kule,

a nga maḓi a tshi rothodza mikulo yo omaho.

₂₆A no thetshelesa Mudzimu a vhuya a tenda u xedzwa nga muvhi,

zwi nga tshisima tsho dzikuwaho,

zwi nga bidzi i re na mashika.

₂₇U huliseswa zwi nga u ḽesa mutoli.

₂₈Munna a sa koni u ḓilanga

u nga muḓi wa mitsheṱo yo pwashiwaho.