DZIPHISALEMA 104

₁Kha ndi rende Mudzimu wanga,

u muhuluhulu!

Wo ḓiputela nga vhurena na vhugala.

₂Wo fuka tshedza unga nguvho;

u akha lutombo unga dennde,

₃wa fhaṱa pfamo yau nṱha ha maḓi a makoleni,

wa namela makole a nga ndi gariki yau,

wa fhufha nga phapha dza muya.

₄Maḓumbu ndi vhone vhaḓinḓa vhau,

khavhu dza mulilo ndi vhashumeli vhau.

₅Wo fhaṱa shango nṱha ha muteo waḽo,

ḽi nga si vhuye ḽa sudzuluswa.

₆Wo ḽi fukedza lwanzhe lwa nga nguvho,

maḓi a tiba dzithavha.

₇Hone Iwe wo ri u kaidza,

maḓi a shavha,

a ri u pfa mubvumo wau a ṱuwa nga luvhilo;

₈a fhufha dzithavha nga nṱha,

a tsela magovhani,

fhethu he wa ri a ye hone.

₉Wo a vhetshela mukano,

a nga si u pfuke;

ha tsha ḓo dovha a tibedza ḽifhasi.

₁₀U ita uri zwisima zwi gubunyee,

zwi ele milongani vhukati ha dzithavha.

₁₁Zwi ṋea phukha dza ḓaka maḓi,

mbiḓi dza dzimula ḓora.

₁₂Zwiṋoni zwi fhaṱa zwiṱaha tsini ha maḓi;

zwi imba vhukati ha matavhi.

₁₃U shasha dzithavha u pfamoni yau ngei ṱaḓulu,

ḽifhasi ḽa nwa la kama nga zwe wa ḽi ṋea.

₁₄U medzela kholomo hatsi,

vhathu wa vha medzela zwimela vha lima,

ḽifhasi ḽa bveledza zwiḽiwa:

₁₅waini i no takadza mbilu ya muthu,

mapfura a no penyisa tshifhaṱuwo tshawe,

na vhuswa vhu no tika mbilu ya muthu.

₁₆Miri ya Muṋe washu i sheledzwa ya pfelela,

yone mikedara ya Libanoni ye a i ṱavha.

₁₇Zwiṋoni zwi fhaṱa zwiṱaha zwazwo henefho,

gololwane ḽa dzula ṱhodzini dzayo.

₁₈Thavhani ndapfu hu dzula ngululu,

mbila dzi dzumbama nngwani.

₁₉Wo vhumba ṅwedzi,

u kala ṅwaha ngawo;

ḓuvha ḽi a ḓivha uri ḽi kovhela lini.

₂₀U ḓisa swiswi ha vha vhusiku,

phukha dzoṱhe dza ḓaka dza bvela nnḓa.

₂₁Ndau dzi a vhomba dzi tshi zwima;

dzi ṱoḓa zwiḽiwa zwadzo kha Mudzimu.

₂₂Ḓuvha ḽi tshi bva dzi yo dzumbama,

dza humela vhulaloni hadzo.

₂₃Muthu u bva a yo shuma,

a shuma u swika nga lufhimavhaeni.

₂₄Muṋe washu,

mishumo yau yo anda hani!

Yoṱhe wo i ita nga vhuṱali;

ḽifhasi ḽo ḓala zwivhumbwa zwau.

₂₅Lwanzhe ngolu, lwo hula hani,

lwo aṱama hani!

Lu na mutshatshame wa zwivhumbwa zwi si na mbalo,

zwi tshilaho, zwihulwane na zwiṱuku.

₂₆Henefho zwikepe zwi a tshimbila,

zwi tshi ṱuwa, zwi tshi vhuya,

na Liviathani ḽe wa ḽi vhumbela u ḓimvumvusa ngaḽo.

₂₇Zwoṱhe hezwo zwo lavhelesa Iwe,

uri u zwi ṋee zwiḽiwa zwazwo nga tshifhinga tsho teaho.

₂₈U tshi zwi ṋea zwi a doba;

u tshi zwi pakulela zwi fushea nga zwithu zwavhuḓi.

₂₉Arali wa zwi furalela, zwi a ofha;

u tshi zwi dzhiela mufemo, zwi a fa,

zwa vhuelela mavuni.

₃₀U tshi rumela Muya wau,

u a zwi sika,

ḽifhasi ḽa dovha ḽa vha ḽiswa.

₃₁Ngavhe vhugala ha Muṋe washu vhu tshi rendwa lini na lini;

ngavhe Muṋe washu a tshi takadzwa nga mishumo yawe.

₃₂A tshi sedza ḽifhasi, ḽi a tetemela;

a tshi kwama dzithavha, dzi duba vhutsi.

₃₃Ndi ḓo imbela Muṋe washu vhutshilo hanga hoṱhe;

ndi tshi kha ḓi tshila

ndi ḓo renda Mudzimu wanga nga nyimbo.

₃₄Ngavhe zwine nda elekanya

zwi tshi takadza Muṋe washu,

unga na nṋe a tshi ntakadza.

₃₅Vhatshinyi vhone ngavhe vha tshi nyamalala,

vhavhi vha si tsha vha hone fhano shangoni.

Kha ndi rende Muṋe washu!

Haleluya,

nga hu rendwe Muṋe washu!