DZIPHISALEMA 138

₁Ndi u renda nga mbilu yoṱhe.

Midzimu nga i zwi pfe zwayo –

nṋe ndi imbela Iwe.

₂Ndi ḓo u gwadamela

ndó livhana na thembele yau khethwa,

nda renda dzina ḽau;

lufuno lwau a lu dzinginyei,

u a fulufhedzea;

wo khunyeledza zwoṱhe zwe wa ri fulufhedzisa,

zwa fhira kule zwe ra vha ro zwi lavhelela,

naho ro vha ri tshi ḓivha maanḓa au.

₃Ndi tshi u vhidzelela wo mphindula,

wa nkhwaṱhisa nda vha na mbilutshinna.

₄Muṋe washu, mahosi oṱhe a ḽifhasi vha tshi pfa zwine wa amba,

nga vha u rende.

₅Nga vha imbe dza ndaela dza Muṋe washu;

vhugala ha Muṋe washu ndi vhuhulu.

₆Muṋe washu, na vhuhulu háwe ha litshi u londola muheḓana;

vhadzia-u-ḓihudza vhone u a vha ṱukufhadza e kule-kule.

₇Naho ndi tshi tshimbila tshivhindini tsha khombo,

u a ntshidza;

maswina anga ó ntsinyutshela,

u angaladza tshanḓa tshau tsha maanḓa wa ntshidza.

₈Muṋe washu u ḓo khunyeledza zwivhuya zwe a nnzudzanyela.

Muṋe washu, lufuno lwau a lu dzinginyei lini na lini;

u songo litsha u vuledza mishumo ye wa i thoma.