NZUMBULULO 21

₁Nda vhona ḽiṱaḓulu ḽiswa na ḽifhasi ḽiswa. Ḽiṱaḓulu ḽa u thoma na ḽifhasi ḽa u thoma zwo vha zwo nyamalala, na lwanzhe lu si tsheeho. ₂Nda vhona muḓi mukhethwa, wone Jerusalema muswa, u tshi tsela fhasi u tshi bva ha Mudzimu ngei ṱaḓulu, wo ṱamiwa wo fhelela, sa muselwa a tshi yo ṱanganedzwa nga munna wawe. ₃Nda pfa ipfi ḽihulu ḽi bvaho kha khuluṋoni ḽi tshi ri, “Zwino ndi hone Mudzimu nga dzawe a tshi vho dzula na vhathu. U ḓo dzula navho vha vha tshakha dzawe. Mudzimu nga eṱhe u ḓo dzula navho e Mudzimu wavho. ₄U ḓo vha fhuluṱa miṱodzi yoṱhe. Lufu a lu tsha ḓo vha hone, a hu tsha ḓo vha na zwililo kana u tshema kana u honḓa; zwa kale zwo fhela.” ₅Ndi hone uḽa o dzulaho kha khuluṋoni a tshi ri, “Zwino zwithu zwoṱhe ndi zwi ita zwiswa.” A dovha a amba na nṋe a ri, “Ṅwala, ngauri zwine nda amba ndi ngoho, zwi ḓo itea.”

₆A dovha a ri, “Zwo khunyelela! Ndi Nṋe Alfa na Omega, ndi Nṋe mathomo na magumo. A re na ḓora ndi ḓo mu tendela u nwa tshisimani tsha maḓi a ṋeaho vhutshilo, á songo bvisa tshithu. ₇A kundaho, mukovhe wawe ngoyu: ndi ḓo vha Mudzimu wawe ene a vha ṅwananga. ₈Magoswi one na vho guneaho na vho kumalaho na dziphondi na dziphombwe na vhaloi na vha no luvha midzimu na vhoṱhe vhadzia-u-zwifha, ho vha fanelaho ndi ishani ḽi dugaho mulilo na tsevhela. Ndi lwone lufu lwa vhuvhili.”

₉Muṅwe wa vhaḽa vharuṅwa vhaṱanu na vhavhili vhe vha vha vho fara madzhomela maṱanu na mavhili o ḓalaho madambudzo maṱanu na mavhili a u fhiledza, a ḓa a amba na nṋe a ri, “Iḓa ndi u sumbedze muselwa ane a ḓo vha mufumakadzi wa Ngwana.” ₁₀Nda pfa ndi Muyani, a nkhwala a nnyisa muṱumbani wa thavha ndapfu, a ntsumbedza Jerusalema, muḓi mukhethwa, u tshi khou tsela fhasi u tshi bva ha Mudzimu ṱaḓulu ₁₁u tshi tou penya vhugala ha Mudzimu. Wo vha u tshi penya sa tombo ḽa mutengo muhulu, ḽa jasipere i vhonadzaho. ₁₂Wo vha wo tingeledzwa nga mutsheṱo muhulu mulapfu u re na khoro dza 12, iṅwe na iṅwe yo lindwa nga muruṅwa. Henefho dzikhoroni ho vha ho ṅwalwa madzina a matsinde a 12 a Vhaisraele. ₁₃Sia ḽiṅwe na ḽiṅwe ḽo vha ḽi na khoro tharu: Vhubvaḓuvha tharu, Devhula tharu, Tshipembe tharu, Vhukovhela tharu. ₁₄Uyo mutsheṱo wo vha wo tewa kha matombo a 12, tombo ḽiṅwe na ḽiṅwe ḽó ṅwalwa dzina ḽa muapostola muthihi wa Ngwana. ₁₅Uḽa muruṅwa we a amba na nṋe o vha o fara luṱanga lwa musuku lwa u ela ngalwo, uri a ele muḓi na dzikhoro na mutsheṱo wawo. ₁₆Muḓi uyo wo vha u na masia maṋa a eḓanaho, vhuphara vhu tshi eḓana na vhulapfu. Muruṅwa a ela muḓi nga ulwo luṱanga, vhulapfu ha ita khilomitha dza 12 000, vhuphara na u ya nṱha zwi tshi ḓi eḓana na vhulapfu. ₁₇A ela na mutsheṱo, u ya nṱha zwa ita mithara dza 144 nga kuelele kwa vhathu, ngauri uyo muruṅwa o vha a tshi khou ela ngakwo.

₁₈Uyo mutsheṱo wo vha wo fhaṱwa nga matombo a jasipere, muḓi wone wó fhaṱwa nga musuku u songo vangwaho u vhonadzaho sa ngilasi. ₁₉Matombo a muteo wa mutsheṱo wa muḓi o vha o ṱamiwa nga matombo a mutengo muhulu a tshakha dzoṱhe. Tombo ḽa u thoma ḽa muteo ḽo vha ḽi jasipere, ḽa vhuvhili ḽi safire, ḽa vhuraru agathe, ḽa vhuṋa muroxwe, ₂₀ḽa vhuṱanu onikisi, ḽa 6 khanelia, ḽa 7 khwatsi ya tshirulwane, ḽa 8 berili, ḽa 9 thophasi, ḽa fumi krisophasi, ḽa 11 jasinthi, ḽa 12 amethisi. ₂₁Idzo khoro dza 12 dzo vha dzi nungu dza 12, iṅwe na iṅwe yo itwa nga nungu nthihi. Mukoto wa muḓi ndi wa musuku u songo vangwaho u vhonadzaho sa ngilasi.

₂₂Afho muḓini a tho ngo vhona thembele; thembele yawo ndi Muṋe washu Mudzimu Ramaanḓaoṱhe na Ngwana. ₂₃Uyo muḓi a u lili ḓuvha kana ṅwedzi uri u vhonetshelwe; khawo hu penya vhugala ha Mudzimu; luvhone lwawo ndi Ngwana. ₂₄Tshakha dzi ḓo dzula dzi tshi vhonetshelwa nga tshedza tshawo; mahosi a ḽifhasi a ḓo ḓisa lupfumo lwao khawo. ₂₅Khoro dzawo dzi ḓo dzula dzo vulea ḓuvha ḽoṱhe. A dzi nga vhuyi dza valwa, ngauri hu ḓo vha hu si na vhusiku fhethu afho. ₂₆Lupfumo na vhugala ha dzitshakha zwi ḓo ḓiswa muḓini uyo. ₂₇Henefho a hu nga dzheni na tshithihi tsho kumalaho; hu ḓi nga ane a ita zwi shonisaho kana ane a zwifha a nga si dzhene; vhane vha ḓo dzhena ndi vhe madzina avho a ṅwalwa buguni ya vha tshilaho, buguni ya Ngwana.