NZUMBULULO 3

₁“Ṅwalela muḓinḓa a re tshivhidzoni tsha Saradisi u ri, ‘Uḽa o fhiwaho mimuya miṱanu na mivhili ya Mudzimu khathihi na dziḽa ṋaledzi ṱhanu na mbili u ri: Zwoṱhe zwine na ita ndi a zwi ḓivha. Ndi ḓivha uri ni na dzina ḽa u pfi ni a tshila hu uri no fa.

₂“ ‘Karuwani-ha ni khwaṱhise zwenezwo zwine na kha ḓi vha nazwo, zwine na zwone zwa vho ṱoḓou fa; ngauri ndi tshi sedza zwine na ita ndi vhona zwo ṱahela, zwi sa fushi Mudzimu wanga.

₃“ ‘Zwenezwo shandukani ni elelwe zwe na funzwa na zwi pfa, ni zwi tevhedze. Arali na sa karuwa ndi ḓo ni ḓela sa fobvu, ni sa ḓivhi tshifhinga tshine nda ḓo swika ngatsho. ₄Hone hu kha ḓi vha na vhaṅwe vha si gathi vha songo tswukisaho zwiambaro zwavho. Ndi vhone vhane vha ḓo tshimbila na Nṋe vho ambara tshena, ngauri zwo vha fanela.

₅“ ‘Ane a ḓo kunda nndwani iyo u ḓo ambadzwa nguvho dzenedzo tshena. A thi nga vhuyi nda thutha dzina ḽawe buguni ya vha tshilaho. Ndi ḓo tou bula phanḓa ha Khotsi anga na vharuṅwa nda ri hoyu ndi wanga.

₆“ ‘A na nḓevhe nga a thetshelese zwine Muya a vhudza zwivhidzo.’

₇“Ṅwalela muḓinḓa wa tshivhidzo tsha Filadelfia u ri, ‘Uḽa a re mukhethwa, a re wa ngoho, o faraho khii ya Dafita, ane o vula hu si vhe na ane a vala, a ri u vala hu si vhe na ane a vula, u ri: ₈Zwoṱhe zwine na ita ndi a zwi ḓivha. Vhonani, ndo ni vulela muṋango une na muthu na muthihi a si kone u vala. Ndi a ḓivha uri a ni na nungo; naho zwo ralo no ḓi vhulunga ipfi ḽanga na si nndandule. ₉Ndi ḓo ni ṋea vhaṅwe vhane vha bva kha tshivhidzo tsha Saṱhane, vhadzia-u-zwifha vhane vha ri: Ri Majuda, hone vhe si vhone. Ndi ḓo ita uri vha ḓe vha gwadame phanḓa haṋu vha ni luvhe. Ndi hone vha tshi ḓo zwi ḓivha uri ndi a ni funa. ₁₀Vhunga no vhulunga ipfi ḽanga ḽa uri ni konḓelele, na Nṋe ndi ḓo ni vhulunga nga tshifhinga tsha milingo ine ya ḓo wela shango ḽoṱhe na vhathu vhaḽo. ₁₁A thi nga lengi u ḓa; inwi vhulungani zwine na vha nazwo hu si vhe na ane a ni dzhiela tshiala tshaṋu tsha u kunda. ₁₂Ane a kunda ndi ḓo mu ita phuphu nḓuni ya Mudzimu wanga, ha tsha ḓo dovha a bva khayo, u ḓo dzula henefho. Ndi ḓo ṅwala dzina ḽa Mudzimu wanga khae, khathihi na dzina ḽa muḓi wa Mudzimu wanga, wone Jerusalema muswa u bvaho ha Mudzimu wanga ngei ṱaḓulu, nda ṅwala na dzina ḽanga ḽiswa khae.

₁₃“ ‘A na nḓevhe nga a thetshelese zwine Muya a vhudza zwivhidzo.’

₁₄“Ṅwalela muḓinḓa a re tshivhidzoni tsha Laodikia u ri, ‘Uḽa Amen, a re ṱhanzi i fulufhedzeaho ine ya ḓi amba ngoho, we Mudzimu a sika zwoṱhe ngae, u ri: ₁₅Zwoṱhe zwine na ita ndi a zwi ḓivha: hu u fhisa a ni fhisi, hu u rothola a ni rotholi. Zwo vha zwi khwiṋe ni tshi fhisa kana ni tshi rothola zwaṋu. ₁₆Zwino ngauri a ni fhisi, na u rothola a ni rotholi, ni tou dudela, ndi ḓo ṱuwa ndi tshi ni pfela kule na bva haṋwani hanga.

₁₇“ ‘Ni ḓifhima na ri: Ro pfuma hani! A ro ngo pfuma zwone! A ri lili tshithu! Ni ro itwa nga u sa ḓivha uri ni a lilisa. Hufha ni vhashai. Hufha ni mabofu. Hufha no tou swoto, no sala fhedzi. ₁₈A si khwiṋe ni tshi ḓa kha Nṋe na renga musuku wo bviswaho manyelo nga mulilo na ḓo kona u vha vhapfumi vhukuma naa? Na renga na zwiambaro zwitshena na konou pila bunyu ḽaṋu ḽi shonisaho. Na renga na mushonga wa u ḓodza maṱoni uri ni kone u vhona.

₁₉“ ‘Nṋe vhoṱhe vhane nda vha funa ndi ita ndi tshi vha kaidza na u vha nyambudza. Zwino-ha na inwi shandukani ni litshe mahodze ni vuse nungo. ₂₀Ndi fhano, ndo ima muṋangoni, ndi khou khokhonya. Ane a pfa ipfi ḽanga a mmvulela, ndi dzhena nḓuni yawe ra dzula fhasi ra ḽa roṱhe.

₂₁“ ‘Ane a kunda u ḓo dzula na Nṋe kha khuluṋoni yanga ra vhusa roṱhe, unga na Nṋe ndo ri u kunda nda yo dzula na Khotsi anga kha khuluṋoni yawe ra vhusa roṱhe.

₂₂“ ‘A na nḓevhe nga a thetshelese zwine Muya a vhudza zwivhidzo.’ ”