VHAROMA 16

₁Ndi khou swikisa Vho-Foivhe, khaladzi ashu. Ndi mushumeli wa tshivhidzo tsha Khengria. ₂Ni vha ṱanganedze nga nḓila ine vhakhethwa vha Muṋe washu vha fanela u ṱanganedza muṅwe ngavho; ni vha farise kha tshiṅwe na tshiṅwe tshine vha lila; ndi mutondi wa vhanzhi, na nṋe vho ḓi ntonda.

₃Phriska na Akwila vhe ra shumisana mushumoni wa Khristo Yesu vha vhe hone. ₄Ndi vhone vhe vha vhuya vha ḓifunga vha wela khomboni he vha vha vha tshi nga kha ḓi fa, vha tshi itela u ntshidza. A si nṋe fhedzi ane nda vha livhuha kha hezwo; na zwivhidzo zwoṱhe zwa vhannḓa zwi a vha livhuha. ₅Na tshivhidzo tshi kuvhanganaho nḓuni yavho tshi vhe hone. Ndi sa hangwi na khonani yanga Ephinethosi ane nda mu funa, ene tanzhe ḽa vha Khristo shangoni ḽa Asia. ₆Na Maria a vhe hone, muthu we a ḓinetisa tshoṱhe a tshi ni shumela; ₇na Andronikosi na Juniasi, Majuda sa nṋe, vhe nda vha ndi navho dzhele, vhanna vha ḓivheaho kha vhaapostola. Vhone vho vha Vhakhriste nṋe ndi sa athu. ₈Na Ampliatosi, khonani yanga nge ra vha vha Muṋe washu roṱhe, a vhe hone, ₉na Urbanosi we ra vhuya ra shumisana mushumoni wa Khristo, na Stakisi khonani ine nda i funa. ₁₀Ni songo hangwa Apelesi, we a vhonala a tshi fulufhedzea kha u shumela Khristo; na vha ha Aristobulosi; ₁₁na Herodioni uḽa a re Mujuda sa nṋe; na vha ha Narkisosi vha re vha Muṋe washu; ₁₂na Thraifina na Thraifosa, vhashumi vha biko kha zwa u shumela Khristo; na Pheresisi khaladzi anga ane nda mu funa, we a shumela Muṋe washu zwinzhi; ₁₃na Rufasi uḽa Mukhriste a ḓivheaho wa Muṋe washu, khathihi na mme awe vhe vha tou mpfara sa ṅwana wavho. ₁₄Na Asinkritosi a vhe hone, na Flegoni na Hermesi, na Phathrobasi, na Hermasi, na vhoṱhe vhatendi vha re navho; ₁₅na Filologosi, na Julia, na Neriasi na khaladzi awe, na Olimpasi, na vhakhethwa vhoṱhe vha Mudzimu vha re navho. ₁₆Ni reshane nga u kuvhatedzana sa vhatendi. Zwivhidzo zwoṱhe zwa Khristo zwi ri ni vhe hone.

₁₇Ndi a ni ṱuṱuwedza vha hashu, ndi ri ni thanyele vhane vha vusa mufhirifhiri na u xedza vhaṅwe; izwo a zwi anḓani na zwe na funzwa. Vhenevho vha tinyeni; ₁₈a vha shumeli Muṋe washu Khristo, vha shumela thumbu dzavho. Vha fhura vha si na nzhele nga kuambele kwavho kwa vhuhwavho na zwiambo zwi takadzaho. ₁₉Inwi-ha hufha zwo no ḓi pfala hoṱhe uri ni vha thetshelesaho Mudzimu, ndi takadzwa nga zwenezwo, ndi ri ngavhe ni tshi vha vhaṱali kha zwivhuya, kha zwivhi ni si ḓivhe tshithu. ₂₀Hu si kale Ene Mudzimu Muladzashango u ḓo kuyekanya Saṱhane a mu vhea fhasi ha milenzhe yaṋu. [Ngavhe Muṋe washu Yesu a tshi ni itela vhuthu.]

₂₁Timoti uyu ane nda shuma nae, u ri ni vhe hone. Na Lukiosi, na Jasoni, na Sosipatere, Majuda nga nṋe, vha ralo.

₂₂Na nṋe Tertiosi ane nda khou ṅwala maipfi a Paulo luṅwaloni luno ndi ni resha nga dzina ḽa Muṋe washu.

₂₃Gayosi muṋe wa uno muṱa, une tshivhidzo tshoṱhe tsha ḓi kuvhangana khawo, u ri ni vhe hone; na Erastosi mufaragwama wa uno muḓi, na Kwartosi wa hashu.

₂₅Kha hu huliswe Mudzimu ane a kona u ni khwaṱhisa, nga he nda funza mafhungo maḓifha, na ḓivhadzwa a Yesu Khristo, ni tshi dzumbululelwa tshiphiri tsha Mudzimu tshe tsha vha tshi sa buliwi tsha kale na kale, ₂₆tshe zwino tsha bviselwa khagala nga Maṅwalo a vhaporofita, nga he Mudzimu wa lini na lini a ta ngaho. Zwo itelwa uri tshakha dzoṱhe dzi tshi ḓivhe-vho, dzi tende mafhungo awe dzi mu thetshelese. ₂₇Vhugala ndi ha Mudzimu, Ramaano e eṱhe, nga Yesu Khristo, lini na lini. Amen.