LUIMBOIMBO 2

₁Nṋe ndi dzuvha ḽa Sharoni, ndi phendephende

ya magovhani a dzithavha.

₂Mufunwa wanga,

ní vhukati ha vhasidzana,

ni nga phendephende vhukati ha mipfa.

₃Mufunwa wanga,

ní vhukati ha vhaṱhannga,

ni nga muapula u vhukati ha miri ya ḓaka.

Ndi tama u dzula murunzini wawo;

mitshelo yawo i a nnḓifhela.

₄No nnyisa nḓuni ya munyanya,

na ntsireledza nga lufuno lwaṋu.

₅Mpheni mpale wa nḓirivhe,

ndi ḽe ndi wane nungo;

nnzivhuluseni nga maapula;

ndi lwadzwa nga lufuno.

₆Ngavhe ndi tshi siamela tshanḓa tshaṋu tsha monde,

tshauḽa tsho nkuvhatedza!

₇Inwi vhasadzi vha Jerusalema,

mpfulufhedziseni!

Anani nga tsephe na tholo dzi na ṱhoni,

ni ri a ni nga rithi lufuno lwanga

kana na lu vusa.

Lu litsheni lu vuwe nga lwoṱhe!

₈Ndi khou pfa ipfi ḽa mufunwa wanga;

ngouḽaa, u khou ḓa a tshi dadamala nṱha ha dzithavha;

u buḓekanya zwivhanga a tshi godimela kha nṋe.

₉Mufunwa wanga u nga tsephe,

u nga tholwana.

Ngouḽa o ima tsini ha luvhondo;

u ṱodzimela nga fasiṱere;

u tou hali nga kubuli.

₁₀Mufunwa wanga ngoyu,

u khou amba na nṋe.

Mufunwa wanga, takuwani!

Kha ri ṱuwe roṱhe, tshinakaho wanga!

₁₁Vhuriha ho fhela:

a hu tshee na mvula.

₁₂Ngei shangoni maluvha a khou fhufhuma;

tshino ndi tshone tshifhinga tsha u imba;

ngei tsimuni hu pfala luimbo lwa maivha.

₁₃Mahuyu a vho thoma u aṋwa;

muya u nukhelela u ḓifha

nga minḓirivhe i fhufhumaho.

Mufunwa wanga, takuwani! Iḓani-ha!

Kha ri ṱuwe roṱhe,

nyamunaka wanga!

₁₄Ni songo nnzumbama unga ḽiivha ḽi no dzumbama mapakoni a dzinngwa.

Edzonu ri ndi vhone tshifhaṱuwo tshaṋu;

tsho naka hani!

Ndi pfe ipfi ḽaṋu:

ḽi takadza hani!

₁₅Farani dziphunguhwe;

dziphunguhwana dzi tshinya masimu ashu a minḓirivhe a fhufhumisaho.

₁₆Mufunwa wanga ndi wanga fhedzi,

na nṋe ndi wawe fhedzi.

U fulisa sambi ḽawe vhukati ha phendephende

₁₇u swika nga madekwana hu tshi vho rotholela,

mirunzi i tshi vhuya.

Vhuyani unga tsephe,

mufunwa wanga,

u tshi gidima unga tholwana i pharani dza thavha!