1 VHAKORINTA 1

₁Nṋe Paulo we Mudzimu nga u funa hawe a mmbidzela u vha muapostola wa Khristo Yesu, na murathu washu Sosthenese ₂ri resha tshivhidzo tsha Mudzimu tshi re Korinta, inwi vhe Mudzimu a ni ita vhakhethwa nga Khristo Yesu, na nangiwa uri ni vhe vhathu vha Mudzimu. Ri resha na vhaṅwe vhoṱhe hoṱhe-hoṱhe vhane vha luvha Yesu Khristo a re Muṋe washu roṱhe, ₃ri ri ngavhe Mudzimu Khotsi ashu na Muṋe washu Yesu Khristo vha tshi ni itela vhuthu na vha na mulalo.

₄Ndi ḓi dzula ndi tshi livhuha Mudzimu wanga ndi tshi vhona vhuthu he a ni itela nga Khristo Yesu. ₅Nga u vha vhathihi na Khristo no pfumiswa lwa u tou fhalala, ri sa tsha amba kha vhuambi na nḓivho. ₆Zwe na funzwa nga Khristo zwo nwelela kha inwi, ₇lune hu si vhe na tshifhiwa na tshithihi tsha Mudzimu tshe na ṱahelelwa ngatsho, nó lavhelela ḓuvha ḽine ra ḓo dzumbululelwa vhugala ha Muṋe washu Yesu Khristo ngaḽo.

₈Ene u ḓo ni khwaṱhisa u swika vhufheloni uri ni wanale ni si na mulandu nga ḓuvha ḽawe ḽa khaṱhulo. ₉Mudzimu o ni vhidzelaho u vha vhathihi na Murwa wawe Muṋe washu Yesu Khristo, u a fulufhedzea.

₁₀Vha hashu, ndi a ni kwengweledza nga dzina ḽa Muṋe washu Yesu Khristo ndi ri: ananani ni si fhambane, ni vhe na muya muthihi na muhumbulo muthihi. ₁₁Ndi tshi ralo vha hashu ndi uri ndo pfa nga vha ha Kulue uri a ni anḓani zwavhuḓi. ₁₂Ndi amba haya ane ha vho pfi muṅwe u ri, “Nṋe ndi wa Paulo!”, muṅwe nga fhaḽa a ri, “Nṋe ndi wa Apolosi!”, muṅwe nga ngeno a ri, “Nṋe ndi wa Kefasi!”, muṅwe nga ngei-vho a ri, “Nṋe ndi wa Khristo!” ₁₃Kani-ha Khristo o no paḓukanywa? Kana Paulo o vhuya a vhambelwa inwi tshifhambanoni? Kana no lovhedzwa uri ni vhe vha Paulo? ₁₄Ndi livhuha Mudzimu zwe ndi si lovhedze na muthihi waṋu arali e si Khrisposi na Gayosi fhedzi, ₁₅uri hu si ḓo vha na ane a ri o lovhedzwa uri a vhe wa Paulo. ₁₆Iina, na vhaḽa-vho vha ha Stefanasi ndo vha lovhedza. A thi tsha humbula muṅwe we nda mu lovhedza arali vhe si vhenevho. ₁₇Khristo nṋe ho ngo nthuma u lovhedza, o nthuma u anḓadza mafhungo maḓifha, hu si nga u nakisedza nga maipfi a vhuṱali; ndi musi mafhungo a lufu lwa Khristo kha tshifhambano a tshi vho ḓo nga ho ngo shuma tshithu.

₁₈Vha re nḓilani ya u lovha, mafhungo a tshifhambano vha pfa hu u fhafhaḓa, hone riṋe vhane ra khou ya u tshidzwa ri vhona e one a sumbedzaho maanḓa a Mudzimu, ₁₉vhunga ho ṅwalwa ha pfi,

₂₀Muṱali wa shango ḽino zwino u ngafhi-ha? Vhoriaḓivha vhone-vho? Makone wa khani ene? Vhuṱali ha shango Mudzimu ho ngo vhu ṱanḓavhudza ha vhonala vhu vhutsilu kani?

₂₁Mudzimu nga vhuṱali hawe o dzula o dzudzanya uri shango ḽi si mu ḓivhe nga vhuṱali haḽo. Ndi zwe a ri vhatendi vha tshidzwe nga mafhungo ane vhaṅwe vha ri ndi vhutsilu. ₂₂Majuda vha ṱoḓa maḓembe, ngeno Magiriki vha tshi londa vhuṱali, ₂₃riṋe tshashu ndi u ḓivhadza mafhungo a Khristo o vhambwaho. Majuda vha vhona a tshi vha khukhulisa, vhannḓa vha pfa vhu vhutsilu, ₂₄hone vho vhidzwaho nga Mudzimu, vha nga vha Majuda, kana Magiriki, vha vhona Khristo e Ene maanḓa na vhuṱali ha Mudzimu. ₂₅Mudzimu u nga u ita vhutsilu, ngeno vhutsilu honoho vhu tshi fhira vhuṱali ha muthu; u nga ha na nungo, ngeno u shaya nungo honoho hu tshi fhira maanḓa a muthu.

₂₆Vha hashu, edzonu elekanya zwe na vha ni zwone Mudzimu a tshi ni vhidza. Vhathu vha tshi ni sedza vha vhona vhunzhi haṋu ni songo funzea, ni si vhahulwane, ni si vhakololo. ₂₇Hone Mudzimu a ita nga khole a nanga zwine shango ḽa vhona vhu vhutsilu uri a shonise vhaṱali ngazwo; a nanga vhane shango ḽa vhona vha si na nungo uri a shonise vha maanḓa; ₂₈a nanga vhasiwana na vhane shango ḽa vha nyadza, vhane ḽa vha vhona vhe si tshithu, uri a lozwe ngavho zwine shango ḽa vhona zwi zwone zwihulwane. ₂₉A tshi ralo ho vha hu u itela uri hu si vhe na muthihi ane a mu zuwela.

₃₀Hone inwi Mudzimu o ni ita vhathihi na Khristo Yesu, we a mu ita vhuṱali hashu, ngauri ndi Ene vhuvhuya hashu na vhukhethwa hashu na u rengululwa hashu. ₃₁Na Maṅwalo a ri,

“Ane a zuwa nga a zuwe zwe Muṋe washu a ita.”