1 VHAKORINTA 16

₁Zwino ndi tshi ḓa kha aḽa a u tonda vhathu vha Mudzimu vha re Judia, ndi ri na inwi itani zwenezwo zwe nda dzudzanya na zwivhidzo zwa shango ḽa Galata. ₂Swondaha iṅwe na iṅwe muṅwe na muṅwe waṋu a bvise masheleni nga he zwa mu anḓa a vhulunge, uri hu sa ḓo vha na khakhathi ya u kuvhanganya tshelede ndo no swika. ₃Ndi tshi swika ni khethe vhanna vho fanelaho; nṋe ndi ḓo vha ṋea maṅwalo a u ṱanziela uri vha kone u isa zwifhiwa hezwo zwaṋu Jerusalema. ₄Arali zwo fanela uri ndi vha fhelekedze ndi nga ṱuwa navho.

₅Ndi ḓo fhira nga Makedonia nda ḓo konou ḓa ngeo, ngauri ndi fanela u thoma u ya hone. ₆Ndo no swika ndi vhona uri ndi ḓe dzulinyana na inwi henefho, khamusi nda fhedza vhuriha hoṱhe, na ḓo kona u mpfarisa u fhirela phanḓa, henefho hune nda ḓo vha ndi tshi ya hone. ₇Arali Muṋe washu a tshi funa ndo lavhelela u thoma ra vhonana zwavhuḓi, hu si u sokou dzuli nda fhira lini. ₈Ndi ḓo vha ndi fhano Efesa u swika nga Pentekoste, ₉ngauri henefhano Mudzimu o mmvulela gondo ḽa u shuma mushumo muhulwane, naho hu na vhahanedzi vhanzhi.

₁₀Arali Timoti a tshi nga swika henefho ni mu fare zwavhuḓi sa ṅwana wa hayani, ngauri na ene u kha mushumo wa Muṋe washu sa nṋe. ₁₁Hu songo vha na ane a mu nyadza. Ni mu farise uri a fhirele ngeno nga mulalo, ngauri nṋe na vhaṅwe vha hashu ro mu lindela.

₁₂Zwino uyu Apolosi wa hashu-vho, ndi na lunzhi ndi tshi mu kwengweledza uri a farisane lwendo na vhaṅwe vha hashu vha tshi ḓa u ni dalela, hone uri a ḓe zwino ha vhuyi a tenda. Zwenezwo tshifhinga tshi tshi tenda u ḓo ḓa.

₁₃Fhaṱuwani ni khwaṱhe kha lutendo, ni vhe na tshivhindi na nungo. ₁₄Mishumo yoṱhe ni i ite nga lufuno.

₁₅Vha hashu, a thi ri Stefanasi na muṱa wawe ni a vha ḓivha zwavhuḓi, vhone vhatendi vha u thoma vha ngeo vunduni ḽa Akhaya, vhe vha ḓikumedza u shumela vhathu vha Mudzimu – ₁₆ndi ni humbela uri ni pfe vhathu vha no nga vhenevho na vhoṱhe vhane vha vha tikedza vhe vhashumi vha biko. ₁₇Ndo takala hani ndi tshi vhona Stefanasi na Fothunathosi na Akhaikhosi vha tshi swika, nde u vha vhona nda vho nga ndo ni vhona noṱhe. ₁₈Vhe u nnetulusa ha vha u netulusa inwi. Vhathu vho raloho a vha ri tshileli.

₁₉Zwivhidzo zwa ngeno vunduni ḽa Asia zwi ri ni vhe hone. Na Akwila na Phriska khathihi na tshivhidzo tshi kuvhanganaho nḓuni yavho vhe na vhofhekanywa navho nga Muṋe washu vha ri ni vhe hone. ₂₀Vhathu vhoṱhe ngeno vha ri kha ḽi vhe dakalo. Ni reshane nga u kuvhatedzana sa vhatendi.

₂₁Zwino afha litshani ndi ṅwale nga tsha vhukoma! ndi nṋe paulo ndi ri: ni vhe hone noṱhe.

₂₂Ane a si fune Muṋe washu, uyo o dzula o teketelwa!

Marana tha – Iḓa Muṋe washu!

₂₃Ngavhe Muṋe washu Yesu a tshi ni itela vhuthu.

₂₄Ndi ḓo dzula ndi tshi ni funa noṱhe nge ra vha vhathihi na Khristo Yesu.