Luṅwalo lwa Anthiokhosi
1Anthiokhosi murwa wa khosi Dimitriosi a rumela luṅwalo lu tshi bva zwiṱangadzimeni zwa lwanzhe lu tshi ḓa kha Simoni, muphrista na muvhusi wa lushaka lwa Majuda, na kha lushaka lwoṱhe. 2Ho vha ho ṅwalwa upfi, “Khosi Anthiokhosi u khou resha Simoni, muphrista muhulwane na muvhusi wa lushaka, khathihi na lushaka lwa Majuda. 3Hu na mavemu maṅwe e a ḓidzhiela muvhuso wa vhokhotsi ashu. Zwino nṋe ndi khou humbula u dovha u vhila muvhuso uyo, nda dovha nda u vhuedzedza he wa u hone kale. Ndo rendela tshivhalo tshihulu tsha vhahali vho topiwaho na zwikepe zwa nndwa zwo ṱamiwaho, 4uri zwi swike shangoni ḽanga, ndi kone u lifhedza avho vho ḽi tshinyadzaho vha ṱangula miḓi minzhi muvhusoni wanga.
5“Zwino, ndi khou khwaṱhisa zwoṱhe zwe mahosi a kale a ni vhofholola kha u thela mithelo na vhuṱalu vhufhio na vhufhio he vha ni ṋea. 6Ndi ni ṋea maanḓa a u ḓifulela mali yaṋu ya mangwende ya shango ḽaṋu. 7Jerusalema na thembele yaho hu ḓo vhofhololwa. Zwihali zwoṱhe zwe na zwi fula, na vhuimavhahali hoṱhe he na vhu fhaṱa, hune na khou dzula hone zwino, zwi ḓo ḓi vha zwaṋu. 8Milandu yoṱhe, ya zwino kana i kha ḓi ḓaho, ine ya vha ya gwama ḽa khosi, ni ḓo thuthelwa yone, zwino na misi yoṱhe. 9Musi ro no dzhiulula muvhuso washu ri ḓo ni hulisa zwihulu, inwi na lushaka lwa haṋu na thembele, uri vhugala haṋu vhu ḓivhiwe nga ḽifhasi ḽoṱhe.”
10Nga ṅwaha wa ḓana na mahumi maṱanu na mavhili na miṋa (174) Anthiokhosi a yo dia shango ḽa vhomakhulukuku wavho, mmbi dzoṱhe dza mbo ḓi vhuelela khae, Thirifoni a sala na vhaṅwe vha si gathi. 11Thirifoni a pandamedzwa nga Anthiokhosi a shavhela Dora tsini ha lwanzhe. 12A vhona uri o welwa nga khombo nngafhani musi vhahali vhawe vho no mu ṱutshela. 13Anthiokhosi a govhela Dora e na vhahali vha zwigidi zwa ḓana na mahumi mavhili (120 000) vha tshimbilaho nga ṋayo na vhanameli vha dzibere vha zwigidi zwiṱanu na zwiraru (8 000). 14A tanga muḓi uyo, na zwikepe zwawe zwi tshi khou u tanga u navha na khunzikhunzi, ha vha u u hahedza siani ḽa shango na siani ḽa lwanzhe, ha si vhe na a bvaho kana a dzhenaho.
U vusulusa mbumbano na Vharoma
15Zwino Numeniosi na khonani dzawe vha takuwa Roma vhe na maṅwalo ane a nga ulu o ṅwalelwaho mahosi o fhambanaho na mashango, lu ri, 16“Nṋe Lukiosi muḓinḓa wa Vharoma ndi resha khosi Tholemiosi. 17Vhaṅwe vhaḓinḓa vha Majuda, khonani dzashu na vhavhumbani na riṋe, vho ḓa kha riṋe u vusulusa vhuvhumbani havho na vhukonani ha kale. Vho vha vho ruṅwa nga Simoni muphrista muhulwane wa Majuda, 18vha swika na tshiṱangu tsha musuku tsha khilogiramu dza maḓana maṋa na mahumi maṱanu (450 kg) (tshigidi tsha dzimina). 19Zwenezwo ro elekanya u ṅwalela mahosi o fhambanaho na dzitshakha uri vha songo vha huvhadza kana vha vha bvela pfumo kana shango ḽavho kana miḓi yavho, nahone vha songo ima na vhathu vha no lwa navho. 20Ro ita na u elekanya u ṱanganedza tshiṱangu tshi no bva khavho. 21Zwino arali vhathu vhane vha dina vha shangoni ḽa havho vha shavhela kha inwi, vha iseni ha Simoni muphrista muhulu, uri a vha laṱise hu tshi tevhedzwa mulayo wavho.”
22Vharoma vha rumela maṅwalo a no nga eneo kha mahosi Dimitriosi na Athalosi na Ariarathese na Arasakese, 23na mashangoni oṱhe aya: Sampisamese, Sparta, Delosi, Mindosi, Sikioni, Kharia, Samosi, Phamfilia, Lisia, Halikhanasosi, Rodosi, Faselisi, Kosi, Side, Aradosi, Gorothina, Kinidosi, Kipirosi, na Kirene. 24Khophi ya luṅwalo ulwo ya rumelwa na kha Simoni muphrista muhulwane.
U levha ha Anthiokhosi
25Khosi Anthiokhosi a dovha u govhela muḓi wa Dora, a ḓi endela u u dia nga vhahali na nga mitshini ya u govhela ye a vha o i ita. O dzivha Thirifoni a iledza muthu a bvaho na a dzhenaho. 26Simoni a tikedza Anthiokhosi nga u mu rumela vhahali vho nanguludzwaho vha zwigidi zwivhili (2 000), khathihi na musuku na siliva na tshomedzo nnzhi. 27Hone Anthiokhosi a zwi landula, vhukuma o bva kha zwoṱhe zwe a vha o langana na Simoni, a fhambana nae tshoṱhe.
28Anthiokhosi a ruma Athenobiosi, muṅwe wa Khonani dzawe, u yo amba na Simoni, a ri, “Ni vho dzula Jopa na Gezere na vhuimavhahali ha Jerusalema; iyo ndi miḓi ya muvhuso wanga. 29No ṱangula mashango a miḓi iyo, na tshinyadza shango, na dzhia madzingu manzhi muvhusoni wanga. 30Zwenezwo humisani miḓi ye na i thuba na mali ya mithelo ya madzingu a re nnḓa ha shango ḽa Judia ye na i dzhia; 31kana ni tou nndifhela thalennde dza maḓana maṱanu (500) dza siliva u thivha tshinyadzo ye na ita na thalennde dza maḓana maṱanu (500) dza mali ya mithelo ya miḓi. Arali na sa ita nga u ralo, ri ḓo ḓa ra lwa na inwi.”
32Zwenezwo Athenobiosi, Khonani iḽa ya khosi, a swika Jerusalema. Musi a tshi vhona u naka ha muṱa wa Simoni, na phuleithi ya musuku na siliva nṱha ha saidibodo, na zwiṅwe zwoṱhe zwa ṱano ḽa madzanga awe, a akhamala. Musi a tshi swikisa mafhungo a khosi, 33Simoni a fhindula a ri, “Riṋe a ro ngo thuba shango na ḽithihi ḽa muthu; zwe ra dzhia a si thundu ya vhaṅwe, ndi ifa ḽa vhomakhulukuku washu ḽe ḽa fhedza tshifhinga ḽo farwa nga maswina ashu zwi songo fanela. 34Zwino tshifhinga tshi tshi vho ri tendela ra dzhiulula ifa ḽa vhomakhulukuku washu. 35Huno Jopa na Gezere, ine na i vhila, vhanna vha miḓi iyo vho vha vha tshi khou vhaisesa vhathu vha hashu, vha tshi ṱangula shango ḽashu. Nangwe zwo ralo, ro ḓiimisela u ni lifhela thalennde dza ḓana dza miḓi iyo.”
36Athenobiosi a si fhindule na ipfi na ḽithihi; o tou humela ha khosi o sinyuwa. A vhudza khosi maipfi a Simoni, na vhugala hawe, na zwoṱhe zwe a zwi vhona, khosi ya sinyuwa zwihulu.
U kundwa ha Kendebiosi
37Zwino Thirifoni a dzhena tshikepeni a shavhela Orothosia. 38Khosi ya vhea Kendebiosi u vha mulangammbi muhulu wa khunzikhunzini ya lwanzhe, a mu ṋea mmbi ya vhatshimbili nga ṋayo na vhanameli vha bere. 39O mu laya uri a ise mmbi dzawe u yo dia Judia na u vusa Kedironi na u khwaṱhisa gethe dzawo, uri a kone u dia Majuda. Ndi hone khosi i tshi yo londa Thirifoni. 40Kendebiosi a swika Jamunia, a thoma u levhela vhathu na u tshoṱhela Judia, a thuba vhathu vhanzhi, vhaṅwe a vha vhulaha. 41A vusa Kedironi nga he khosi ya mu laya, henefho a vhea vhanameli vha bere na vhatshimbili nga ṋayo, uri vha kone u bva vha yo tandula magondo a Judia.
