Hu tshi itwa ndangano na Vharoma
1Judasi o vha o no pfa zwa bvumo ḽa Vharoma. Vho vha vhe vhalwi vha vhuhali nahone vha tshi takadza kha vhoṱhe vhane vha ima navho. Vho vhofha vhukonani na vhoṱhe vhe vha ḓa khavho. 2Vho vha vhe na maanḓa mahulu. O vha o ita na u vhudzwa nga nndwa dzavho vha tshi lwa na Vhagalata, vha tshi vha kunda vha vha luvhisa. 3Vho vha vho dzhia na migodi ya siliva na musuku ya Spania ya vha yavho, 4nahone nga u kona u vhamba maano na nga u konḓelela vho vha vho kunda shango ḽoṱhe, na mashango a kule-kule, vha kunda na mahosi e a vha bvela pfumo a tshi bva khuḓani dza kule dza ḽifhasi, vha tou vha kunda tshoṱhe vha vha kuyekanya, vhaṅwe vha vha luvhisa vha vha bvisisa nduvho ṅwaha muṅwe na muṅwe.
5Vho vha vho kunda na Filipi, na Pheresiosi khosi ya Makedonia, na vhaṅwe vhe vha vha bvela pfumo, vha vha luvhisa. 6Vho vha vho kunda na Anthiokhosi Muhulwane, khosi ya Asia, ó vha bvela pfumo e na nḓou dza ḓana na mahumi mavhili (120) na vhanameli vha dzibere na dzigariki na mmbi khulusa, vha mu kunda vha tou mu kuyekanya. 7Vho mu dzhia a tshi khou tshila, vha kombetshedza ene na mahosi e a sala a tshi vhusa ene o no dzama u bvisa muthelo muhulu, vha dzhia na vhahahedzwa, 8vha mu dzhiela na mavundu maṅwe awe a khwiṋe, ndi India na Media na Lidia, vha a ṋea khosi Yumenesi. 9Vhanna vha Giriki vho elekanya u ḓa u vha lozwa, 10hone Vharoma vha zwi ḓivha, vha ruma mulangammbi muthihi fhedzi u yo lwa na Magiriki, a vha tshoṱhela, ha rambaladzwa vhanzhi, vhafumakadzi vhavho vha thubiwa. Vha vha ṱangula vha dzhia shango ḽavho vha thutha madzhavhelo avho, vha vha ita dziphuli u swika na ṋamusi. 11Mivhuso miṅwe yoṱhe na zwiṱangadzime zwe zwa vhuya zwa imedzana navho vho zwi lozwa, vhathu vhazwo vha vha ita dziphuli. 12Hone khonani dzavho na vhoṱhe vhe vha fulufhela vhone, vho ḓi khwaṱhisa vhukonani navho. Ngauralo vha kunda mahosi a kule na a tsini, vhoṱhe vhe vha pfa bvumo ḽavho vha vha ofha. 13Ngoho, avho vhe Vharoma vha tama u vha farisa u wana muvhuso vho vha mahosi, vhe vha funa u vha bvisa vhuhosini vho vha bvisa, ngauralo vha vha na maanḓa mahulu. 14Naho zwo ralo, a hu na na muthihi wavho we a ṱongisa vhuhulwane hawe nga u ambara khare ya vhuhosi kana a ambara muridili. 15Vho vha vho ḓivhumbela khoro ya vhahulwane vha maḓana mararu na mahumi mavhili (320), misi yoṱhe vha rera mafhungo a vhathu uri zwi vha nakele. 16Ṅwaha muṅwe na muṅwe vha kumedza muvhuso wavho munna muthihi uri a vhuse shango ḽavho ḽoṱhe, vhoṱhe vha thetshelesa onoyo, vha si na vivho kana vengo.
17Ndi hone Judasi a tshi nanga Yupholemosi murwa wa Johanisi murwa wa Akhosi, na Jasoni ṅwana wa Eliazara, a vha ruma Roma u yo vhofha ndangano ya vhukonani. 18Izwo o zwi itela u rulwa muhwalo, nge zwa vha zwi khagala uri muvhuso wa Magiriki wo vha u tshi khou ita Vhaisraele dziphuli tshoṱhe. 19Vha tshimbila lwendo lulapfu vha tshi ya Roma, vha swika vha dzhena khoroni vha amba vha ri, 20“Judasi ane a pfi Makhabiosi, na vhakomana na vharathu vhawe na vhathu vha Judia vho ri ruma kha inwi u vhofha ndangano ya mulalo na inwi, uri ri ṅwalwe ri pfi khonani dzaṋu ri ime roṱhe musi wa nndwa.” 21Mafhungo ayo a takadza Vharoma, 22zwino khophi ngeyi ya phindulo ye vha i ṅwala kha maḓaba a musinaseṱha ya swikiswa Jerusalema, uri i dzule henefho na Majuda vhu vhuṱanzi ha mulanga wa mulalo na u ima vhoṱhe musi wa nndwa, i ri: 23“Ngavhe Vharoma na lushaka lwa Majuda vha dzulaho lwanzheni na shangoni zwi tshi vha nakela lini na lini; ngavhe banga na swina zwi tshi ḓi vha kule navho. 24Hone arali lushaka luṅwe lwa dia Roma kana lushaka lufhio na lufhio lwo vhumbanaho navho muvhusoni ufhio na ufhio, 25lushaka lwa Majuda lu ḓo vha farisa nga mbilu yoṱhe, nga hune zwa nga vha ngaho; 26vhane vha vha dia, Majuda a vha nga vha ṋei kana vha vha hwalela mavhele kana zwihali kana mali kana zwikepe, nga he zwa vhoxwa Roma. Zwe vha ḓivhofha u ita vha ḓo zwi ita vha sa lifhiwi. 27Vharoma na vhone arali lushaka luṅwe lwa dia Majuda, vha ḓo vha phalala nga mbilu nthihi, nga hune zwa nga vha ngaho. 28Nahone vhane vha dia Majuda, Vharoma a vha nga vha ṋei mavhele kana zwihali kana mali kana zwikepe, nga he zwa vhoxwa Roma. Zwe Vharoma vha ḓivhofha u ita vha ḓo zwi ita vha sa lifhiwi.” 29Ndi yone ndangano ye Vharoma vha vhofha na lushaka lwa Majuda. 30Nahone arali mahoro ayo mavhili a sala a tshi elekanya u engedza kana u fhungudza tshifhio na tshifhio, vha ḓo zwi ita nga hune vha sala vha tshi vhofha ngaho, nahone tshine vha ḓo engedza kana u fhungudza tshi ḓo shuma.
31Vha dovha vha ṅwala vha ri, “Kha zwe khosi Dimitriosi a khakhela Majuda, ro mu ṅwalela ra ri, ‘Khonani dzashu Majuda vhe ra langana navho u ima roṱhe musi wa nndwa, ndi mini u tshi vha hwesa dzhogo i lemelaho? 32Arali vha dovha vha lila nga iwe, ri ḓo vha lamulela ra lwa na iwe hoṱhe, lwanzheni na shangoni.’ ”
