1 PITROSI 5

₁Inwi vhalisa, nṋe mulisa nga inwi ane nda vha ṱhanzi ya u tambudzwa ha Khristo, ane nda ḓo ita na u kovhekana nae vhugala hawe vhune ha pfi vhu ḓo dzumbuluwa, ndi a ni ṱuṱuwedza ndi ri: ₂Lisani sambi ḽa Mudzimu ḽe a ni kumedza. Ni songo ḽi linda nga u tou kombetshedzwa, ni ḽi linde nga mbilu tshena, vhunga zwi zwenezwo zwine Mudzimu a zwi funa; ni songo zwi ita nga u funesa malamba, ni zwi ite ni tshi takadzwa nga mushumo wone uṋe; ₃nahone ni songo nga ni khou ḓiita vhalangi vha vhathu vhe na vha kumedzwa, tshaṋu nga hu vhe u sumbedza sambi vhuṱala havhuḓi. ₄Ndi hone Mulisa muhulwane a tshi ḓo ri a tshi vhuya a ḓo kona u ni ṋea muṅene u sa ṱahali, hone vhutshilo ha vhugala.

₅Na inwi vhaṱuku ni thetshelese vhakalaha na vhakegulu. Noṱhe kha u tshilisana haṋu ni ḓipute nga u ḓiṱukufhadza. Maṅwalo a ri,

₆Ndi zwone ḓiṱukufhadzeni, ni tende zwine tshanḓa tsha Mudzimu tsha maanḓa tsha ni ita, ndi hone a tshi ḓo ni hulisa nga tshifhinga tsho fanelaho. ₇Mu kumedzeni zwoṱhe zwine na zwi ḽela mbilu; ndi Ene Mulondoli waṋu.

₈Fhaṱuwani ni dzule no linda; swina ḽaṋu diabolo ḽi khou mona-mona sa ndau i vhombaho, u ṱoḓa ane a nga mu zhota. ₉Imani no khwaṱha kha lutendo ni imedzane nae. Hufha ni tshi ḓivha uri na vhaṅwe Vhakhriste nga inwi fhano shangoni vha ḓi ṱangana na eneo madambudzo.

₁₀Mudzimu u ḓi ri itela vhuthu hoṱhe-hoṱhe, o ri vhidzela u vha na vhugala hawe vhu sa gumi nga Khristo. Musi no tambudzwa tshifhinganyana u ḓo dovha a ni vusa, a ni khwaṱhisa, a ni ṋea nungo, a ni imisa kha muteo u sa dzinginyei. ₁₁Maanḓa ndi awe lini na lini. Amen.

₁₂Ndi ni ṅwalela maipfi aya a si gathi nga Silasi ane nda vhona e Mukhriste nga riṋe a fulufhedzeaho, ndi tshi ni ṱuṱuwedza na u ṱanziela zwine vhukuma vhuthu ha Mudzimu ha vha zwone. Zwo ralo imani khaho no khwaṱha ni sa dzinginyei.

₁₃Muselwa wa Khristo a re fhano Babele, o nangwaho nga Mudzimu unga inwi, na Markosi ṅwananga, vha ri ni vhe hone.

₁₄Reshanani nga u kuvhatedzana nga lufuno. Inwi noṱhe ni re vha Khristo ni vhe na mulalo!