1 VHATHESALONIKA 4

₁Vha hashu, hufha ro ni gudisa kutshilele ku takadzaho Mudzimu. Nazwino ni khou tshila nga u ralo. Zwino tsho salaho ri a ni humbela na u ni ṱuṱuwedza nga dzina ḽa Muṋe washu Yesu ri ri: Ngavhe ni tshi dovha na fhirisa henefho. ₂A thi ri ni kha ḓi elelwa dziḽa ndaela dze ra swikisa kha inwi ró ruṅwa nga Muṋe washu Yesu. ₃Tshine Mudzimu a funa ndi uri ni itwe vhakhethwa, ni ile vhupombwe, ₄muṅwe na muṅwe kha a tou vha na musadzi wawe, a tshilisane nae nga nḓila khethwa vha tshi hulisana, ₅hu si nga u sokou emulana mivhili sa vhannḓa vha sa ḓivhi Mudzimu. ₆Kha mafhungo haya hu songo vha na ane a khakhela muṅwe kana a mu fhura. Ro no ḓi ranga u ni vhudza ra tou ombedzela ra ri: Muṋe washu u ḓo lifhedza vhoṱhe vhane vha ita hezwo. ₇Mudzimu ho ngo ri vhidzela u ita zwa vhuaḓa, o ri vhidzela vhukhethwa. ₈Zwino a no landula ndaela idzi ha landuli muthu, u landula Mudzimu, Ene ane a ni ṋea Muya Mukhethwa wawe.

₉Ri tshi ḓa kha a u funa vhatendi nga inwi a ri tsha ṱwa ri tshi ni ṅwalela; hufha Mudzimu Ene muṋe o no ḓi ni gudisa u funana. ₁₀Ndi zwenezwo zwine na khou zwi itela vhatendi nga inwi vhoṱhe kha ḽoṱhe ḽa Makedonia. Zwino ri khou ni ṱuṱuwedza ri ri: ngavhe ni tshi dovha na fhirisa na henefho. ₁₁Lusani u tshila nga mulalo na u londa mafhungo aṋu ni si dzhenelele kha a vhaṅwe, ni ḓipalele nga ṋala dzaṋu, unga ro no ḓi ni vhudza. ₁₂Ndi hone na vhannḓa vha tshi ḓo vhona kutshilele kwaṋu ku takadzaho vha ni hulisa, ni si tsha ḓo tshila sa magufha.

₁₃Zwino vha hashu, ri tshi ḓa kha a vho ri siaho ri funa ni tshi ḓivha zwi re zwone, ni sa ḓo ṱungufhala, sa vhaḽa vhaṅwe vha si na tshe vha fulufhela. ₁₄Riṋe ri tenda uri Yesu o fa a dovha a vuwa. Zwenezwo na vho lalaho vhe vhawe, Mudzimu u ḓo vha dzhia a vha isa hune Yesu a vha hone.

₁₅Ḽine ra khou ni vhudza zwino ndi ipfi ḽa Muṋe washu: Riṋe vhane ra ḓo vha ri tshee hone musi Muṋe washu a tshi vhuya a ri nga vhi na mashudu a fhiraho a vhaḽa vho no ri siaho. ₁₆Ndi uri Muṋe washu nga dzawe u ḓo tsa a tshi bva ṱaḓulu, hu tshi bva ndaela, ha pfala ipfi ḽa muṅwe wa vhahulwane vha vharuṅwa na lufhalafhala lwa Mudzimu. Ndi hone hu tshi ḓo ranga u vuwa vhe vha fa vhe vhathihi na Khristo, ₁₇ha konou tevhela riṋe vhane ra ḓo vha ri tshi kha ḓi tshila, ra takulelwa ṱaḓulu khathihi navho ro namela makole ra yo ṱanganedza Muṋe washu henengei makoleni. Ndi hone ri tshi ḓo dzula na Muṋe washu misi yoṱhe.

₁₈Khezwo-ha, khuthadzanani nga maipfi eneo.