2 VHAMAKHABI 15

₁Nikanoro a pfa uri Judasi na vhahali vhawe vha shangoni ḽa Samaria, a elekanya u vha tshoṱhela hó dzika tshoṱhe nga ḓuvha ḽa u awela. ₂Majuda vhe vha kombetshedzwa u ṱuwa na Nikanoro vha mu luvhelela vha ri, “Vha songo mu vhulaha nga u ralo, sa ḽivemu ḽa ḽihwarahwara. Nga vha hulise ḓuvha iḽo ḽe Muvhonazwoṱhe a ḽi hulisa a ḽi ita ḽikhethwa u fhira maḓuvha oṱhe.” ₃Hone Nikanoro, ḽivemu iḽo muṋe wa dzina, a tshi zwi pfa a vhudzisa arali hu na Muvhusi makoleni we a ri vhathu vha vhulunge ḓuvha ḽa Sabatha. ₄Vhone vha fhindula vha ri, “Muṋe wa zwoṱhe, Mudzimu a tshilaho, ndi Ene we a ri Sabatha i vhulungwe.” ₅Ndi hone ene a tshi fhindula-vho a ri, “Nṋe nga dzanga ndi muvhusi ḽifhasini; nṋe ndi ri inwi ni fare mafumo ni shume mushumo wa khosi!” Nangwe zwo ralo, ho ngo zwi kona u vuledza muhumbulo wawe wa muvhi.

₆Nikanoro o vha a tshi vho ḓihudza, a ḓiṱongisa u fhira ndinganyo, a luka vhunwa ha u imisa tshihumbudzo nga zwine a ḓo ṱangula kha Judasi na vhahali vhawe. ₇Hone Makhabiosi a dzula e na fulufhelo, ó fulufhela tshoṱhe uri Muṋe washu u ḓo ima nae. ₈A ṱuṱuwedza vhahali vhawe uri vha songo ofha vha tshi diwa nga maswina, vha vhe na fulufhelo ḽa uri na holuno Ramaanḓaoṱhe u ḓo vha farisa vha kunda, vha tshi humbula zwe a vha farisa e makoleni misi yo vhelaho. ₉A khwaṱhisa mbilu dzavho nga u vha humbudza maipfi a Mulayo na Vhaporofita, a vha humbudza nndwa dze vha no ḓi dzi lwa vha kunda, izwo zwa vha ṋea nungo nga huswa. ₁₀Musi o no vusa nungo dzavho nga u ralo, a fhedza nga u vha humbudza vhufhura ha vhannḓa vha tshi pfuka miano yavho ya ndangano. ₁₁Ngauralo o ṱuṱuwedza vhoṱhe nga maipfi a no bva kha muhulisea, ha vha u vha ṱama nga fulufhelo, hu si nga zwiṱangu na mafumo. A dovha a isa phanḓa a vha ṱuṱuwedza nga u vha anetshela muloro we a lora une wa khou tou pfala uri ndi bono ḽa Mudzimu.

₁₂Zwe a vhona ngezwi: Oniasi, muphrista muhulwane wa kale, muthu we a vha e tsumbo ya vhuthu kha muṅwe na muṅwe, wa u ḓiṱukufhadza na vhulenda, mukoni wa u amba, we a gudiswa maitele mavhuya u bva hanani hawe – Judasi o vhona Oniasi onoyo a tshi khou rabelela lushaka lwoṱhe lwa Majuda o imisela zwanḓa nṱha. ₁₃Ha dovha ha bvelela munna muṅwe we a vhonala e muthu wa maḓuvha, wa tshileme, u ḓi fana na Oniasi, e na vhuḓifari vhu kanukisaho ha vhugala vhune ha ita uri vhoṱhe vha mu hulise. ₁₄Ha thoma Oniasi u amba a ri, “Uyu ndi muthu a funaho Majuda vha hawe. U ḓi dzula a tshi rabelela lushaka lwa hawe na muḓi mukhethwa. Ndi Jeremia, muporofita wa Mudzimu.” ₁₅Ndi hone Jeremia a tshi onyolosa tshanḓa tshawe tshauḽa a ṋekedza Judasi banga ḽa musuku, a ri, ₁₆“Ṱanganedza banga iḽi ḽikhethwa; ndi tshifhiwa tshi bvaho kha Mudzimu; u ḓo shakulisa maswina ngaḽo.”

₁₇Majuda vha ṱuṱuwedzwa nga maipfi ayo a Judasi a no sumbedza vhuhulwane hawe, a ṋea muthu vhuhali, a ritha mbilu dza vhaṱhannga vha vha na tshivhindi tsha vhanna vho vhinaho. Vha pfa vha si tsha funa u dzula mishashani, vha vhona zwi khwiṋe u mbo ḓi wela maswina vha sa ofhi, vha tou kovholana navho vhó livhana zwifhaṱuwo, uri vha vhone uri zwi ḓo gumafhi, ngauri muḓi wavho na thembele na midzio mikhethwa zwo vha zwo livhana na khombo. ₁₈Vho vha vha si tsha tou ofhela vhafumakadzi vhavho na vhana na mashaka; zwihuluhulu vho vha vha tshi ofhela thembele ye ya vha yo kumedzwa Mudzimu. ₁₉Vho salaho muḓini na vhone vho ḓi ḽa mbilu, vhó tshenuwa vha tshi pfa zwa nndwa ine ya ṱoḓou lwiwa ngei nnḓa.

₂₀Muṅwe na muṅwe zwino o vha o lindela nndwa i tshi lwiwa. Maswina o vha a tshi vho sendela tsini na vhahali vha Majuda vhó rwa muduba wa nndwa, dzinḓou dzavho dzó vhewa hune dza kona u vhaisa Majuda, vhanameli vha dzibere vhó vhewa luṱanguri. ₂₁Makhabiosi a tshi vhona mara a re phanḓa hawe, na u penya ha zwipileli zwavho, na u ofhisa ha dzinḓou, a imisela zwanḓa zwawe ḽiṱaḓulu ha Mudzimu, a vhidzelela Muṋe washu Ramaḓembe. O vha a tshi ḓivha uri Mudzimu u ita uri hu kunde vhe zwa vha fanela, vha sa kundi nga zwihali zwavho, vha tshi tou kunda nga he Mudzimu a zwi dzudzanya. ₂₂Judasi a tshi rabela a ri, “Muṋe washu, wo ruma muruṅwa wau misi ya Hiskia khosi ya Judia, a lozwa vhahali vha mmbi ya Sanakheribi vhe vha vha vha tshi fhira zwigidi zwa ḓana na mahumi maṱanu na mararu na zwiṱanu (185 000). ₂₃Khosi ya ḽiṱaḓulu, dovha zwino u ruma muruṅwa wavhuḓi uri a ri range phanḓa, a shele maswina ashu nyofho na u hanganea. ₂₄Ngavhe tshanḓa tshau tsha maanḓa tshi tshi rambaladza vhanna avha, ngauri vho ḓa u lwa na vhathu vhau vhakhethwa vha tshi khou nyefula Iwe Mudzimu.”

Thabelo yawe ya fhela nga u ralo.

₂₅Nikanoro na vhahali vhawe vha kandela phanḓa vha tshi khou lidza dziphalaphala, vha tshi khou imba nyimbo dza nndwani. ₂₆Hone Judasi na vhahali vhawe vha ṱangana na mmbi iyo vha tshi khou vhidzelela Mudzimu, vha tshi rabela. ₂₇Vha lwa zwanḓa zwavho zwo fara zwihali, hone mbilu dzi tshi khou rabela Mudzimu, vha rambaladza vhanna vhane vha nga fhira zwigidi zwa mahumi mararu na zwiṱanu (35 000), vha konou pembela zwihulu nge Mudzimu a sumbedza maanḓa awe. ₂₈Musi nndwa yo no fhela, vha tshi khou ṱuwa vha tshi pembela, vha wana Nikanoro o rambalala henefho o ambara zwipileli zwawe zwoṱhe. ₂₉Ndi hone vha tshi ṱavha mukosi nga luambo lwavho lwa ḓamuni vha tshi renda Muṋe wa zwoṱhe.

₃₀Judasi, we a ḓi vha murangaphanḓa nndwani idzo dzoṱhe, a tshi ḓiṋekedza lushaka lwa hawe nga muvhili na muya, a tshi ḓi vha funa u bva hanani hawe, a ri ṱhoho ya Nikanoro i tumulwe, khathihi na tshanḓa tshawe u guma nga shaḓa, zwi iswe Jerusalema. ₃₁Musi Judasi a tshi swika Jerusalema, a kuvhanganya vhathu vha lushaka lwa hawe, a vhea vhaphrista phanḓa ha aḽiṱari, a vhidzisa vhathu vha re vhuimavhahali. ₃₂A vha sumbedza ṱhoho ya muthu onoyo a nengisaho, na tshanḓa tsha munyefuli uyo muvhi tshe tsha vha tsho imiswa nga maṱaṱa tshi tshi sumba vhudzulo vhukhethwa ha Ramaanḓa, ₃₃a konou tumula lulimi lwe Nikanoro a vha a tshi nyefula Mudzimu ngalwo, a ri lu ṋewe maanga tshipiḓa nga tshipiḓa, tshanḓa tshawe tsho tumulwaho tshi fhahewe u livhana na thembele, a vha malamba a vhutsilu hawe. ₃₄Ndi hone vhoṱhe vha tshi lilala ḽiṱaḓulu, vha renda Muṋe washu wa vhugala, vha ri, “Nga hu rendwe Mudzimu, Ene we a dzivhisa maswina u kumadza fhethu hukhethwa hawe!”

₃₅Judasi a dzhia ṱhoho ya Nikanoro a i fhahea mutsheṱoni wa vhuimavhahali, ha vha vhuṱanzi ha u sumbedza vhoṱhe uri Muṋe washu o vha farisa. ₃₆Vhathu vhoṱhe vha tenda vha vhofha uri ḓuvha iḽo ḽi songo fhira na ṅwaha na muthihi ḽi songo ilelwa, ḽa pfi ḽi ḓo pembelelwa nga ḓuvha ḽa fumi na vhuraru (13) ḽa ṅwedzi wa fumi na vhuvhili (12), une nga Tshiaramu wa pfi Adara. Ndi ḓuvha ḽi rangelaho Ḓuvha ḽa Maradokai.

₃₇Vhunga zwiito zwa Nikanoro zwo fhela nga u ralo, muḓi uyo wa ḓi vha wa Vhaheberu u bva tshifhinga tshenetsho. Zwino na nṋe mafhungo anga a fhelela henefha. ₃₈Arali o ṅwalwa zwavhuḓi, a tshi amba zwone ndo vha ndi tshi tama zwenezwo! Arali a songo ṅwalwa zwavhuḓi, a tshi sumbedza uri muṅwali u kha ḓi guda – tenda ndo ṅwala nga he nda kona. ₃₉Ri a ḓivha uri u nwa waini í songo vanganaho na maḓi zwi vhaisa muthu, na maḓi e oṱhe ha ḓifhi, tshi no ḓifha ndi waini yó vanganywa na maḓi, i ita uri muthu a ḓipfe e muthu; sa zwenezwo, zwine zwa takadza ṱhalukanyo ya muvhali ndi bugu yo dzudzanywaho nga vhutsila.

Zwino litshani mafhungo anga a fhele henefha.