2 VHAMAKHABI 4

₁Simoni uḽa we a no ḓi ambiwa, onouḽa we a tshimbidza mafhungo a u fheṱa mali ya shango ḽa hawe, o pomoka Oniasi a ri ndi ene we a shushedza Heliodorosi a vhanga khombo yo mu welaho. ₂Oniasi, munna we a vha a tshi ḓi itela muḓi zwivhuya, a tshi lwela shango ḽa hawe, Simoni a ita vhuvhi ha u mu pomoka zwa u fheṱa shango. ₃Vengo ḽa hulela lwe muṅwe wa vhanna vhe Simoni a vha rendela a ita na u vhulaha vhathu. ₄Oniasi a tshi vhona uri muvhango u vho hulela, na uri Apholoniosi, murwa wa Menesithiosi muvhusi wa Koele Siria na Finikia, o vha a tshi khou tikedza vhuvhi ha Simoni, ₅a ya ha khosi. O vha a sa khou ya u pomoka vhadzulapo vha hawe, o vha a tshi tou itela uri zwi nakele lushaka lwoṱhe, zwi dovhe zwi nakele na muṅwe na muṅwe nga muthihi nga muthihi. ₆A vhona uri khosi ya sa dzhenelela hu nga si vhe na muvhuso wa mulalo, nahone Simoni a nga si litshe zwa vhutsilu hawe.

₇Hone Selukhosi a dzama, Anthiokhosi ane a pfi Ephifanese a vha khosi vhudzuloni hawe. Ndi hone Jasoni murathu wa Oniasi a tshi vha muphrista muhulwane nga nḓila ya vhukwila: ₈O ṅwalela khosi luṅwalo a mu fulufhedzisa thalennde dza maḓana mararu na mahumi maṱanu na ḽithihi (360) dza siliva dzine dza ḓo mbo ḓi bviswa kathihi, na thalennde dziṅwe dza mahumi maṱanu na mararu (80) dzi no bva kha mbuelo iṅwe ya tshifhinga tshi ḓaho. ₉Zwi si izwo fhedzi, o tenda na u bvisa thalennde dziṅwe dza ḓana na mahumi maṱanu (150) arali a tshi nga tendelwa u thoma fhethu ha mitambo, na u thoma dzangano Jerusalema ḽine ḽa ḓo pfi “Vhaantiokia”.

₁₀Khosi ya tenda, Jasoni a vha muphrista muhulwane, a mbo ḓi thoma u kombetshedza Majuda vha hawe uri vha tevhedze maitele a Tshigiriki. ₁₁A shandukisa pfanelo dza Majuda dze vha ṋewa nga khosi nge vha ambelwa nga Johanisi khotsi a Yupholemosi (ndi uḽa Yupholemosi we ngavhuya a vha a tshi ḓo vha muḓinḓa kha Vharoma u thoma pfano ya vhukonani navho); a thutha maitele a mulayo a kutshilele, a thoma maitele maṅwe a kuḓanaho na mulayo. ₁₂A mbo ḓi thoma fhethu ha mitambo henefho tsindeni ḽa vhuimavhahali ha muḓi, henefho a ṱuṱuwedza vhaṱhannga vha vhaḓivhalea u ambara muṅadzi wa Tshigiriki. ₁₃Maitele a Tshigiriki na asili a hulela nga mulandu wa vhuvhi ha Jasoni ho kalulaho, muphrista muhulwane wa u ḓivhumba a nyadzaho Mudzimu, lwe vhaphrista vha si tsha londa zwa tshumelo ya aḽiṱari. ₁₄Musi muṅwe na muṅwe vha tshi pfa tsimbi i tshi lila vho vha vha tshi mbo ḓi gidimela luvhanḓeni – lwa mitambo, vha nyadza zwa thembele, vha ṅaledza zwiṱhavhelo, vha yo kovhela vhathu mapfura henefho luvhanḓeni one maitele a kuḓanaho na mulayo. ₁₅Vha nyadza zwe vhomakhulukuku wavho vha vhona zwi zwone zwi huliseaho, vha hulisa zwine Magiriki a vhona vhu hone vhugala. ₁₆Vho ḓo welwa nga khombo khulu nga mulandu wa zwenezwo: vhathu vhenevho vhe vhaphrista vha tama kutshilele kwavho, vhe vha tama u vha edzisa kha tshiṅwe na tshiṅwe, vho ḓo vha vhone maswina avho na vhakandeledzi vhavho. ₁₇Vhukuma a si mafhungo maṱuku u nyadza Mulayo wa Mudzimu; izwo zwi ḓo vhonala zwavhuḓi kha zwe zwa sala zwi tshi itea.

₁₈Ha swika tshifhinga tsha mitambo ine ya tambiwa hó fhela miṅwaha miṱanu (5) muḓini wa Tiro, na khosi í hone, ₁₉ḽivemu ḽeneḽo Jasoni a ruma vhaḓinḓa sa vhaimeli vha Vhaantiokia vha Jerusalema, vhó hwala drakhima dza maḓana mararu (300) dza siliva dza u renga tshiṱhavhelo tsha u ṋekedza Herekhulese. Hone na vhahwali vhone vhaṋe vha elekanya uri mali iyo a yo ngo fanela u shuma zwa tshiṱhavhelo, vha vhona zwi khwiṋe i tshi shuma zwiṅwe. ₂₀Zwenezwo mali iyo ye Jasoni a i rumela a ri ndi ya u ṋekedza Herekhulese tshiṱhavhelo, vhahwali vhayo vha fhaṱa ngayo zwikepe zwa nndwa.

₂₁Musi muṅwe Apholoniosi murwa wa Menesithiosi a ruṅwa Egipita hu tshi yo vhumbwa khosi Filomethoro, henefho a pfa hu tshi pfi Filomethoro ha tsha ṱoḓa zwi tshi nakela Anthiokhosi, a vhuya a tshi mu sevha mafhungo ayo. Anthiokhosi a vhamba maano a u ḓitsireledza, a ya Jopa, a konou fhirela Jerusalema. ₂₂Henefho a ṱanganedzwa nga mutsindo nga Jasoni na vhathu vha muḓi, vha mu endedza hu tshi pembelwa vho fara mbone. U takuwa henefho a isa mmbi yawe Finikia.

₂₃Musi ho no fhela miṅwaha miraru Jasoni a ruma Menelaosi, murathu wa Simoni uḽa we ra mu amba afho nṱha, uri a swikise mali ha khosi, a dovhe a khunyeledze mahumbulwa a khosi kha mafhungo mahulwane a sa faneli u lengelelwa. ₂₄Hone Menelaosi musi o no swikiswa ha khosi, a fhura khosi nga u ḓiita unga u na maanḓa a u vha muphrista muhulwane, a fhirisa zwe Jasoni a fulufhedzisa khosi nga thalennde dza maḓana mararu (300) dza siliva, vhuphrista vhuhulwane ha mbo ḓi vha hawe. ₂₅A huma o no vha na thendelo ya khosi, hone hu si na tshiṅwe tsha u sumba uri a vhe muthu o fanelaho u vha muphrista muhulwane. Tshe a vha a tshi ḓitika ngatsho ndi tshiṱuhu tsha u kandeledza vhathu, na vhuhali vhu no nga ha ḽivhanda ḽa ḓaka. ₂₆Zwino Jasoni we a vha o tupula murwa wa khotsi awe, ene a vho vhona o no tupulwa-vho, a fhedza nga u shakuliswa a vha tshavhi a ya shangoni ḽa Vhaamoni.

₂₇Huno Menelaosi musi o no vha muphrista muhulwane, a si tsha bvisa mali iḽa ye a fulufhedzisa khosi, ₂₈naho yo vha i tshi khou vhilwa nga Sosithirathosi, mulangi wa vhuimavhahali ha muḓi, we a vha a tshi shuma mushumo wa u kuvhanganya mithelo. Ndi zwe vhuvhili havho vha vhidziwa musanda. ₂₉Menelaosi a sia ṅwana wa khotsi awe Lisimakhosi o mu farela vhuphrista vhuhulwane, Sosithirathosi a sia o farelwa nga Khrathese, mulangi wa mmbi dzo rendelwaho Kipirosi.

₃₀Musi zwithu izwo zwi tshi khou itea, vhathu vha Tharasisi na vha Malosi vha vusa mufhirifhiri nge miḓi yavho ya vha yo ṋewa Anthiokhisi musadzi muṱuku wa khosi ya vha tshifhiwa tshawe. ₃₁Zwenezwo khosi ya mbo ḓi takuwa u yo dzudzanya mafhungo ayo, ya sia Andronikhosi, muṅwe wa vhaḓivhalea vhawe, o mu farela. ₃₂Menelaosi a vhona unga ndi hone o wana tshifhinga tshavhuḓi, a tswa maḓaba maṅwe a musuku a thembele a yo a ṋea Andronikhosi. Maṅwe o vha o no ḓi a rengisa muḓini wa Tiro na miḓini i re henefho tsini. ₃₃Oniasi a pfa vhuṱanzi ha zwiito izwo, a hwavha a yo dzumbama thembeleni muḓini wa Dafuni tsini ha Antiokia. ₃₄Zwenezwo Menelaosi a yo amba na Andronikhosi vhe vhavhili a ita tshikungo nae tsha u vhulaha Oniasi. Andronikhosi a ya ha Oniasi a khaḓana nae a mu anela nga vhufhura, a mu kwengweledza a ri a songo tsha mu humbulela, a bvele nnḓa ha thembele. Hone musi o no bva henefho hu sa vhulahwi muthu a mbo ḓi mu vhulaha a si tsha londa mulayo. ₃₅Vhupondi uho vhuvhi ho dina Majuda, vha sinyuwa, zwa dovha zwa vhaisa na vhathu vhanzhi vha tshakha dziṅwe vha si zwi takalele. ₃₆Musi khosi i tshi vhuya i tshi bva dzinguni ḽa Kilikia, Majuda afho muḓini, khathihi na Magiriki vho sandaho vhuvemu uho, vha yo hwelela ha khosi zwa u vhulahwa ha Oniasi. ₃₇Anthiokhosi a pfa mbilu yawe i tshi vhavha, a ṱungufhala, a tsengisa miṱodzi a tshi humbula vhuthu na u ḓifara tshihulwane ha mufu. ₃₈A sinyuwa zwihulu, a mbo ḓi bvula Andronikhosi khanzu yawe ya muridili, a kherukanya zwiṅwe zwifuko zwawe, a mu tshimbidza na muḓi woṱhe u swika henefhaḽa he a vhulahela Oniasi hone, a mu vhulahela henefho. Ha vha hu hone Muṋe washu o lifhedza Andronikhosi nga ṱhamu yo mu fanelaho.

₃₉Lisimakhosi o vha o no ita vhumbulu vhunzhi na Menelaosi ha u tswa zwikhethwa afho muḓini. Musi phungo yo no ya ya uri ho no tswiwa vhunzhi ha maḓaba a musuku, vhathu vha kuvhangana vha gwalabela Lisimakhosi. ₄₀Magogo o vha o no sinyuwa vha tshi vho thoma u vusa mufhirifhiri; ndi hone Lisimakhosi a tshi ramba vhanna vha zwigidi zwiraru (3 000) a vha ṋea mafumo a tshoṱhela vhathu nga vhuhali vhuhulu vhó rangwa phanḓa nga Auranosi, munna we a vha o no ḓi vha wa maḓuvha, na vhutsilu hawe vhu tshi khou ḓi kalula. ₄₁Vhathu vha imedzana na Lisimakhosi, vha doba matombo na zwitanda kana masimbe a mulilo a re henefho fhasi, vha posa Lisimakhosi na mmbi yawe ngazwo ha vuwa vilinga. ₄₂Vha huvhadza vhanna vhanzhi vha Lisimakhosi, vha ita na u vhulaha vhaṅwe vhavho, vhaṅwe vhoṱhe vha vha shakulisa. Fobvu ḽiḽa ḽa u tswa zwikhethwa vha ḽi vhulahela henefho tsini ha gwama.

₄₃Mulandu wa zwoṱhe zwo iteaho wa pomokwa Menelaosi. ₄₄Musi khosi i tshi swika Tiro, vhanna vhararu vho ruṅwaho nga khoro khulwane vha hwelela mulandu uyo khayo. ₄₅Huno Menelaosi a tshi vhona uri mulandu u a mu tiba, a fulufhedzisa Tholemiosi murwa wa Dorimenese mali nnzhi arali a tshi nga kwengweledza khosi. ₄₆Zwenezwo Tholemiosi a songa mutumba na khosi guḓani vha tshi nga vha khou rwiwa nga muya, a i fhembeledza uri i kande mbiti dzayo. ₄₇Menelaosi ene o vhangaho vhuvhi hoṱhe, khosi ya si tsha mu vhona mulandu kha zwe a pomokwa, vhanna vhaḽa vha vhathu ya vha haṱulela lufu, ngeno vho vha vha tshi ḓo pfi a vha na mulandu naho vho vha vho sengiswa nga vhathu vha songo funzwaho. ₄₈Ngezwo, vhaḽa vho sengelaho muḓi na vhathu na midzio mikhethwa vho mbo ḓi rwiwa kathihi fhedzi nga ṱhamu i songo vha livhanaho. ₄₉Ndi zwe na vhathu vhaṅwe vha Tiro vha dinwa nga vhuvemu uho lwe vha bvisa mali ya u lugisela vhathu avho mushumo muhulu wa u vha swiṱa. ₅₀Hone nge avho vhaḓivhalea vha tamesa mali, Menelaosi, tshifheṱi tshihulu tsha vhathu vha hawe, a ḓi dzula mushumoni wawe, vhuvhi hawe ha ḓi hulela vhu tshi ya.