2 VHAMAKHABI 8

₁Judasi Makhabiosi na khonani dzawe vha dzhena miḓanani nga tshidzumbe vha vhidza mashaka avho, vha ita na u ṅwalisa vha kha ḓi nambatelaho Tshijuda, vha kuvhanganya vhanna vha zwigidi zwiṱanu na tshithihi (6 000). ₂Vha rabela Muṋe washu uri a londole vhathu vhawe vhane vha khou kandeledzwa masia oṱhe, thembele ye ya vha yo kumadzwa nga vhanna vha sa ofhi Mudzimu a i pfele vhuṱungu, ₃a khathutshele muḓi we wa vha u tshi khou phusukanywa, u tshi ṱoḓou thuthiwa we fhasi huru, a thetshelese malofha ane a mu lilela, ₄a elelwe tshiṱuhu tsha u vhulaha vhana vha si na tshe vha tshinya, a elelwe na maipfi a u nyefula dzina ḽawe, a sumbedze uri u vhenga vhuvhi. ₅Makhabiosi a dzudzanya vhanna vhane a vha navho, vhannḓa vha kundwa u imedzana navho, ngauri mbiti dza Muṋe washu dzo vha dzo no shanduka khathutshelo. ₆Makhabiosi o vha a tshi tshoṱhela miḓi na miḓana á songo lavhelelwa, a i fhisa nga mulilo. O thuba fhethu he ha dzivhelwa, a shakulisa maswina a na tshivhalo, ₇a tshi anzela u tshoṱhela maswina vhusiku nga u vhona tshi tshone tshifhinga tshavhuḓi. Bvumo ḽa vhuhali hawe ḽa pfala thungo dzoṱhe.

₈Filipi a tshi vhona uri Judasi u khou ṱoka midzi nga zwiṱuku nga zwiṱuku, na uri u khou ḓi kunda a tshi ya, a ṅwalela Tholemiosi, muvhusi wa Koele Siria na Finikia, uri a ḓe u phalala muvhuso wa khosi. ₉Tholemiosi a mbo ḓi nanga Nikanoro murwa wa Phathrokholosi, muṅwe wa Khonani Khulwane, a mu ruma na vhanna vho ḓiṱamaho vhane vha nga fhira zwigidi zwa mahumi mavhili (20 000) vha tshakha dzo fhambanaho, uri vha vhulahe lushaka lwoṱhe lwa Majuda. A konana na Gorogiasi, mulangammbi a re na nḓivho ya zwa nndwa. ₁₀Nikanoro a elekanya u kuvhanganya thalennde dza zwigidi zwivhili (2 000) dza muthelo dzine khosi ya fanela u lifhela Vharoma nga u rengisa Majuda vho thubiwaho vha itwa dziphuli. ₁₁Zwenezwo a mbo ḓi swikisa ipfi miḓini ya khunzikhunzini, a tshi vha fulufhedzisa phuli dza Majuda dzine vha ḓo kona u renga vha tshi wana dza mahumi maṱanu na maṋa (90) nga thalennde. Hone o vha a songo humbula ṱhamu ya Ramaanḓaoṱhe ine ya ḓo mu rwa.

₁₂Musi Judasi a tshi pfa upfi Nikanoro u nḓilani a yo vhudza khonani dzawe uri mmbi yo swika, ₁₃magoswi na vha sa fulufheli u sa khakha ha Mudzimu vha mbo ḓi pfuluwa vha shavha. ₁₄Vhaṅwe vha rengisa thundu yavho yoṱhe ye ya vha yo sala, vha ita na u humbela Muṋe washu uri a lamukise avho vhe vha dzula vho rengiswa nga Nikanoro, muthu a sa ofhi Mudzimu, a sa athu na u ṱangana navho. ₁₅Vha luvhelela Muṋe washu uri a ite izwo, a sa iteli vhone, a tshi itela mulanga we a vhofha na vhokhotsi avho, na ngauri vhone vha vhidzwa nga dzina ḽawe ḽikhethwa ḽa vhugala. ₁₆Makhabiosi a kuvhanganya vhahali vhawe vha zwigidi zwiṱanu na tshithihi (6 000), a vha ṱuṱuwedza uri vha songo shavha vha tshi ṱangana na maswina, nahone vha songo ofha u anda ha vhannḓa vha tshi lwa navho vha si na tshine vha lwela tshone, vha lwe vhe na tshivhindi, ₁₇vha si hangwe na vhutshinyi ha vhannḓa ha u nyadza Mulayo vha tshi lwa na fhethu hukhethwa, vha humbule na u ṱungufhadzwa ha muḓi wo nyadziwaho, khathihi na u thuthiwa ha kutshilele kwa vhomakhulukuku wavho. ₁₈Makhabiosi a ri, “Maswina a fulufhela zwihali na vhuhali havho, hone riṋe ri fulufhela Mudzimu Ramaanḓaoṱhe, ane nga u tou poidza luthihi fhedzi a lozwa vhane vha lwa na riṋe a dovha a lozwa na shango ḽoṱhe arali zwi tshi ṱoḓea.” ₁₉A isa phanḓa a vha humbudza zwa misi hu tshi lamukiswa vhomakhulukuku wavho: misi ya Sanakheribi musi hu tshi lozwiwa vhahali vhawe vha zwigidi zwa ḓana na mahumi maṱanu na mararu na zwiṱanu (185 000), ₂₀na misi ya nndwa kha ḽa Babilonia hu tshi lwiwa na Vhagalata, Majuda vha zwigidi zwiṱanu na zwiraru (8 000) fhedzi vha tshi khou lwa vhe na Vhamakedonia vha zwigidi zwiṋa (4 000), naho zwo ralo, Vhamakedonia vha tshi khou kundwa, Majuda avho vha zwigidi zwiṱanu na zwiraru (8 000) vha lozwa Vhagalata vha zwigidi zwa ḓana na mahumi mavhili (120 000) vha ita na u dzhia zwinzhi zwe vha vha ṱangula, nge vha fariswa nga Waṱaḓulu. ₂₁A vha ṱuṱuwedza nga maipfi o raloho, vha pfa vha sa tati u fela mulayo wavho na shango ḽavho.

Ndi hone Judasi a tshi khethekanya mmbi yawe ya bva zwigwada zwiṋa, ₂₂kha tshigwada tshiṅwe na tshiṅwe a vhea vhana vha khotsi awe, Simoni na Josefa na Jonathani, muṅwe na muṅwe a mu ṋea vhanna vha tshigidi na maḓana maṱanu (1 500) uri a vha range phanḓa. ₂₃Judasi a dovha a vhea Eliazara uri a vhalele vhanna bugu khethwa, vha mbo ḓi ṱangana na mmbi ya Nikanoro vha tshi huvha mihuvho vha tshi ri, “Pfariso yashu ndi Mudzimu!”, Judasi ó ranga tshigwada tsha u thoma phanḓa. ₂₄Ramaanḓaoṱhe a ima navho, vha vhulaha maswina avho a no fhira zwigidi zwiṱanu na zwiṋa (9 000), vhunzhi ha vha mmbi ya Nikanoro vha phulwa mbonzhe, vhoṱhe vha shakuliswa. ₂₅Vha dovha vha dzhia na mali ya avho vhe vha ḓa u vha renga uri vha itwe dziphuli. Vha pandamedza maswina tshikhalanyana, vha kombetshedzea u huma nge ḽa vha ḽo no kovhela. ₂₆Ho vha hu tshi ḓo vuwa hu Sabatha, ndi zwe vha si kone u vha pandamedza vha swika kule. ₂₇Vha kuvhanganya zwihali zwa maswina, vha vha ṱangula thundu yavho, vha tevhedza zwa Sabatha vha tshi renda na u livhuha Muṋe washu we a vha tsireledza musi wonoyo a vha nisela ṅwando wa u thoma wa khathutshelo yawe. ₂₈Musi Sabatha yo no fhela, vha kovha zwe vha thuba vha zwi ṋea vho tovholwaho, na dzitshilikadzi na zwisiwana, zwo salaho vha kovhekana vhone vhaṋe, vha kovhela na vhana vhavho. ₂₉Musi vho no ita izwo vha rabela vhoṱhe, vha tshi khou humbela Muṋe washu wa khathutshelo uri a pfumedzane na vhalanda vhawe tshoṱhe.

₃₀Vha ita na u lwa na mmbi ya Timoti na Bakhidese, vha vhulaha vha no fhira vha zwigidi zwa mahumi mavhili (20 000) vha avho, vha thuba madzhavhelo maṅwe mahulu. Vha kovha thundu nnzhi ye vha ṱangula, vhone vhaṋe vha dzhia hafu, yo salaho vha kovhela vho tovholwaho na zwisiwana na dzitshilikadzi, na vhakalaha na vhakegulu. ₃₁Vha kuvhanganya zwihali zwa maswina, vha zwi vhulunga nga vhuronwane fhethu ho fanelaho, thundu iṅwe ye vha ṱangula vha i hwala vha i isa Jerusalema. ₃₂Vho ita na u vhulaha mulangammbi wa u tsireledza Timoti, ene muvhi wa vhavhi; ndi ene we a vhaisesa Majuda. ₃₃Musi vha tshi khou pembelela u kunda havho vhe afho muḓini wa vhokhotsi avho, vha fhisa avho vhe vha fhisa khoro khethwa nga mulilo, vha fhisa na Khalisithenese we a vha o shavhela nḓuni ṱhukhu, zwenezwo a pfufhiwa nga zwo fanelaho zwiito zwawe zwivhi.

₃₄Nikanoro o teketelwa a dovha, ndi ene we a ḓisa vharengi vha dziphuli vha tshigidi u renga Majuda. ₃₅Musi nga pfariso ya Muṋe washu o no ṱukufhadzwa nga avho vhe a vha a tshi humbula uri a vha tshithu, ene a bvula zwifuko zwawe zwa maṱeleṱele, a shavha e eṱhe unga phuli i shavhaho muṋe wayo a buḓekanya shango, a vhuya a swika Antiokia ó no lozwa mmbi yawe. ₃₆Huno ene we a fulufhedzisa u kuvhanganyela Vharoma muthelo nga u fara vhathu vha Jerusalema, o ḓo ṱanzilela uri Majuda vha na Mulamuleli, u nga si vha kone, ngauri vha tevhedza milayo yo vhewaho ngae.