2 PITROSI 1

₁Ndi nṋe Simioni Pitrosi, muḓinḓa na muapostola wa Yesu Khristo. Ndi ṅwalela inwi vhe Mudzimu Mutshidzi washu Yesu Khristo nga vhuvhuya hawe a ni ṋea zwenezwo zwi tamisaho zwine ra zwi tenda zwe a ṋea riṋe. ₂Ndi a ni resha ndi ri: Ngavhe vhuthu ha Mudzimu na mulalo zwi tshi ḓala henengeo nge na ḓivha Mudzimu na Muṋe washu Yesu.

₃Ene Yesu Khristo vhunga e Mudzimu Ramaanḓa o ri ṋea zwoṱhe zwine ra lila uri ri kone u tshila tshoṱhe na u mu luvha nga pfanelo. Ro zwi wana nga u ḓivha Ene we a ri vhidza nga u sumbedza vhugala hawe na maanḓa awe a u ri tshidza. ₄Nga eneo maanḓa na vhugala a ri ṋea zwenezwo zwihuluhulu zwi tamisaho zwe a ri fulufhedzisa, uri naho vhanzhi vha tshi khou lovha fhano shangoni nga mulandu wa dzinyemulo, inwi ni zwi ponyoke ni si lovhe, ni vhe na mukovhe kha vhutshilo ha Mudzimu. ₅Zwenezwo ni luse nga nungo dzoṱhe u ṱama lutendo lwaṋu nga vhuvhuya, vhuvhuya na vhu ṱama nga nḓivho, ₆nḓivho na i ṱama nga u ḓifara, u ḓifara na hu ṱama nga u konḓelela, u konḓelela na hu ṱama nga u ofha Mudzimu, ₇u ofha Mudzimu na vhu ṱama nga u funa Vhakhriste nga inwi, u funa Vhakhriste na hu ṱama nga u funa vhathu vhoṱhe.

₈Arali ni na zwenezwo, zwa ḓi dzula zwi tshi engedzea, a ni nga sokou dzula nazwo, a ni nga shayi mitshelo; ni ḓo ḓi fungelela u ḓivha Muṋe washu Yesu Khristo. ₉Hone ane a shaya zwenezwo u vhonela tsini, o no ḓi pofula, o ḓihangwisa zwe a ṱanzwiwa vhutshinyi hawe ha kale.

₁₀Zwenezwo vha hashu, lingani nga nungo dzoṱhe uri kutshilele kwaṋu ku khwaṱhise uri no nangiwa na vhidzwa nga Mudzimu. Arali na ralo ni nga si vhuye na gunea. ₁₁Ngauralo Mudzimu u ḓo tou ni vulela muṋango wa u dzhena muvhusoni u sa fheli wa Muṋe washu, Ene Mutshidzi washu Yesu Khristo.

₁₂Ndi zwine nda ḓo ḓi ni humbudza mafhungo haya, naho ni tshi vho a ḓivha, nó tou ṱoka midzi kha ngoho ye na vha no no ḓi i ṱanganedza. ₁₃Ndi vhona i pfanelo ndi tshi ḓi ita ndi tshi ni humbudza nga u rali zwino ndi tshi kha ḓi tshila thumbani ino uri ndi ni ṱuṱuwedze, ₁₄ngauri ndi ḓivha uri ndi ḓo ṱuwa ndi tshi fa ha vha u thuthea ha thumba ino; Muṋe washu Yesu Khristo o nnzumbululela zwone. ₁₅Ndi zwine nda ḓo ita maanḓa uri naho nṋe ndi si tsheeho, ni ḓi dzula ni tshi a elelwa.

₁₆Ndi tshi ralo ndi ngauri zwiḽa ndi tshi ni ḓivhadza maanḓa a Muṋe washu Yesu Khristo na uri u ḓo vhuya, ho vha hu si u ni hanelela ngano dzo tou lukwaho nga vhathu, aiwa, vhugala hawe ro vha ro tou vhu vhona nga ashu maṱo. ₁₇Ro vha ri henefho musi Mudzimu Khotsi a tshi mu hulisa a mu ṋea vhugala, hu tshi pfala ipfi ḽi bvaho ha Muṋe wa vhugala ḽi tshi ri, “Hoyu ndi Murwa wanga muthihi fhedzi; u a ntakadza.” ₁₈Riṋe nga dzashu ro tou ḽi pfa heḽo ipfi ḽi tshi bva ṱaḓulu. Ḽi tshi pfala ro vha ri nae thavhani iḽa khethwa.

₁₉Ra dovha ra vha na ipfi ḽa vhuporofita ḽi re vhuṱanzi ho khwaṱhaho vhu no fhira na hezwo zwe ra zwi pfa thavhani; ḽi nga lwenzhe lu vhonetshelaho swiswini. Ni ita zwone arali ni tshi ḽi farelela mapfuvhi a vhuya a tswuka, Masase ya ṱanḓamela mbiluni dzaṋu.

₂₀Tshihuluhulu ḓivhani uri a hu na vhuporofita Maṅwaloni vhune muthu a nga kona u vhu ṱalutshedza nga ṱhalukanyo yawe ene muṋe. ₂₁A zwo ngo vhuya zwa itea he vhuporofita ha sokou bvelela nge muambi a zwi funa; ndi Muya Mukhethwa we a vha funzedza vha konou amba ipfi ḽa Mudzimu.