DANIELE 9

₁Wo vha u ṅwaha wa u thoma wa muvhuso wa Dariosi ṅwana wa Serekesese wa lutsinga lwa Vhamedia, a tshi thoma u vhusa na Vhababele. ₂Nga ṅwaha wa u thoma wa muvhuso wawe, nṋe Daniele ndo vha ndi tshi khou vhala Maṅwalo, ndi tshi khou vhala miṅwaha, sa zwe Muṋe washu a dzumbululela muporofita Jeremia, uri hu ḓo fhela miṅwaha ya 70 Jerusalema hu sa dzuli muthu. ₃Nda rembulutshela ha Mudzimu Muṋe wa zwoṱhe ndi tshi khou luvhelela nga thabelo ndi tshi ḓidzima, ndo ambara madzanganda, ndi tshi dzula milorani.

₄Nda humbela Muṋe washu Mudzimu wanga nda bula nda ri, “Muṋe washu, iwe Mudzimu muhulwane, u a ofhisa, a u vhofhololi mulanga we wa vhofha, vhane vha u funa vha vhulunga ndaela dzau u vha itela vhuthu! ₅Ro tshinya, ro khakha, ro ita zwo vhifhaho, ro u shandukela, ro furalela milayo yau na ndaela dzau. ₆A ro ngo thetshelesa vhaḓinḓa vhau vhaporofita vha tshi amba nga dzina ḽau vha tshi amba na mahosi ashu na vhavhusi vhashu na vhomakhulukuku washu na vhathu vhoṱhe vha shango. ₇Iwe Muṋe washu a hu na he wa khakha, hone riṋe ṋamusi ro ambara ṱhoni, riṋe vhathu vha Juda, vhadzulapo vha Jerusalema, vha ḽoṱhe ḽa Israele, kule na tsini, mashangoni oṱhe he wa vha balanganyela hone nge wa vhona vha sa fulufhedzei. ₈Muṋe washu, riṋe na mahosi ashu na vhavhusi vhashu na vhokhotsi ashu ro niwa nga ṱhoni nge ra u khakhela.

₉“Iwe Mudzimu Muṋe washu u na tshilidzi, u a hangwela, nangwe ro u shandukela. ₁₀Mudzimu Muṋe washu, a ro ngo thetshelesa ipfi ḽau, a ro ngo vhulunga milayo yau ye wa ri ṋea nga vhaḓinḓa vhau vhaporofita. ₁₁Vhaisraele vhoṱhe vho pfuka milayo yau vha u furalela, vha hana u thetshelesa ipfi ḽau. Ndi zwe khombo dzo ṅwalwaho kha mulayo wa Mushe muḓinḓa wau dza shulutshela kha riṋe, dzenedziḽa khombo dze wa amba nga muano wa ri u ḓo ri teketela nge ra u khakhela. ₁₂Wo khunyeledza maipfi e wa amba wa ri u ḓo rwa riṋe na vhavhusi vhoṱhe vhashu nga u ri ḓisela khombo khulu. Shangoni ḽoṱhe a hu athu vhuya ha itwa zwo itwaho Jerusalema. ₁₃Zwino ro welwa nga khombo nngafha sa zwe zwa ṅwaliwa kha mulayo wa Mushe, naho zwo ralo a ro ngo linga u takadza Mudzimu Muṋe washu nga u furalela vhuvhi hashu na u ṱalukanya u fulufhedzea hau. ₁₄Ndi zwe Iwe Muṋe washu wa si litshe u ri ḓisela khombo: Mudzimu Muṋe washu, Iwe u ḓi ri ita zwi re zwone, ndi riṋe vhe ra sa thetshelese ipfi ḽau. ₁₅Zwino Muṋe wa zwoṱhe Mudzimu washu, wo ri bvisa shangoni ḽa Egipita nga tshanḓa tshau tsha maanḓa, bvumo ḽau ḽi kha ḓi pfala na ṋamusi; riṋe ro tshinya, ro ita vhuvhi.

₁₆“Yawee Muṋe washu, vhunga u tshi ḓi fulufhedzea, u songo tsha sinyutshela Jerusalema, wone muḓi wau, thavha yau khethwa. Vhoṱhe vho ri tangaho vha nyadza Jerusalema na vhathu vhau nga mulandu wa vhutshinyi hashu na vhuvhi ha vhokhotsi ashu. ₁₇Zwino-ha Mudzimu washu, thetshelesa thabelo yanga ndi tshi u luvhelela Muṋe washu, tshifhaṱuwo tshau nga tshi dovhe tshi takale u tshi sedza hukhethwa hau ho ṱutshelwaho, u tshi itela Iwe muṋe. ₁₈Mudzimu wanga, thetshelesa u ri pfe, bonyolola u sedze marubi a muḓi une wa vhidzwa nga dzina ḽau. Ri tshi luvhelela nga u ralo a ri khou fulufhela mishumo yashu mivhuya, ri fulufhela khathutshelo yau khulu fhedzi. ₁₉Muṋe washu, ri thetshelese! Muṋe washu, ri hangwele! Muṋe washu, thetshelesa u ite! Mudzimu wanga, u songo tsha lenga! Zwi ite u tshi itela Iwe muṋe, hufha ri tshi vhidzwa nga dzina ḽau, uyu muḓi u pfi ndi wau, avha vhathu vha pfi ndi vhau.”

₂₀Musi ndi tshi kha ḓi amba, ndi tshi kha ḓi rabela, ndi tshi khou swikisa khumbelo yanga phanḓa ha Muṋe washu Mudzimu wanga ndi tshi rabelela thavha khethwa ya Mudzimu wanga, ₂₁nda ri ndi tshi kha ḓi amba, ndi tshi kha ḓi rabela, Gabriele, uḽa munna we nda mu vhona kha bono ḽa u ranga, a fhufhela fhasi a ḓa ha nṋe nga luvhilo nga tshifhinga tsha nduvho ya nga madekwana. ₂₂A ḓa u nṱalutshedza a ri, “Daniele, u a mmbona, ndo ḓa u u funza u ṱalukanya. ₂₃Hezwo u tshi thoma u luvhelela, Mudzimu a mbo fhindula, ngauri u a u funa, zwino nṋe ndo ḓa u u vhudza phindulo. Thetshelesa u konou ṱalukanya: ₂₄Zwe Mudzimu a vhea a si miṅwaha ya 70 fhedzi, ndi miṅwaha miṱanu na mivhili i tshi vhaliwa ka 70, ndi hone-ha u shanduka ha vhathu vha hau na ha muḓi mukhethwa hu tshi ḓo kaṱudzwa, vhutshinyi ha fheliswa, milandu ya pfumelelwa, Mudzimu a pfumbisa mulayo wawe kha vhoṱhe lini na lini, ha khunyelela na mabono a vhaporofita, ha kumululwa Hukhethwakhethwa.

₂₅“Tsha ndi dovhe ndi ṱalutshedze u zwi pfese: U bva tshifhinga tshine ha ḓivhadzwa ha pfi ni hume ni vuse Jerusalema hu vhuye hu ḓe murangaphanḓa we a nangwa nga Mudzimu, hu ḓo fhela miṅwaha miṱanu na mivhili i tshi vhalwa kaṱanu na kavhili. Jerusalema u ḓo vuswa wa vha na mikoto na mitsheṱo yo khwaṱhaho, wa ima wa fhedza miṅwaha ya 62 i tshi vhalwa kaṱanu na kavhili hone hetsho tshi ḓo vha tshifhinga tsha mufhirifhiri. ₂₆Musi hu tshi fhira tshifhinga tshenetsho, murangaphanḓa we a nangwa nga Mudzimu u ḓo vhulawa a si na tshawe. Muḓi na thembele zwi ḓo phusukanywa nga vhathu vha muvhusi ane a ḓo ḓa, zwa fhela zwa nga zwo kumbiwa nga muḓalo wa maḓi zwa vhuya zwa fhela hu tshi kha ḓi vha na nndwa na phusuphusu zwe zwa dzula zwo ambiwa. ₂₇Uyo muvhusi u ḓo vhofha mulanga wo khwaṱhaho na vhathu vhanzhi zwa ita miṅwaha miṱanu na mivhili. Hu ḓo ri vhukati ha tshifhinga tshenetsho, a ri hu songo tsha ṋekedzwa zwiṱhavhelo na nduvho. Tshithu tshi nengisaho tsha u phusukanya tshi ḓo imiswa muṱumbani wa thembele, tsha dzula henefho, we a tshi imisa a vhuye a ṱangane na vhufhelo he a livhanywa naho.”