DOTORONOMIO 34

₁Mushe a takuwa phangani ya govha ḽa Muaba a gonya thavha ya Nebo, a vhuya a swika muṱumbani wa Phisiga u livhana na Jerikho. Ndi hone Muṋe washu a tshi mu sumbedza shango ḽoṱhe u bva Giliadi u swika Dani, ₂na ḽoṱhe ḽa Nafuthali na ḽa Efraimi na ḽa Manase na ḽa Juda u swika Lwanzheni lwa Phandamashango, ₃na Negeve na govha ḽa Jerikho muḓi wa mitshevho, u vhuya u swika Tsuara. ₄Muṋe washu a mu vhudza a ri, “Ngeḽi shango ḽe nda fulufhedzisa Abrahamu na Isaka na Jakopo nda ana nda ri ndi ḓo ḽi fha vhaḓuhulu vhavho. Zwino ndi tou u sumbedza uri u kone u ḽi vhona nga maṱo au, hone u wela a u nga wetsheli khaḽo.”

₅Ndi hone Mushe muḓinḓa wa Muṋe washu a tshi fa henefho shangoni ḽa Muaba unga Muṋe washu o amba. ₆Muṋe washu a mbo mu swiṱa henefho govhani u livhana na Bethe Phioro shangoni ḽa Muaba. U swika na ṋamusi a hu na muthu a ḓivhaho uri tshalo tshawe tshi ngafhi.

₇Mushe a tshi fa o vha e na miṅwaha ya 120, hone a tshi kha ḓi vhona zwavhuḓi, na maanḓa a tshi kha ḓi vha nao. ₈Vhaisraele vha lilela Mushe henefho govhani phangani ya Muaba vha fhedza maḓuvha a 30, maḓuvha a u lila a vhuya a fhela.

₉Ndi hone Vhaisraele vha tshi thoma u thetshelesa Joshua ṅwana wa Nunu. O vha o ḓala muya wa vhuṱali, ngauri Mushe o vha o mu vhea zwanḓa; o tevhedza zwoṱhe zwe Muṋe washu a vha o laya Mushe.

₁₀A ho ngo tsha dovha ha vha na muporofita a no nga Mushe kha Vhaisraele; ene, Muṋe washu o amba nae vho livhana zwifhaṱuwo. ₁₁A hu na muṅwe a no vhambedzwa nae kha zwiga na maḓembe zwe Muṋe washu a mu ruma uri a zwi ite shangoni ḽa Egipita uri a rwe Farao na vhalanda vhawe vhoṱhe na shango ḽawe ḽoṱhe, ₁₂a hu na we a vhuya a ita mishumo yoṱhe mihulwane i ofhisaho sa ye Mushe a ita Vhaisraele vhoṱhe vha tshi zwi vhona.