Thabelo ya Estere
1Zwino Mufumakadzi Estere na ene a shavhela ha Muṋe washu ó ṱungufhala lu isaho lufuni. 13/2O bvula khanzu dzawe dza maṱeleṱele, a ambara khanzu dza u ṱungufhala na tshililo. O litsha u ḓola mapfura awe a mutengo muhulu, a ḓishela buse ṱhohoni, a i shula nga vhutoko. O dzima muvhili wawe tshoṱhe, zwoṱhe zwa u ḓinakisa a tshi ya vhuṱamboni a zwi vhetshela thungo a sala o bubutshelwa, a tupula mavhudzi awe a a hasha rumuni dze a vha o ḓitakalela khadzo.
14/3Ndi hone a tshi rabela Muṋe washu Mudzimu wa Israele, a ri, “Yawee Muṋe wanga Khosi yashu, ndi Iwe Mudzimu u woṱhe. Mpfarise nṋe ndi re ndoṱhe, a thi na a no mpfarisa, ndi fariswa nga Iwe fhedzi, 15/4ndi khou luma mbilu nda ita zwine zwa nga mmbulahisa. 16/5U bva hanani hanga ndo ḓi pfa vha tsinde ḽa muṱa wa hashu vha tshi ri Iwe Muṋe washu wo nanga Vhaisraele kha tshakha dzoṱhe, wa nanga na vhomakhulukuku washu kha vhomakhulukuku wavho vhoṱhe, uri vha vhe vhathu vhau lini na lini, na uri wo khunyeledza zwoṱhe zwe wa vha fulufhedzisa. 17/6Hone zwino ro tshinya maṱoni au, Iwe wa ri kumedza zwanḓani zwa maswina ashu, 18/7nge ra gwadamela midzimu yavho. Iwe Muṋe washu a u khakhi! 19/8Zwino hezwi ri tshi khou tambula vhupulini a vha fushei, vho vhofha mulanga na midzimu yavho, 20/9wa u thutha zwe wa bula nga mulomo wau, uri vha lozwe lushaka lwau, vha vale milomo ya vhane vha u renda, na u dzima vhugala ha thembele yau na aḽiṱari yau, 21/10uri vha vule milomo ya vhannḓa, vhone vha rende midzimu yavho ya mahandana, khosi i re muthu wa ṋama vha i ite mudzimu lini na lini.
22/11“Yawee Muṋe washu, luḓo lwau lwa vhuhosi u songo lu kumedza zwi si tshithu. U songo litsha ri tshi lozwiwa vha ri holedza, khunḓa nga i fashe muvei, nkhwalasambi ya maswina ashu u mu ite tsumbo ya ndifhedzo yau. 23/12Yawee Muṋe washu, ri elelwe. Ḓiḓivhadze nga tshifhinga tshino tsha u ṱungufhadzwa hashu, u nṋee tshivhindi, Iwe Khosi ya midzimu, Muvhusi wa mivhuso yoṱhe! 24/13Longa maipfi a u takadza khosi mulomoni wanga musi ndi phanḓa ha ndau, u rembuluse mbilu yawe a vhenge swina ḽashu, uri ene na vha no ima nae vha mbo ḓi lovha. 25/14Huno ri tshidze nga tshanḓa tshau, u mpfarise, nṋe ndi re ndoṱhe, ndi si na a no mpfarisa arali e si Iwe Muṋe washu!
26/15“Iwe u ḓivha zwithu zwoṱhe. U ḓivha uri nṋe ndi vhenga u huliswa nga vha nyadzaho Mudzimu, ndi nengwa vhulalo ha a songo fumbaho na ha mutsinda ufhio na ufhio. 27/16Iwe u ḓivha uri ndí mufumakadzi wa khosi ndi u tou kombetshedzwa, ndi sanda khare ya vhafumakadzi ine nda i ambara ṱhohoni musi ndi tshi ya vhathuni, ndi i sanda unga sila ḽa tshika, musi ndi ndoṱhe a thi i ambari. 28/17Nṋe mulanda wau a thi athu vhuya nda ḽa zwiḽiwa ḓafulani ḽa Hamani, a thi athu hulisa vhuṱambo ha khosi kana nda nwa waini ya thevhula. 29/18Nṋe mulanda wau a thi athu vhuya nda takala tshi tsheetsho tshee nda ḓiswa fhano na ṋamusi, tshanga ndi takalela Iwe Muṋe washu, Mudzimu wa Abrahamu. 30/19Mudzimu, maanḓa au a fhira zwoṱhe, thetshelesa ipfi ḽa Vhaisraele vho fulufhuwaho. Ri lamukise zwanḓani zwa vhavhi, u fhelise na nyofho dzanga!”
