Muporofita ndi mulindi
1Ipfi ḽa Muṋe washu ḽo amba na nṋe ḽa ri, 2“Iwe ṅwana wa muthu, amba na vha lushaka lwa hau. Vha vhudze u ri, ‘Misi ndi tshi ḓisa pfumo shangoni, vhathu vha shango ḽeneḽo vha nanga muṅwe wavho vha mu ita mulindi. 3Arali a tshi vhona swina ḽi tshi ḓa u dia shango, tshawe ndi u lidza phalaphala u karusa vhathu. 4Zwino arali muṅwe a ri u pfa phalaphala i tshi lila a si zwi londe, u ḓo wanwa nga pfumo ḽa mu lozwa; u fa hawe u ḓo vha u mulandu wawe. 5O pfa phalaphala i tshi lila a si zwi londe; u fa hawe u ḓo vha u mulandu wawe. Ane a ri u pfa phalaphala a zwi dzhiela nzhele u ḓo tshila.
6“ ‘Hone arali mulindi a ri u vhona swina ḽi tshi ḓa u dia shango a si lidze phalaphala yawe, vhathu vha si karuswe, swina ḽa vha wana ḽa vhulaha muṅwe wavho, uyo muthu vhukuma u ḓo fela vhutshinyi hawe, hone mulandu wa lufu lwa uyo muthu Nṋe ndi ḓo u hwesa mulindi.’
7“Iwe ṅwana wa muthu, nṋe ndo u vhea uri u vhe mulindi wa vhathu vha Israele. Musi u tshi pfa ipfi ḽi bvaho mulomoni wanga, vha karuse nga dzina ḽanga. 8Arali nda vhudza muvhi nda ri, ‘Iwe muvhi, vhukuma u ḓo fa,’ iwe wa si ambe wa kaidza uyo muvhi uri a laṱe nḓila dzawe, onoyo u ḓo fela vhutshinyi hawe, hone mulandu wa lufu lwawe ndi ḓo hwesa iwe. 9Hone arali wa kaidza muvhi uri a late nḓila dzawe a rembuluwe, ene a si rembuluwe, zwenezwo u ḓo fela vhutshinyi hawe, hone iwe wa tshila.
U rembuluwa na u sa pfa
10“Iwe ṅwana wa muthu, vhudza vhathu vha Israele u ri, ‘Ni ḓi ri: Vhuvhi hashu na vhutshinyi hashu zwi a ri lemela; zwi khou ri ṱahadza. Ri kha ḓi ḓo tshila hani?’ 11Vha vhudze u ri, ‘Nga vhutshilo hanga – hu amba Nṋe Muṋe wa zwoṱhe Yahavee – ndi ri, a thi takaleli lufu lwa muvhi, ndi takalela muvhi a tshi laṱa vhuvhi hawe uri a tshidzwe. Vhuyani, vhuyani ni laṱe vhuvhi haṋu! Inwi vhathu vha Israele, ndi mini ni tshi funa u fa?’
12“Zwino iwe ṅwana wa muthu, vhudza vha lushaka lwa hau u ri, ‘U fulufhedzea ha muvhuya hu nga si mu tshidze arali a dovha a ntshandukela; vhuvhi ha muvhi vhu nga si tsha ita uri a laṱwe arali a laṱa vhuvhi hawe, na muvhuya a nga si tshile nga u fulufhedzea hawe arali o sala a tshi tshinya. 13Arali nda vhudza a fulufhedzeaho nda ri: Vhukuma u ḓo tshila, zwino ene nga u fulufhela u fulufhedzea hawe, a pambutshela vhuvhini, a thi tsha ḓo elelwa u fulufhedzea hawe hoṱhe; u ḓo fela vhuvhi hawe. 14Huno arali nda vhudza muvhi nda ri: U ḓo fa, ene a laṱa vhutshinyi hawe, a ita zwi re zwone na zwivhuya, 15arali a humisa thundu ya muṅwe ye a i farela mulandu we onoyo a ḽa, a vhuedzedza tshe a tswa, a vhulunga milayo ine ya ṋea muthu vhutshilo, a si tsha ita vhuvhi, vhukuma ha nga fi, u ḓo tshila. 16Vhuvhi hawe hoṱhe ha kale a thi tsha ḓo vhu elelwa – o ita zwine zwa vha zwone na zwivhuya; vhukuma u ḓo tshila.’
17“Vhathu vha lushaka lwa hau vha a hanedza vha ri, ‘Zwine Yahavee a ita a si zwone,’ hu uri zwi si zwone ndi zwine vhone vha ita. 18Arali muvhuya a tshi furalela u fulufhedzea hawe, a ita vhuvhi, u fela hone. 19Huno arali muvhi a tshi laṱa vhuvhi hawe a tevhedza mulayo, a ita zwivhuya, u ḓo tshila nge a ita nga u ralo. 20Ni a hanedza na ri, ‘Zwine Yahavee a ita a si zwone.’ Inwi vhathu vha Israele, Nṋe ndi ḓo haṱula muṅwe na muṅwe ndi tshi tevhedza zwine a ita.”
Muḓi wa Jerusalema u tshi dzhiwa nga Vhakhaladia
21Nga ṅwaha wa fumi na vhuvhili ri vhuthubwani, nga ḓuvha ḽa vhuṱanu ḽa ṅwedzi wa fumi, ha swika tshavhi i tshi bva Jerusalema ya ri vhudza ya ri, “Muḓi wo dzhenwa.” 22Zwino nga madekwana a musi iyo tshavhi i tshi ḓo vuwa i tshi swika, ndo vha ndo pfa ndi tshi tsikeledzwa nga tshanḓa tsha Muṋe washu; o no ḓi mmvula mulomo iyo tshavhi i sa athu swika ha nṋe nga matsheloni a nga ḽa matshelo; mulomo wanga wo vha wo vulwa, ndi si tshee tshimuma.
U ḓifulufhela ha vho salaho kha ḽa Juda
23Ipfi ḽa Muṋe washu ḽo amba na nṋe ḽa ri, 24“Iwe ṅwana wa muthu, vhathu vha no khou dzula matumbani shangoni ḽa Israele vha ri, ‘Abrahamu o vha e eṱhe musi a tshi ṋewa shango heḽi uri ḽi vhe ḽawe. Zwino riṋe hufha ri vhanzhi, shango heḽi ḽo ṋewa riṋe uri ḽi vhe ḽashu.’
25“Ndi zwone, vha vhudze u ri, ‘Muṋe wa zwoṱhe Yahavee u ri: Ni ḽa ṋama i tshi kha ḓi vha na malofha, ni luvha midzimu ya tshika, ni shulula malofha a vhathu; zwino ni vhona unga shango ḽi nga vha ḽaṋu naa? 26Ni fulufhela mafumo aṋu, ni ita zwi nengisaho, muṅwe na muṅwe waṋu u ita vhupombwe na musadzi wa muṅwe; ni vhona unga shango ḽi nga vha ḽaṋu naa?’ 27Vha vhudze u ri, ‘Muṋe wa zwoṱhe Yahavee u ri: Nga vhutshilo hanga ndi ri, vha re matumbani vha ḓo vhulawa nga pfumo, vha re shangoni ndi ḓo vha kumedza zwivhanda uri zwi vha ḽe, vha re vhushavheloni na mapakoni vha ḓo fa nga dwadze. 28Ndi ṱoḓa uri shango heḽo ndi ḽi ite phanga ḽi sale ḽi si na muthu, nahone a ḽi tsha ḓo ṱongisa maanḓa aḽo. Thavha dza Israele dzi ḓo sala dzi si na vhathu nahone a hu na a no ḓo dovha a fhira henefho. 29Ndi hone vhathu vha tshi ḓo zwi ḓivha uri ndi Nṋe Yahavee musi shango ndi tshi ḽi ita soga ḽa sala ḽi si na muthu, nga mulandu wa zwoṱhe zwi nengisaho zwine vha ita.’
Mitshelo ya pfunzo ya muporofita
30“Iwe ṅwana wa muthu, vhathu vha lushaka lwa hau vha khou amba iwe vho ima nnḓa ha nnḓu dzavho na miṋangoni ya dzinnḓu. Vha endela u ri, ‘Iḓani ri pfe ipfi ḽi no bva kha Yahavee.’ 31Vha a u kuvhanganela; vhathu vhanga vha dzula fhasi phanḓa hau, vha thetshelesa maipfi au, hone a vha tevhedzi zwine wa amba. Vha amba zwa vhuhwavho, hone mbilu dzavho vho dzi vhea kha zwa u pfuma nga vhufhura. 32Vhone vha vhona iwe u tshi nga muthu ane a imba luimbo lwa lufuno nga ipfi ḽa u naka a tshi lidza haripa zwavhuḓi. Vha pfa maipfi au, hone a hu na ane a tevhedza zwine wa amba. 33Musi zwe wa amba zwi tshi bvelela – huno zwino ndi hone zwi tshi thoma – ndi hone vha tshi ḓo ḓivha uri ho vha hu na muporofita vhukati havho.”
