U pfi muvhuya nga lutendo, hu si nga Mulayo
1Hee Vhagalata, ni tou vha matsilu-ḓe? No panzhilelwa nga nnyi? Hufha ro ni ḓivhadza Yesu Khristo zwavhuḓi, zwa tou nga no mu vhona nga aṋu maṱo o vhambiwa kha tshifhambano. 2Edzonu mmbudza tshithu tshithihi zwatsho: ni tshi ṱanganedza Muya wa Mudzimu ndi nge na khunyeledza Mulayo kana ndi nge na pfa mafhungo maḓifha na a tenda? 3Zwino ndi mini ni tshi tou vha matsilu mangafha? No thoma nga u endedzwa nga Muya wa Mudzimu; kani-ha zwino ni vho ṱoḓa u vuledza nga nungo dzaṋu? 4Zwino na ḓivhelani-ha zwingafhongafho? Arali zwo vha zwi zwa fhedzi, a, izwo nṋe thi tsha ḓivha! 5Kani-ha Mudzimu a tshi ni ṋea Muya nga vhuḓalo a ni itela maḓembe ndi nge na khunyeledza Mulayo kana ndi nge na pfa mafhungo maḓifha na a ṱanganedza? 6A thi ri na Maṅwalo a tshi amba Abrahamu a ri, “O fulufhela Mudzimu, ndi zwe Mudzimu a ri ndi muvhuya ngazwo.”
7A ni vhoni-ha! Vha fulufhelaho Mudzimu ndi vhone vhaḓuhulu vha Abrahamu. 8Hufha na Maṅwalo o dzula o zwi amba uri Mudzimu u ḓo ri vhannḓa ndi vhavhuya nge vha mu fulufhela. Ndi zwe Maṅwalo a dzula o ḓivhadza Abrahamu mafhungo maḓifha a tshi ri, “Mudzimu u ḓo ḓisela tshakha dzoṱhe mashudu nga iwe.” 9Abrahamu o fulufhela Mudzimu a konou vha na mashudu; ndi zwine vhoṱhe vha fulufhelaho vha vha-vho na mashudu unga ene.
10Vhane vha ḓitika nga u khunyeledza Mulayo vho dzula vho teketelwa. Maṅwalo na one a ri, “Ane a si khunyeledze zwoṱhe zwo ṅwalwaho Buguni ya Mulayo o dzula o teketelwa.” 11Zwino zwi khagala uri haho ane a pfi muvhuya nga Mudzimu nga u khunyeledza Mulayo. Hufha Maṅwalo na one a tshi ri, “Hu ḓo tshila ane a pfi muvhuya nga u fulufhela Mudzimu.” 12Hone Mulayo a u shumi nga nḓila ya lutendo. Hu tou pfi, “Ane a tevhedza zwoṱhe hezwi zwine Mulayo wa amba, u ḓo tshila ngazwo.”
13Hone Khristo Ene o ri rengulula kha u teketelwa he ra ḓiovhela nga u kundwa u khunyeledza Mulayo, a vha muteketelwa nga mulandu washu. Maṅwalo na one a ri, “Ane a vhuya a tou nembeledzwa kha thanda, o teketelwa.” 14Zwino-ha Khristo o pfalwo-vho uri mashudu e Mudzimu a fulufhedzisa Abrahamu, na vhannḓa vha a wane nga Khristo Yesu, uri nga u fulufhela Ene ri kone u wana Muya we Mudzimu a ri fulufhedzisa.
Mulayo na zwe ra fulufhedziswa
15Vha hashu, litshani ndi ni fanyisedzele nga zwine ra ḓi ita ri tshi ṱangana nazwo: arali luṅwalo lwa ifa lwa vhuya lwa khwaṱhiswa, a lu tsha vhofholowa nga muṅwe kana ha engedzwa zwiṅwe khalwo. 16Zwino vhonani, zwiḽa zwithu Mudzimu o zwi fulufhedzisa Abrahamu na muḓuhulu wawe. Maṅwalo ha ri, “na vhaḓuhulu vhau” lini, ha vho nga a amba vhathu vhanzhi; a ri, “na muḓuhulu wau,” a tshi amba muthu muthihi. Onoyo muthu ndi Khristo. 17Ndi tshi ralo ndi khou ri: Mudzimu o pfana na Abrahamu a dzula o vhofha mulanga. Mulayo wa Mushe we wa sala u tshi ḓa ho no fhela miṅwaha ya 430 u nga si kone u thutha uyo mulanga wa vhulaha zwe Mudzimu a fulufhedzisa. 18Arali ifa ḽi tshi nga wanala nga u khunyeledza Mulayo, izwo-ha a ḽi wanali nga u fulufhela zwe ra fulufhedziswa; hone Mudzimu o ḽi ṋea Abrahamu nga u tou mu fulufhedzisa.
19Wone Mulayo wo vhetshelwani-ha zwino? Wo vhetshelwa u sumbedza vhukhakhi ha vhathu, uri u shume hu vhuye hu ḓe uḽa muḓuhulu wa Abrahamu we a zwi fulufhedziswa. Nahone u tshi ḓa wo ḓiswa nga vharuṅwa, ha konou vha na ṋenḓila. 20Hone-ha arali hu na muthihi fhedzi ane a zwi ita nga tsha vhukoma, a hu tsha ṱoḓea ṋenḓila. Huno-ha Mudzimu ndi muthihi.
Mushumo wa Mulayo
21Zwi amba uri Mulayo wa Mushe u lwa na zwe Mudzimu a fulufhedzisa kani? A zwo ngo ralo na kathihi! Ndi uri arali vhathu vho vha vho vhetshelwa mulayo une wa nga kona u vha ṋea vhutshilo, zwenezwo muthu o vha a tshi ḓo pfi muvhuya nge a u khunyeledza. 22Hone Maṅwalo a ri shango ḽoṱhe ḽi vhuswa nga vhutshinyi, uri vha ḓikumedzaho Yesu Khristo, zwe vha fulufhedziswa vha zwi wane nga u fulufhela Ene.
23Zwiḽa tshifhinga tsha lutendo tshi sa athu swika, Mulayo wa Mushe wo vha u tshi tou nga sa dzhele ye ra hoṋelwa khayo, ra lindiwa ha vhuya ha dzumbululwa lutendo. 24Ngauralo ro vha ri tshi khou lelwa nga Mulayo Khristo a vhuya a ḓa, ra konou pfi vhavhuya nga lutendo. 25Hone zwino tshifhinga tsha lutendo tshó no swika, muleli ha tsha ṱoḓea.
26Hufha noṱhe ni vhana vha Mudzimu nge na fulufhela Khristo Yesu. 27Noṱhe vhe na lovhedzwa uri ni vhe vha Khristo no ambara Khristo. 28Kha vho raloho a zwi tsha dina kana u Mujuda, kana u Mugiriki, kana u phuli kana u muḓilangi, kana u munna, kana u musadzi, tenda noṱhe ni tshithu tshithihi nge na vha vhathihi na Khristo Yesu. 29Zwino-ha arali ni vha Khristo ni vhaḓuhulu vha Abrahamu, ni ḓo ḽa ifa ḽe na fulufhedziswa nga Mudzimu.
