VHAGALATA 6

₁Vha hashu, arali muṅwe waṋu a tshenuwa o khakha, inwi vhane na langiwa nga Muya mu khuthadzeni; huno ni tshi ralo ni zwi ite nó vuḓa nó thanya uri ni si khakhe-vho. ₂Farisanani nga u angulana mihwalo, ngauralo hu ḓo vha u khunyeledza mulayo wa Khristo. ₃Arali hu na muṅwe ane a ḓiḓivha ngeno e si tshithu, onoyo u a ḓifhura. ₄Muṅwe na muṅwe kha a sedze zwine a ita; arali a wana o ita zwone, a konou ḓikhoḓela zwe ene muṋe a shuma, a sa zwi vhambedzi na zwo shuṅwaho nga muṅwe. ₅Muṅwe na muṅwe u ḓo ḓifhindulela ene muṋe.

₆Muthu ane a vha mutei kha mafhungo a Tshikhriste o fanela u kovhekana na mufunzi wawe thundu dzoṱhe dzine a vha nadzo.

₇Ni songo ḓifhura: Mudzimu ha tambiwi ngae. Muthu u kaṋa tshenetsho tshine a zwala. ₈Arali a zwala nyemulo dza tsiko yawe, u kaṋa lufu; hone arali a zwala zwa Muya Mukhethwa u kaṋa vhutshilo vhu sa gumi. ₉Zwino-ha vha hashu, kha ri tou fungelela u ita zwivhuya ri sa neti, ndi hone ri tshi ḓo kaṋa nga tshifhinga tsho fanelaho. ₁₀Zwenezwo tshifhinga tshine ra tshi wana kha ri tonde vhoṱhe, zwihulu vhatendi nga riṋe.

₁₁Vhonani uri ndi khou ni ṅwalela maḽeḓere mangafhani ndi tshi vho tou ṅwala nga tshanḓa tshanga vhukuma, ndi ri: ₁₂Vhane vha ni kombetshedza u fumba ndi vhane vha enda vha tshi ṱongisa mivhili yavho. Vha zwi ita uri vha si tovholelwe tshifhambano tsha Khristo. ₁₃Hufha na vhenevho vha fumbaho vha sa khunyeledzi Mulayo wa Mushe; vha tou funa u ni fumbisa uri vha kone u zuwa zwe vha ita mivhili yaṋu. ₁₄A vha nṋe tshine nda nga tshi zuwa ndi tshithihi: ndi tshifhambano tsha Muṋe washu Yesu Khristo. Ndi tshifa ndo vhambiwa; a thi tshee na mushumo na zwa shango; na ḽone ndi ḽi vhona sa tshithu tsho vhambwaho. ₁₅U fumba na u sa fumba a zwi na mushumo; tshililelwa ndi tshithihi: ndi u vha tshisikwa tshiswa. ₁₆Vhoṱhe vhane vha ḓiela nga muelo wonoyo, vha re vhone Vhaisraele vha Mudzimu, ngavhe vha tshi vha na mulalo vha itelwa vhuthu.

₁₇U bva zwino ni songo tsha nndemedza; mavhadzi aya ane nda vha nao muvhilini wanga ndi luswayo lwa u vha phuli ya Khristo. ₁₈Vha hashu, ngavhe Muṋe washu Yesu Khristo a tshi ni itela vhuthu noṱhe. Amen.