HOSIA 13

₁Kale Efraimi o ri u amba vhathu vha tetemela, o vha o huliswa kha ḽa Israele. Hone vho ovha mulandu nga u luvha Baali, vha fa. ₂Zwino vha ḓi tshinya vha tshi ya; vha ḓivhumbela zwitungulo nga siliva yavho, zwifanyiso zwo vhumbwaho nga vhuṱali, hone zwoṱhe ndi mishumo ya vhatsila. Zwino vha ri a no zwi ṋekedza zwiṱhavhelo a zwi khise – muthu a tou khisa mbohwana! ₃Ndi zwine vha ḓo nga khuli ya nga matsheloni, vha nga ṅwando u sa lengi u fhufha, vha nga mungu luvhanḓeni u tshi hwalwa nga ḓumbu, vha nga vhutsi vhune ha bva nga fasiṱere.

₄Muṋe washu u ri, “Hone ndi Nṋe Yahavee Mudzimu waṋu we a ni pfulusa Egipita. Mudzimu ndi Nṋe fhedzi, ni songo vha na muṅwe, a hu na muṅwe mutshidzi arali e si Nṋe. ₅Ndo ni londola ngei phangani, shangoni ḽi si na maḓi. ₆Ndo ni ṋea zwiḽiwa na ḽa na fura, na ri u pfa no fura na thoma u ḓihudza, zwenezwo na nkhangwa. ₇Ndi zwine nda ḓo ni wela unga ndau, nda ni lalela nḓilani unga nngwe. ₈Ndi ḓo sinyuwa sa biara yo dzhielwa vhana, ndi ḓo ni vutshela nda ni fhandula khana. Ndi ḓo ni ponda unga ndau, tshivhanda tsha ḓaka tshi ḓo ni fhandula.

₉“Inwi Vhaisraele, ndi ḓo ni lozwa ngauri ni lwa na Nṋe, ni lwa na Mutiki waṋu. ₁₀Khosi yaṋu ine ya nga ni tshidza i ngafhi? Ni tshi amba ni ri, ‘Ri fhe khosi, ri fhe vhavhusi.’ Zwino vhavhusi vha miḓi yaṋu yoṱhe vha ngafhi? ₁₁Ndi ni fha khosi ndo sinyuwa nda dovha nda ni dzhiela nga mbiti.

₁₂“Milandu ya vhathu vha Efraimi yo vhulungwa, vhutshinyi havho ho ṅwalwa. ₁₃Vha ḓo ḓelwa nga vhuṱungu vhu no nga ha musadzi a tshi ṱoḓa u vhofholowa, hone vha nga ṅwana a si na vhuṱali, musi tshifhinga tshi tshi swika, ha bveli nnḓa. ₁₄Ndi ḓo vha rengulula kha maanḓa a tshalo naa? Ndi ḓo vha tshidza lufuni naa? Iwe lufu, iḓa na dwadze ḽau. Iwe vhudzulavhafu, iḓa na mabulayo au! Ndi nga si tsha vha khathutshela mbilu. ₁₅Naho Efraimi a kulukusha vhukati ha ṱhanga, hu ḓo ḓa muya u fhisaho u no bva phangani, mufemo wa Yahavee u ḓo takuwa phangani wa xisa zwisima zwawe, wa omisa milondoḓi yawe; lupfumo lwawe lu ḓo ṱangulwa lwoṱhe, khathihi na thundu dzawe dza maṱeleṱele. ₁₆Vhathu vha Samaria vho fanela u hwala mulandu wavho ngauri vho shandukela Mudzimu wavho. Vha ḓo ḽiwa nga pfumo, vhana vhavho vha ḓo rwiswa na fhasi vha pwaṱukana, vhasadzi vhavho vho vhifhaho muvhilini vha ḓo hushulwa mala.”