YESAYA 40

“Fhumudzani vhathu vhanga, vha fhumudzeni!

₂Khuthadzani vhathu vha Jerusalema,

vha vhudzeni uri vho tambulesa,

zwino vho hangwelwa vhutshinyi havho;

ndo vha lifhisa milandu yavho yoṱhe kavhili.”

“Lugiselani Muṋe washu nḓila masogani!

Phulelani Mudzimu washu gondo phangani!

₄Magovha oṱhe nga a ḓadzwe!

Thuthani thavha dzoṱhe na zwivhanga,

hu linganele.

Shango ḽi sa tshimbilei

ḽi vho ḓo tshimbilea,

nngwa dzi vho ḓo vha midavhi.

₅Ndi hone hu tshi ḓo dzumbululwa vhugala ha Muṋe washu;

ḽifhasi ḽoṱhe ḽi ḓo vhu vhona.

Ho amba Muṋe washu Ene muṋe!”

“Ḓivhadza vhathu!”

Nṋe nda ri,

“Ndi ḓo vha ḓivhadza afhio?”

Ha pfi, “Ḓivhadza uri

vhathu vhoṱhe vha nga hatsi,

maanḓa avho a nga maluvha a ḓaka;

₇hatsi vhu a puta,

maluvha a haluluwa musi muya wa Muṋe washu u tshi zwi vhudzula.

Vhukuma vhathu vha nga hatsi.

₈Ee, hatsi vhu a puta,

maluvha a haluluwa,

hone ipfi ḽa Mudzimu washu ḽi ima ḽo khwaṱha lini na lini.”

₉Iwe Tsioni

u no ḓisa mafhungo a takadzaho,

gonya thavha ndapfu!

Iwe Jerusalema muḓivhadzi wa mafhungo maḓifha,

ṱavha mukosi, u songo ofha;

vhudza miḓi ya Juda u ri,

“Mudzimu waṋu ngoyu!

₁₀Vhonani,

Muṋe wa zwoṱhe Muṋe washu ndi Ene Ramaanḓa;

u khou ḓa u vhusa

nga tshanḓa tshawe tsha maanḓa.

Zwe a zwi shumela o zwi wana,

ndi vhathu vhawe vhe a vha lamukisa kha maswina.

₁₁U khou vha londola

unga mulisa a tshi lisa sambi ḽawe:

u takula ngwana nga zwanḓa,

a dzi kuvhatedza khanani yawe,

vhomme adzo a vha endedza zwavhuḓi.”

₁₂We a ela maḓi a lwanzhe

nga tshanḓa tshawe ndi nnyi?

We a ela ḽiṱaḓulu nga minwe ndi nnyi?

We a ela mavu a ḽifhasi nga mvuvhelo,

a kala dzithavha nga tshikalo,

a dovha a kala na mivhundu,

ndi nnyi?

₁₃Ndi nnyi ane a nga ṱalukanya

mihumbulo ya Muṋe washu,

kana a vha mueletshedzi wawe?

₁₄Mudzimu o eletshedzana na nnyi uri a wane ṱhalukanyo,

a funzwe ngae nḓila i re yone?

U hone we a ṋea Mudzimu nḓivho na ṱhalukanyo naa?

₁₅Mudzimu a tshi sedza dzitshakha

u vhona dzi tshi tou nga shotha ḽa maḓi mvuvheloni,

dzi nga kubuse mvuvheloni;

zwiṱangadzime u zwi doba unga thorwana ya muṱavha.

₁₆Phukha dzoṱhe dzi re maṱakani a Libanoni

a dzo ngo eḓana tshiṱhavhelo tsha u ṋekedza Muṋe washu,

miri yao a yo ngo eḓana u honza mulilo watsho.

₁₇Ene u vhona tshakha dzoṱhe dzi si tshithu,

dzi si na mushumo,

dza nga a dziho.

₁₈Zwino Mudzimu ni nga mu vhambedza na nnyi?

Ni ḓo ri u fana na mini?

₁₉Hufha zwifanyiso zwa midzimu zwi tshi fulwa nga vhatsila

zwa fhomiwa nga musuku,

zwa itelwa geḓane dza siliva.

₂₀Mushai a sa koni u ṋekedza nduvho yeneyo

u nanga muri u sa sini,

a ṱoḓa muvhaḓi a konaho,

a mu vhaḓela tshifanyiso

tshine tsha ḓo ima tsho khwaṱha.

₂₁Mathina a ni zwi ḓivhi?

A ni athu zwi pfa?

A ni athu vhudzwa u bva henengei mathomoni?

A ni athu ṱalukanya uri shango ḽo tewa hani?

₂₂Mudzimu u dzula kha khuluṋoni nṱha ha tshitendeledzi

tsha ḽifhasi;

vhathu vhaḽo vho ṱukufhala unga nzie;

o ṱharamudza lutombo unga pesa ḽa ṅwenda,

a lu akha unga dennde ya u dzula ngomu.

₂₃U wisa vhavhusi vha sa tsha vha tshithu,

vhahaṱuli vha shango vha nga a vha tsheeho.

₂₄Vha nga mutomba une wa ri ú kha ḓi bva u runga,

ú kha ḓi bva u mela,

u sa athu ṱoka midzi,

Muṋe washu a u vhudzula,

wa puta,

wa hwalwa nga tshiḓumbumukwe unga mathukhwi.

₂₅Ndi zwine Mudzimu mukhethwa a ri,

“Zwino ni ḓo mpfanyisa na nnyi?

Ane a eḓana na Nṋe ndi nnyi?”

₂₆Sedzani lutombo –

ndi nnyi o vhumbaho zwoṱhe hezwi?

Ndi Ene we a vhekanya ṋaledzi nga nthihi nga nthihi

unga mmbi,

nga maanḓa awe mahulu na nungo dzi sa konadzei,

a dzi vhidza nga madzina;

a hu na na nthihi i siho.

₂₇Inwi Vhaisraele vhana vha Jakopo,

ndi mini ni tshi gungula na ri,

“Muṋe washu ha ḓivhi zwine zwa ri dina,

Mudzimu washu ha zwi londi musi ri tshi sokou tambudzwa.”

₂₈Mathina a ni zwi ḓivhi?

A ni athu zwi pfa naa?

Muṋe washu ndi Mudzimu wa lini na lini,

o sika shango u swika he ḽa guma.

Ha neti, ha kulei nungo;

a hu na ane a ṱalukanya mihumbulo yawe.

₂₉U khwaṱhisa vho netaho,

vha si na nungo a vha ṋea maanḓa mahulu.

₃₀Vhaswa na vhone vha a neta

vha fhelelwa nga nungo,

na vhaṱhannga vha a khukhulwa vha wa,

₃₁hone vhe vha lavhelela Muṋe washu

vha wana nungo ntswa,

vha fhufha nga phapha dzi no nga dza goni,

vha gidima vha sa neti,

vha tshimbila vha sa fhelelwi nga nungo.