YESAYA 56

“Dzulani ni tshi fulufhedzea

ni ite zwi re zwone;

a thi nga lengi u ni tshidza,

ndi hone u fulufhedzea hanga hu tshi ḓo vhonala.

₂Ndi ḓo shudufhadza vhane vha vhulunga mulayo wa Sabatha,

vha si u pfuke;

vhane vha ḓiilisa vhuvhi vha ḓo vha na mashudu.”

₃Mutsinda we a ḓibaḓekanya

na vhathu vha Muṋe washu

a songo ri,

“Muṋe washu a nga si tende ndi tshi mu luvha

na vhathu vhawe.”

Munna we a luvhedzwa a songo ri,

“Nṋe ndi tou vha muri wo omaho!”

₄Muṋe washu a tshi vhudza muthu o raloho u ri,

“Arali wa nkhulisa

nga u vhulunga mulayo wa Sabatha,

wa ita zwine zwa ntakadza,

wa nambatela mulanga we nda vhofha,

₅ndi hone dzina ḽau ḽi tshi ḓo ṅwaliwa

kha tombo ḽa tshihumbudzo thembeleni yanga,

zwa fhira na musi wo vha u na vhana vha vhatuka na vhasidzana;

dzina ḽau a ḽi nga hangwiwi,

lutsinga lwau a lu nga tumuwi.”

₆Muṋe washu a tshi amba na vhatsinda

vhe vha ḓibaḓekanya na vhathu vhawe,

vhane vha mu shumela vha funa dzina ḽawe

vha mu luvha,

vhoṱhe vhane vha vhulunga mulayo wa Sabatha

vha si vhuye vha u pfuka,

vha nambatela mulanga wawe, u ri,

₇“Ndi ḓo ni swikisa Tsioni,

thavhani yanga khethwa,

nda ni ṋea dakalo nḓuni yanga ya thabelo,

nda ṱanganedza zwiṱhavhelo na nduvho

zwine na ṋekedza aḽiṱarini yanga;

thembele yanga i ḓo pfi nnḓu ya thabelo ya vhathu vha tshakha dzoṱhe.”

₈Muṋe wa zwoṱhe Muṋe washu,

we a vhuedzedza Vhaisraele hayani vha tshi bva vhuthubwani, u ri,

“Ndi kha ḓi ḓo ḓisa vhaṅwe vhathu vha baḓekana na inwi.”

“Inwi tshakha dzisili,

iḓani unga zwivhanda zwa ḓaka

ni mile vhathu vhanga!

₁₀Vharangaphanḓa vhavho vhoṱhe ndi mabofu,

a vha ḓivhi khombo i ḓaho,

vha nga mmbwa dza u linda dzi sa huvhi,

tshadzo ndi u sokou shuvhama dza ḓilorela;

vha funa hani khofhe!

₁₁Vha nga mmbwa dza dziphangwa dza tseḓa dzi sa furi.

Ndi vhalisa vha sa koni u lisa;

muṅwe na muṅwe u londa zwawe fhedzi,

u ṱoḓa zwi tshi nakela ene fhedzi.

₁₂Vha ri, ‘Kha ndi kelwe waini,

ndi nwe ndi fure!

Na matshelo zwi ḓo ḓi rali,

kana zwa fhira zwa ṋamusi!’ ”