YESAYA 59

₁Ni songo vhona unga tshanḓa tsha Muṋe washu ndi tshipfufhi,

a tshi koni u ni tshidza,

kana na vhona unga o dzinga nḓevhe,

ha ni pfi!

₂Ndi vhuvhi haṋu ho ni fhandekanyaho

na Mudzimu waṋu,

ndi vhutshinyi haṋu he ha ita uri a ni furalele,

a si ni pfe.

₃Zwanḓa zwaṋu zwo tswuka malofha,

minwe yaṋu yo ḓala vhuvemu,

milomo yaṋu i amba mazwifhi,

ndimi dzaṋu dzi amba zwa vhufhura.

₄Ni sokou pomokana nga zwi siho;

a hu na a no haṱula a sa ṱaluli;

ni ḓitika nga mazwifhi

ni tshi ṱoḓa u lamulelwa tsengoni;

ni vhifha muvhilini nga u levha,

na beba vhuvhi.

₅Ni luka vhunwa,

zwa nga u alamela makumba a tshitemahe;

ane a ḽa makumba aṋu u a fa;

a tshi thothonya hu bva mavuluvulu.

Vhutande haṋu vhu nga u luka lubuvhi;

₆a lu luki nguvho,

a ni tandi ḽi no fukwa;

mishumo yaṋu ndi mivhi,

tshine zwanḓa zwaṋu zwa tshi kona ndi u huvhadzana,

₇milenzhe yaṋu i gidimela vhuvhini,

i ṱuwa nga luvhilo

i tshi yo fhaladza malofha a a si na mulandu;

mihumbulo yaṋu ndi mivhi;

hune na kanda

ni sia mutshinyalo na ndozwo;

₈nḓila ya mulalo a ni i ḓivhi,

hune na ya ndi u piringanya khaṱhulo;

ni fara ya magombikwa, hone vha faraho yeneyo

a vha nga vhi na mulalo.

₉Zwino ri vho ḓivha uri ndi mini Muṋe washu a sa ri lamuleli,

ri sa vhoni u fulufhedzea hawe;

ri lavhelela tshedza,

ra sokou vhona swiswi fhedzi;

ri lindela mapfuvhi,

ra sokou tshimbila ho tou nzwii;

₁₀ri phuphuledza nḓila luvhondoni unga mabofu,

ra timatima unga vhathu vha si na maṱo,

ra khukhulwa masiari tshivhangalala,

ha nga ḽo kovhela;

ri nga vhafu ri tshee vhaṱuku.

₁₁Roṱhe ri gomela unga biara i tshi lila,

ri lila unga maivha.

Ro lindela u lamulelwa, zwa kunda,

ra lavhelela u tshidzwa,

ra si hu vhone.

₁₂Mune washu,

ro u khakhela lu sa fheli,

vhutshinyi hashu vhu a ri pomoka;

vhukuma, vhukhakhi hashu a vhu ṱuwi mbiluni dzashu,

milandu yashu ri a i ḓivha;

₁₃ro u shandukela ra ita vhufhura,

ra furalela Mudzimu washu,

ra hana u u tevhela ra kandeledza vhaṅwe;

mbilu dzashu dzo amara mazwifhi ra a ṱanza nga u zwifha.

₁₄A hu tshee na khaṱhulo mbuya;

u fulufhedzea ho ima kule;

mikotoni ngoho a i tsha pfala,

yo khukhulwa ya wela fhasi;

a si na vhufhura ha tsha vulelwa muṋango;

₁₅ngoho a i tsheeho;

a sa funi u tshinya u a ṱangulwa.

Hezwo Muṋe washu o zwi vhona;

zwi a mu dina hu si na khaṱhulo mbuya;

₁₆zwi a mu kanukisa a tshi vhona hu si na ane a lamulela

vha kandeledzwaho,

ndi zwe a tshidza vhathu nga maanḓa awe,

u fulufhedzea hawe ha vha yone thikho yawe.

₁₇Tshipilakhana tshe a ambara ndi u fulufhedzea;

u tshidza vhathu ndi wone muṅadzi wawe;

zwiambaro zwawe ndi u lifhedza;

khanzu yawe ndi u fungelela u tupula vhuvhi.

₁₈U ḓo pfufha muṅwe na muṅwe

a tshi tevhedza mishumo yawe –

pfufho ya maswina awe dzi ḓo vha mbiti dzawe;

vha mashango a kule u ḓo vha lifhedza

nga zwo vha teaho.

₁₉Vha Vhukovhela

vha ḓo ofha dzina ḽa Muṋe washu,

vha Vhubvaḓuvha vha hulisa vhugala hawe.

Ndi uri maswina a tshi ḓa unga mulambo u kumbaho,

Muya wa Muṋe washu u ḓo vha shakulisa.

₂₀Hone Tsioni u ḓo ḓa e Mutshidzi,

a dalela vhana vha Jakopo vho laṱaho vhutshinyi havho.

Ho amba Muṋe washu.

“A vha Nṋe,

mulanga une nda vhofha na iwe ngoyu:

Muya wanga a re kha inwi na maipfi anga e nda longa mulomoni wau,

ha nga bvi mulomoni wau,

na milomoni ya vhana vhau ha nga bvi,

na milomoni ya vhana vha vhana vhau, lini na lini.

Ho amba Nṋe Yahavee.”