YESAYA 61

₁Muṋe wa zwoṱhe Muṋe washu o vhea Muya wawe kha nṋe;

Muṋe washu o nnḓodza mapfura

uri ndi vhe muporofita,

a nthuma uri ndi isele vhaheḓana mafhungo maḓifha,

ndi fhodze vha mbilu dzo pwashekanaho,

ndi ḓivhadze mathubwa uri a ḓo vhofhololwa,

vha re dzhele vha ḓo bvisiwa,

₂ndi ḓivhadze ndi ri,

“Tshifhinga tsha Muṋe washu tsho swika!

Ndi hone Mudzimu washu

a tshi ḓo lifhedza maswina awe!”

O nthuma u fhodza vha lilaho,

₃uri vhoṱhe vho ṱungufhalaho Tsioni ndi vha rudze mbilu,

vha si tsha dzula milorani,

vha ambare tshiala tsha vhugala,

vha bvule nguvho ya tshililo,

vha ḓole mapfura a dakalo,

vha si tsha ṱovhowa,

thendo i vhe yone nguvho yavho.

Vha ḓo fanyiswa na miri ya u naka,

ye Muṋe washu a i ṱavha uri a ṱane vhugala hawe

na vhuvhuya hawe.

₄Vha ḓo vusa matumba a kale,

vha imisa miḓi yo thuthiwaho kale-kale;

vha ḓo fhaṱa miḓi yo phusukanywaho

ye ya vha i marubi miṅwaha na miṅwaha.

₅Maṱambi aṋu a nngu a ḓo liswa nga vhatsinda,

vha ni limela masimu,

vha londola minḓirivhe yaṋu.

₆Hone inwi ni ḓo pfi vhotshifhe vha Muṋe washu;

vha ḓo ri ni pfi vhashumi vha Mudzimu washu;

ni ḓo ḽa lupfumo lwa dzitshakha na lu ṱongisa.

₇Ṱhoni dzaṋu na u nyadzea zwo fhela,

zwino ni vho ḓo fhululedza no fhululedza;

ni ḓo dzula shangoni ḽaṋu,

lupfumo lwaṋu lwa anda kavhili,

dakalo ḽaṋu ḽa vha ḽa lini na lini.

₈Muṋe washu u ri,

“Tshine nda tshi funa ndi khaṱhulo i sa ṱaluli,

u dzhiela vhaṅwe zwithu nga vhufhura

ndi a zwi vhenga;

vhathu vhanga ndi ḓo vha pfufha nga zwo vha teaho,

nda vhofha navho mulanga wa lini na lini.

₉Vhana vhavho vha ḓo vha na bvumo vhukati ha dzitshakha,

vhaḓuhulu vhavho vha huliswa nga vhathu vhoṱhe;

vhoṱhe vhane vha vha vhona vha ḓo ḓivha

uri ndi lushaka

lwe Muṋe washu a lu shudufhadza.”

₁₀Ndi pembelela mishumo ya Muṋe washu,

ndi fhululedza Mudzimu wanga!

O nnyambadza u tshidzwa;

khanzu ye a mpfukedza ndi gundo,

nda nga mukwasha o ambara tshiala,

nda nga muselwa o ṱamiwa nga nungu dzawe.

₁₁Muṋe wa zwoṱhe Muṋe washu u ḓo ita uri ri kunde,

ri mu rende nga nyimbo tshakha dzoṱhe dzi tshi zwi pfa,

zwa nga mavu a tshi medza mutomba,

zwa nga ngade i tshi medza mbeu.