1Ndi hone Holofenese a tshi vhudza Judithi a ri, “Musadzi, ni songo ofha tshithu, a hu na tshi no ofhisa! Nṋe a thi athu vhuya nda vhaisa muthu ane a nanga u shumela Nebukhadinetsara khosi ya ḽifhasi ḽoṱhe. 2Nazwino, vhathu vha haṋu vhane vha dzula shangoni ḽa dzithavha, ngavhe vha si nnyadze, ndo vha ndi nga si vhuye nda vha angaladzela pfumo; vho tou ḓiṱulela khombo. 3Zwino mmbudzeni uri ndi mini no vha shavha na ḓa kha riṋe? Nangwe zwo ralo, ni tshi shavhela ngeno ho vha u ḓitshidza. Ḓikhwaṱhiseni! Ni ḓo tshila vhusiku vhuno na misi i ḓaho. 4A hu na ane a ḓo vhuya a ni vhaisa. Ni ḓo farwa zwavhuḓi u ḓi nga vhalanda vhoṱhe vha muṋe wanga khosi Nebukhadinetsara.”
5Judithi a fhindula Holofenese a ri, “Nga vha thetshelese maipfi a nṋe phuli yavho, nga vha litshe phuli yavho ya musadzi i ambe vha tshi zwi pfa! Muṋe wanga, a thi nga vha vhudzi mazwifhi vhusiku vhuno. 6Huno arali vha thetshelesa maipfi a phuli yavho, Mudzimu u ḓo ita uri zwi vha nakele tshoṱhe, a vha nga kundwi u vuledza mushumo wavho ufhio na ufhio. 7Nga hu lalame Nebukhadinetsara khosi ya ḽifhasi ḽoṱhe, we a vha ruma u dzudzanya zwa zwivhumbwa zwoṱhe! Vhone vha ita uri a si shumelwe nga vhathu fhedzi, u shumelwa na nga phukha dza ḓaka na kholomo na zwiṋoni zwi fhufhaho, zwi ḓo tshilela Nebukhadinetsara na nnḓu yawe yoṱhe.
8“Vhukuma, zwa vhuṱali havho na maano avho ro zwi pfa, nahone shango ḽoṱhe ḽi a zwi ḓivha uri a hu na a no nga vhone muvhusoni uyu nga vhukoni na nḓivho na vhuṱali vhuhulu kha u rekanya zwa mmbi.
9“Zwino zwe Akhioro a amba khoroni yavho, na zwone ro zwi pfa. Vhanna vha Bethulia vho mu litsha a tshila, a vha vhudza zwoṱhe zwe a vhudza vhone. 10Zwino muṋe wanga, muvhusi wanga, vha songo nyadza zwe a amba, vha zwi vhulunge mbiluni, ngauri ndi ngoho. Ndi uri vhathu vha hashu a vha lwiwi navho, pfumo ḽi nga si vha kone arali vha songo khakhela Mudzimu wavho. 11Hone zwino mulandu wavho wo no vha tiba, u ḓo ita uri mbiti dza Mudzimu dzi vha wele nge vha ḓi tshinya. Zwenezwo vhone muṋe wanga vha nga si dzivhiwe vha kundiwa, lufu lu ḓo wela vhathu avho. 12Vho no fhelelwa nga zwiḽiwa, na maḓi avho oṱhe o xa, zwenezwo vho elekanya u ṱhavha zwifuwo zwavho, nahone vho ḓiimisela u ḽa zwithu zwoṱhe zwine Mudzimu milayoni yawe a vha dzivhisa. 13Vho ḓivhadza uri vha ḓo ḽa vha fhedza mitshelo ya u ranga ya thoro ya tshafumi tsha waini na mapfura zwe vha vha vho zwi shudufhadza vha zwi vhulungela vhaphrista vhane vha shuma phanḓa ha Mudzimu washu muḓini wa Jerusalema. Izwo ndi zwithu zwine muthu zwawe a si fanele u vhuya a zwi kwama nga tshanḓa. 14Vha dovha vha ita na u ruma vhaḓinḓa vha ya Jerusalema uri vha vha vhuele na thendelo i no bva khoroni ya vhahulwane, ngauri vha dzulaho henefho na vhone vha vho ita zwithu izwo. 15Musi wonoyo une phindulo ya swika khavho, vha ita zwenezwo, vha ḓo kumedzwa vhone muṋe wanga vha lozwiwa.
16“Zwenezwo nṋe phuli yavho ndi tshi tou pfa hezwo, nda mbo ḓi vha shavha. Mudzimu o nthuma uri ndi shume na vhone mishumo ine ya ḓo kanukisa vhathu vhoṱhe vha shango nga he ḽa kanda. 17Nṋe phuli yavho vhukuma ndi musadzi a ofhaho Mudzimu, ndi shumela Mudzimu wa makoleni vhusiku na masiari. Zwino ndo ḓiimisela u dzula na vhone muṋe wanga, hone vhusiku vhuṅwe na vhuṅwe ndi ḓo bva nda ya govhani u yo rabela Mudzimu. Mudzimu u ḓo mmbudza musi Vhaisraele vho no tshinya. 18Zwenezwo ndi ḓo ḓa nda vha ḓivhisa uri vhone vha bve na mmbi yavho yoṱhe; vhukuma na muthihi wavho a nga si kone u imedzana na vhone. 19Ndi ḓo vha ranga phanḓa ra swika Judia, vha vhuya vha swika Jerusalema. Henefho ndi ḓo vha vhetshela tshidzulo tsha khaṱhulo vhukatikati ha muḓi. Vha ḓo khada vhathu avho unga nngu dzi si na mulisa, na mmbwa i nga si vhuye ya vha huvha. Zwithu izwi ndo vhudzwa, nda dzula ndo ḓivhadzwa, zwino ndo ruṅwa uri ndi ḓe ndi vhudze vhone.”
20Maipfi a Judithi a takadza Holofenese na vhalangammbi vhawe vhoṱhe, vha tama vhuṱali hawe vha kanuka vha ri, 21“U bva vhusendekamisi u swika vhusendekamisi a hu na musadzi muṅwe a no nga uyu nga lunako na nga nyambo ya vhuṱali!” 22Ndi hone Holofenese a tshi vhudza Judithi a ri, “Mudzimu o ita zwone a tshi ni ruma vhathu vha haṋu vha sa athu swika; zwi ḓo ita uri riṋe ri vhe na maanḓa, avho vhe vha nyadza muṋe washu vha lozwiwe. 23Inwi lunako lwaṋu lu ḓi fana na vhukoni haṋu ha u amba. Arali na ita sa zwe na mpfulufhedzisa, Mudzimu waṋu u ḓo vha Mudzimu wanga, ni ḓo dzula pfamoni ya khosi Nebukhadinetsara na vha na bvumo kha ḽifhasi ḽoṱhe.”
