1Vhe vha vha vha tshi kha ḓi vha denndeni dzavho vha tshi pfa zwo iteaho vha akhamala, 2vha farwa nga nyofho khulu vha tetemela. Vha si tsha lindelana, vha balangana na shango, vha shavhela magondoni oṱhe, vha livha hoṱhe govhani na dzithavhani. 3Vhe vha vha vho vhewa dzithavhani u mona na Bethulia na vhone vha shavha. Zwino vhahali vha Israele vha vha wela vhoṱhe.
U pandamedzwa ha vhannḓa
4Uzia a ruma vhaḓinḓa vha ya Bethomasithaimi na Bebai na Khoba na Kola, na shangoni ḽoṱhe ḽa Israele u ḓivhadza zwo iteaho, uri vhoṱhe vha wele ayo maswina vha a lozwe. 5Vhaisraele vhoṱhe vha tshi zwi pfa, vhoṱhe khathihi vha mbo ḓi vha wela, vha vha lozwa u vhuya u swika Khoba. Vha bvaho Jerusalema na dzithavhani musi vho ḓivhadzwa zwo iteaho mushashani wa maswina avho, na vhone vha longa tshanḓa vha lwa na tshira itsho. Vhagiliada na Vhagalelia vha vha tanga vha vha vhulaha vho tou halifha, u vhuya u fhira muḓi wa Damasko na shango ḽawo. 6Vhaṅwe vha dzulaho Bethulia vha swiela mishasha ya Vhaashuru, vha i ṱangula, vha ḓipfumisa zwihulu. 7Vhaisraele vhe vha vhuya vha tshi bva u lozwa tshira vha dzhia zwe zwa vha zwo sala, miḓi na miḓana dzithavhani na mudavhini ya ḓala nga thundu i si na vhukono ya zwe vha ṱangula.
Ndivhuho
8Muphrista muhulwane Joakimi na vhahulwane vha Vhaisraele vha dzulaho Jerusalema vha ḓa vha vhona nga avho maṱo zwivhuya zwe Muṋe washu a itela Israele, na u ṱangana na Judithi vha mu fhululedza. 9Musi vha tshi swika hayani ha Judithi, vhoṱhe vha amba mazha vha ri,
“Ndi inwi vhugala ha Jerusalema,
goliso ḽihulu ḽa Israele,
ni tou vha muṱongiswa muhulu wa vhathu vha hashu.
10Zwoṱhe izwi no zwi ita nga tshanḓa tshaṋu;
no itela Israele zwivhuya,
Mudzimu u takalela zwe na ita.
Ngavhe Mudzimu Muṋe washu a tshi ni shudufhadza lini na lini!”
Vhathu vhoṱhe vha fhindula vha ri, “Amen!”
11Vhathu vhoṱhe vha ṱangula mishasha ha vhuya ha fhela maḓuvha a mahumi mararu (30), Judithi vha mu ṋea dennde ya Holofenese, khathihi na siliva yawe yoṱhe, na vhulalo hawe, zwinwelo zwawe, na thundu yawe yoṱhe ya nḓuni, a zwi ṱanganedza. A pana meila yawe, a i vhofhelela kha goloi dzawe, a gonyisa thundu iyo khadzo.
12Vhasadzi vhoṱhe vha Israele vha kuvhangana uri vha vhone Judithi. Vha mu khoḓa, vha mu hulisa nga u mu tshinela. Ene a dzhia matavhi e a vha o a fara a a kovhela vhasadzi avho vho mu kuvhanganelaho, 13ene na vhasadzi avho vha konou ambara zwiala zwa maṱari a muolivi. Ndi hone a tshi ranga vhasadzi phanḓa vha tshi khou tshina, ngeno vhanna vha Israele vha tshi khou tevhela vho fara zwihali zwavho, vho ambara zwiala, vha tshi khou imba nyimbo.
14Judithi a tangwa nga Vhaisraele vhoṱhe a sima luimbo holu lwa ndivhuho, vhathu vha takusa maipfi vha imba luimbo holu lwa thendo vha ri:
