JUDITHI 2

₁Nga ṅwaha wa fumi na vhuṱanu na vhuraru (18), nga ḓuvha ḽa mahumi mavhili na vhuvhili (22) ḽa ṅwedzi wa u ranga, ho vha hu tshi khou rerwa mafhungo pfamoni ya Nebukhadinetsara khosi ya Vhaashuru, a u lifhedza mashango oṱhe, nga he a vha o ana. ₂Nebukhadinetsara a vhidza magota awe oṱhe na vhaḓivhalea, a songa mutumba navho, a vha vhudza uri mashango ayo a fanela u lozwiwa tshoṱhe. ₃Vha vhofha ḽa uri hu lozwiwe vhoṱhe vhe vha hana u mu phalala musi vho rambiwa.

₄Musi Nebukhadinetsara khosi ya Vhaashuru o no fhedza u zwi dzudzanya, a vhidza Holofenese, mulangammbi muhulwane, ane a tevhela ene nga maanḓa, a mu vhudza a ri, “Nṋe khosi khulwane, muṋe wa ḽifhasi ḽoṱhe ndi ri: ₅Ni tshi ṱuwa afha ni yo dzhia vhanna vha ḓivheaho vhe na vhuhali, vha zwigidi zwa ḓana na mahumi mavhili (120 000) vha tshimbilaho nga ṋayo na vha zwigidi zwa fumi na zwivhili (12 000) vho namelaho dzibere, ₆ni yo lwa na vha shango ḽoṱhe ḽa vhukovhela, nge vha hana u phalala musi ndi tshi vha ramba. ₇Ni vha vhudze vha dzule vho lugisa zwoṱhe zwine zwa ṱoḓea, ngauri ndi ḓo vha ḓela ndo sinyuwa, ndi ḓo tibedza shango ḽoṱhe nga ṋayo dza vhahali vhanga, vhenevho vhathu nda vha ṱangula. ₈Vhafu vhavho vha ḓo ḓadza magovha na milambwana, mikumbela i ḓo thivhelwa nga zwitumbu zwavho ya fhalala. ₉Ndi ḓo vha hwala nda vha isa migumoni ya ḽifhasi.

₁₀“Ndi zwone, takuwani ni yo nthubela mashango ayo oṱhe. Arali vha ḓiṋekedza kha inwi, ni nndindele vhone hu vhuye hu swike ḓuvha ḽa u laṱiswa havho. ₁₁Vhane vha ita khani ni songo vha pfela vhuṱungu, ni vha vhulahe ni ṱangule shango ḽiṅwe na ḽiṅwe ḽe nda ni kumedza. ₁₂Ndi ana nga vhutshilo hanga, na nga maanḓa a muvhuso wanga ndi ri, zwe nda zwi amba ndi ḓo zwi vuledza nga tshanḓa tshanga. ₁₃Zwino ni songo vhuya na nyadza na ḽithihi ḽine muṋe waṋu a amba, ni khunyeledze zwoṱhe vhukuma nga he nda ni laya, ni songo vhuya na lenga.”

₁₄Ndi hone Holofenese a tshi tsiruwa phanḓa ha muṋe wawe, a vhidza vhahulwane vhoṱhe, na vhalangammbi na vhalangagomane vha Ashuru. ₁₅A kuvhanganya mmbi yo nanguludzwaho ya vha zwigidi zwa ḓana na mahumi mavhili (120 000), nga he muṋe wawe a mu laya, na vhaposi vha misevhe vho namelaho dzibere vha zwigidi zwa fumi na zwivhili (12 000), ₁₆a vha dzudzanya nga zwigwada ya vha mmbi yo fhelelaho. ₁₇A dzhia na tshivhalo tshihulu tsha dzigamela na donngi na dzimeila dza u hwala mihwalo, na nngu dzi sa vhalei na kholomo na mbudzi ya vha mbuvha yavho. ₁₈Munna muṅwe na muṅwe a fhiwa mbuvha i si na vhukono, na musuku munzhi na siliva zwi bvaho gwamani ḽa pfamo ya khosi.

₁₉Ndi hone Holofenese na mmbi yawe yoṱhe vha tshi mbo ḓi dzhena nḓilani vha ranga phanḓa ha khosi Nebukhadinetsara uri vha dzhie mashango oṱhe a vhukovhela nga gariki dzavho na vhanameli vha dzibere na vhahali vho nanguludzwaho vha tshimbilaho nga ṋayo. ₂₀Vhenevho vha tevhelwa nga mmbi khulu ya tshakha nnzhi dza vhathu vhane u anda havho ha nga magerere kana buse ḽa shango.

₂₁Vha takuwa Ninive vha tshimbila ha fhela maḓuvha mararu vha swika mudavhini wa Bekhethilethe. U bva Bekhethilethe vha yo ṱoka mishasha tsini ha dzithavha dzi re Devhula ha Kilikia Nṱha. ₂₂U bva henefho Holofenese a dzhia mmbi yawe yoṱhe, vha tshimbilaho nga ṋayo na vhanameli vha dzibere na dzigariki, a livha zwivhangani. ₂₃A phusukanya Phuthi na Ludi, a ṱangula Vharasi vhoṱhe na Vhaishmaele vha no dzula masakhani a phanga u ela Tshipembe ha Khaladia.

₂₄Ndi hone a tshi tsa na Yufuratha, a buḓekanya Misopothamia, a thutha miḓi yoṱhe yo tingeledzwaho nga mitsheṱo u tsa na muedzi wa Abroni, u vhuya u swika lwanzheni. ₂₅A dia shango ḽa Kilikia, a lozwa muṅwe na muṅwe we a linga u imedzana nae. Zwino a fhirela masakhani a tshipembe ha Jafethe, u livha Arabia. ₂₆Vhamidiani vhoṱhe a vha tangela ngomu, a fhisa dennde dzavho, a vha ṱangula masambi a nngu. ₂₇A tshi tsela mudavhini wa Damasko tshifhinga tsha musi hu tshi khou kaṋiwa goroi, a funga masimu avho oṱhe nga mulilo, a lozwa maṱambi avho a nngu na kholomo, a phusukanya miḓi yaho, a tshinyadza midavhi yavho, a runga vhaṱhannga vhavho vhoṱhe nga pfumo.

₂₈Nyofho dza u ofha vhuhali hawe dza fara vhathu vhoṱhe vha dzulaho shangoni ḽa khunzikhunzi ya lwanzhe, dza fara vha dzulaho Sidoni na Tiro, na vha no dzula Suru na Okina, na vha dzulaho Jamunia, vha tou khura nga nyofho. Vha dzulaho Ashidodo na Ashkeloni vhone vho vha vha tshi mu ofhesa.