JUDITHI 4

₁Vhaisraele vha dzulaho Judia vha pfa zwoṱhe zwe Holofenese mulangammbi muhulwane wa Nebukhadinetsara khosi ya Vhaashuru a ita dzitshakha, na zwe a ṱangula thembele dzavho dzoṱhe a dzi thutha, ₂vha vho mu ofhesa vha tshi humbula Jerusalema na thembele ya Muṋe washu Mudzimu wavho, vha tou khura nga nyofho. ₃Zwino vho vha vha tshi kha ḓi bva u vhuya vhuthubwani, vhathu vha Judia vho vha vha tshi kha ḓi bva u vhuelela mashangoni a havho, vha kumulula midzio mikhethwa na aḽiṱari na thembele zwe zwa vha zwo kumadzwa. ₄Zwenezwo vha ḓivhadza vha shango ḽoṱhe ḽa Samaria, zwa swika Kona, Bethe Horoni, Belemaini, na Jerikho, u vhuya u swika Khoba na Esora, na govhani ḽa Salema. ₅Vhathu vha henefho vha vhea vhalindi miṱumbani yoṱhe ya thavha ndapfu, vha tsireledza miḓi yavho, zwino vhunga masimu avho o vha a tshi kha ḓi bva u kaṋiwa, vha vhulunga zwiḽiwa vha tshi ḓilugisela nndwa. ₆Joakimi, we a vha e muphrista muhulwane wa Jerusalema misi iyo, a ṅwalela vhadzulapo vha Bethulia na Bethomesithaimi, hune ha vha nḓilani i yaho Esdreloni, u livhana na mudavhi wa Dothani, ₇a vha laya uri vha ime vha khwaṱhe pharani dza dzithavha, vhunga ho vha hu si na huṅwe hune muthu a nga fhira ngaho a swika Judia, ngauri vhahali vhó ima henefho zwo vha zwi tshi ḓo konadzea u thivhela mmbi dzine dza vha tshoṱhela, vhunga fhethu afho ho vha ho sekena hu tshi kona u fhira vhathu nga vhavhili nga vhavhili fhedzi. ₈Vhaisraele vha ita zwe vha laiwa nga Joakimi muphrista muhulwane na nga khoro khulwane ya lushaka lwoṱhe lwa Israele ye ya vha yo ṱangana Jerusalema.

₉Vhanna vhoṱhe vha Israele vha rabela Mudzimu nga mbilu yoṱhe, vha ḓisola, ₁₀vhone khathihi na vhafumakadzi vhavho na vhana na zwifuwo zwavho. Vhoṱhe vhatsinda vha dzulaho navho, vhalanda vho rendelwaho, na dziphuli na vhone vha ambara madzanganda. ₁₁Vhaisraele vhoṱhe vha vhanna na vhasadzi na vhana vhe vha vha vha tshi dzula Jerusalema vha shuvhama phanḓa ha thembele, vha ḓishela milora kha ṱhoho, vha imisa zwanḓa zwavho zwa livha kha Muṋe washu. ₁₂Aḽiṱari na yone vha i tibedza nga madzanganda. Vha vhidzelela mazha, nga mbilu yoṱhe, vha tshi rabela Mudzimu wa Israele uri a songo tenda vhana vhavho vha tshi thubiwa, vhafumakadzi vhavho vha kovhelwa vhahali vha vhannḓa, miḓi yavho ya fhalala, hukhethwa ha kumadzwa, vhannḓa vha vha nzhonzhowedza.

₁₃Muṋe washu a pfa tshililo tshavho, a vhona u tambula havho. Ndi uri vhathu vho fhedza maḓuvha manzhi vha tshi ḓidzima zwiḽiwa kha ḽoṱhe ḽa Judia na Jerusalema vhe phanḓa ha hukhethwa ha Muṋe washu Ramaanḓaoṱhe. ₁₄Muphrista muhulwane Joakimi, na vhaphrista vhoṱhe vho imaho phanḓa ha Muṋe washu vha tshi shuma aḽiṱarini yawe, na vhone vho vha vho ambara madzanganda musi vha tshi ṋekedza tshiṱhavhelo tshi fhiswaho tsha misi yoṱhe, nduvho dza muano, na nduvho dza vhathu dzine vha ṋekedza nga u tou funa. ₁₅Vha shela milora thebeni dzavho, vha vhidzelela Muṋe washu nga nungo dzavho dzoṱhe uri a londole nnḓu yoṱhe ya Israele.