Khoro ya Holofenese i tshi laṱa Vhaisraele
1Zwino Holofenese, mulangammbi muhulwane wa mmbi ya Vhaashuru, a zwi pfa uri Vhaisraele vho ḓilugisela nndwa, na uri vho vala phara dza dzithavhani, vha tsireledza miṱumba ya dzithavha, vha vala magondo midavhini. 2Holofenese a sinyuwa nga maanḓa, a vhidzisa vhavhusi vhoṱhe vha Muaba na vhalangammbi vhoṱhe vha Vhaamoni na vhavhusi vhoṱhe vha khunzikhunzi ya lwanzhe, 3a vha vhudza a ri, “Zwino mmbudzeni inwi Vhakanana, vhathu avha vha no dzula dzithavhani ndi vhathu-ḓe? Vha dzula miḓini ifhio? Mmbi yavho ndi nngafhani? Maanḓa avho na nungo zwi bvafhi? Khosi yavho ane a vha murangaphanḓa wa mmbi yavho ndi nnyi? 4Ndi mini vho hana u bva vha ḓa vha nṱanganedza vhe na vhaṅwe vhoṱhe vha dzulaho vhukovhela?”
Maipfi a Akhioro
5Ndi hone Akhioro murangaphanḓa wa Vhaamoni a tshi mu fhindula a ri, “Muṋe wanga, nga vha pfe zwine nṋe mulanda wavho nda amba. Ndi ḓo vha vhudza ngoho nga ulwo lushaka lune lwa dzula tsini na vhone shangoni ḽa dzithavha. Mulomo wa mulanda wavho a u nga vhuyi wa bula mazwifhi. 6Vhathu avha ndi vha lutsinga lwa Vhakhaladia. 7Vho thoma u dzula Misopothamia, ngauri vho vha vha sa funi u gwadamela midzimu ya vhomakhulukuku wavho vhe vha dzula shangoni ḽa Vhakhaladia. 8Vho ṱutshela nḓila ya vhomakhulukuku wavho, vha luvha Mudzimu wa ḽiṱaḓulu, Mudzimu we vha laiwa uri vha luvhe Ene. Ndi hone vha tshi thathwa nga vhaluvhi vha midzimu yavho ya kale, vha shavhela Misopothamia vha dzula hone vha fhedza tshifhinga tshilapfu. 9Zwino Mudzimu wavho a vha vhudza uri vha pfuluwe hune vha dzula hone vha livhe shangoni ḽa Kanana. Ndi hone he vha dzula hone, zwa vha nakela, vha pfumesa musuku na siliva na zwifuwo. 10Ngavhuya nḓala khulu ya wela shango ḽoṱhe ḽa Kanana, vha pfulutshela Egipita. Vha dzula hone zwenezwo vha tshi kha ḓi wana zwiḽiwa, vha anda vha vha gogo ḽihulu lwe vha si tsha vhalea. 11Khosi ya Egipita ya vha shandukela, ya vha kombetshedza u suka zwidina, ya vha kandeledza ya vha ita dziphuli. 12Hone vhone vha vhidzelela Mudzimu wavho, Ene a rwa shango ḽoṱhe ḽa Egipita nga madambudzo a sa lafhei, Vhaegipita vha vhuya vha vha thatha. 13Mudzimu a xisa Lwanzhe Lutswuku musi vha tshi swika, 14a vha endedza nḓilani yo livhaho Sinai na Kadeshe-Barania, vha pandela vhoṱhe vha dzulaho phangani. 15Ndi hone vha tshi dzula shangoni ḽa Vhaamori, vha lozwa vhoṱhe vha dzulaho Hesheboni nga maanḓa avho. Ngavhuya vha wela mulambo wa Jorodani, vha dzhia shango ḽoṱhe ḽa dzithavhani. 16Vha pandela Vhakanana na Vhapherizi na Vhajebusi na Vhashikheme na Vhagirigashi, vha dzula thavhani idzi vha fhedza tshifhinga tshilapfu.
17“Misi yoṱhe arali Vhaisraele vha sa khakheli Mudzimu wavho, zwi a vha nakela, ngauri Mudzimu wavho u vhenga vhuvhi. 18Hone musi vho pambuwa nḓilani ye a vha laya uri vha tshimbile ngayo, vho kundiwa tshoṱhe nndwani nnzhi, vha fhedza nga u hwaliwa vha iswa vhuthubwani mashangoni asili, thembele ya Mudzimu wavho ya thuthwa, miḓini yavho ha dzula maswina avho. 19Hone zwino vhunga vho vhuelela ha Mudzimu wavho, vho vhuya vha tshi bva fhethu he vha vha vho balanganyelwa hone, vha dovha vha dzula Jerusalema. Ndi hune ha vha na hukhethwa havho, nahone vho dovha vha dzula dzithavhani he ha vha hu sa dzuli muthu.
20“Zwino, muṋe wanga, thovhele wanga, arali vhathu avha vho tshinya vha khakhela Mudzimu wavho, riṋe ra wana mulandu wavho, ndi hone ri tshi ḓo kona u gonya ra yo vha kunda. 21Hone arali vha si na tshe vha khakha, vhone muṋe wanga kha vha vhe kule navho, ngauri Muṋe wavho Mudzimu wavho u ḓo vha lamulela, riṋe ra vho ḓo shona ra sewa nga shango ḽoṱhe”.
22Zwino musi Akhioro o no fhedza u amba izwo, vhathu vhoṱhe vho imaho u mona na dennde vha ṅuṅuna. Magota a Holofenese na vhanna vhoṱhe vha bvaho khunzikhunzini ya lwanzhe na vha bvaho Muaba, vha ita lunzili lwa uri Akhioro a tumukanywe. 23Vha ri, “Riṋe Vhaisraele ri vha ofhelani, hufha vhe vhathu vha si na maanḓa, vha si na nungo dza u ḓilwela? 24Zwenezwo nga ri vha tshoṱhele, muṋe washu Holofenese, mmbi yavho nngafhangafha i ḓo vha mila kathihi fhedzi.”
